Te ʼu Fakamahinohino Maʼa Nātou ʼAē ʼe Fakaʼaogaʼi Ki Te Fakahoko ʼo Te Fono Gāue
ʼO kamata atu ʼaki Te Minisitelio ʼo Te Puleʼaga ʼaenī, kua fetogi te faʼahiga tohi ʼo te polokalama ʼo te Fono Gāue. Ko te ʼu fakamahinohino pea mo te ʼu fakamanatu ʼaē kā hoa mai, ʼe natou fakafoʼou pea mo fakamatalatala fakalelei anai te ʼu meʼa ʼaē neʼe talanoa kiai te ʼalatike “Tou Teuteuʼi Fakalelei Te ʼu Koga Kehekehe ʼo te Fono Gāue,” ʼaē neʼe tā ʼi Te Minisitelio ʼo Te Puleʼaga ʼo Maio 2009.
◼ Ko He Akonaki: ʼE ko he akonaki ʼe fakatafito ki he tohi kua hinoʼi, kae ʼe mole ko he fai palalau mo te nofoʼaki. ʼE tonu ki te tehina faiakonaki ke ina fakamaʼuhigaʼi te meʼa ʼaē kā ʼaoga tāfito ki te kōkelekāsio.
◼ ʼAki He ʼu Fehuʼi Pea Mo He ʼu Tali: Ohagē pē ko tona fai ʼi te Ako ʼo Te Tule Leʼo, ʼe fai anai he ʼu palalau fakanounou ʼi te kamata pea mo te fakaʼosi, pea ʼe fai fuli te ʼu fehuʼi ʼo te ʼu palakalafe. ʼE mole tonu ke lahi fau te ʼu fai fakamahino ʼa te tehina ʼaē neʼe hinoʼi ki te fono ʼaia. Kapau ʼe maʼu he temi, ʼe feala ke lau te ʼu vaega ʼaē ʼe maʼuhiga. ʼE mole ʼaoga ke lau te ʼu palakalafe, gata pē mokā ʼe fakamaʼua mai ʼi Te Minisitelio.
◼ Ko He Fai Palalau: ʼE ko he akonaki ʼe fakakau kiai ia te nofoʼaki. ʼE mole ko he akonaki pē, pea ʼe mole ko he fai palalau ʼaki he ʼu fehuʼi pea mo he ʼu tali.
◼ Te ʼu Faʼifaʼitaki Mo Te ʼu Fakafehufehuʼi: Ko te ʼui ʼaē ke fai he faʼifaʼitaki, ko tona fakaʼuhiga ʼe ko te maʼua ʼa te tehina ʼaē neʼe hinoʼi ki te fono ʼaia ke ina kumi he ʼu tehina peʼe ko he ʼu tuagaʼane ke natou teuteuʼi he faʼifaʼitaki; ʼe mole ko ia ʼaē ʼe tonu ke ina fai te faʼifaʼitaki. Ko nātou ʼaē neʼe ina filifili ʼe tonu ke natou lava fakahoko fakalelei ia te faʼifaʼitaki pea mo lelei tonatou faʼahiga maʼuli; pea ʼe tonu ke ina fai he ʼu fakatuʼutuʼu fakatomuʼa mo nātou, mo kapau ʼe fealagia. ʼO ʼuhiga mo he kau fai fakamafola ʼe kei foʼofoʼou pea ʼe mole heʼeki māhani, ʼe lelei age tonatou mole fakaʼaogaʼi ki he faʼifaʼitaki ʼo ʼuhiga mo te faʼahiga fai ʼo te gāue, ʼuhi pē heʼe tou loto ke fakaʼaogaʼi nātou ki he ʼu fono, kae ʼe feala pē ke fakaʼaogaʼi ʼihi ohagē ko he ʼu hahaʼi ʼe fakahoko ki ai te gāue. Ko te kau fai fakamafola ʼaē ʼe fakaʼaogaʼi ki te faʼifaʼitaki ʼe tonu ke natou hagahaga lelei ki te nofoʼaki. Ko nātou ʼaē ʼe fakafehufehuʼi ʼe tonu ke natou fai ʼanatou fakamatala ʼi te faiakonakiʼaga, kae ke ʼaua tanatou fai mai te nofoʼaki. ʼE tonu ke vakaʼi liuliuga te ʼu faʼifaʼitaki mo te ʼu fakafehufehuʼi. Kapau kua fakalaka te temi ʼo te fono pea kua tonu ke fakanounou e te tehina tana faifai palalau, kae ʼe ina faigaʼi anai ke fai te ʼu faʼifaʼitaki peʼe ko te ʼu fakafehufehuʼi. ʼE tonu muʼa ke vakavakaʼi e te kau tagata faifekau fakaminisitelio mo te kootinatea ʼo te kolesi ʼa te kau tagata ʼāfea, peʼe ko he tahi age tagata ʼāfea, peʼe ko ai ʼaē kā natou fakaʼaogaʼi ki tanatou fono.
Kapau ʼe ʼi ai he ʼu fakamahinohino kua tukupau ʼo ʼuhiga mo he koga ʼo te Fono Gāue, pea ʼe tonu ia ke muliʼi. Kapau ʼe fakahoko te ʼu koga kehekehe ʼo te Fono Gāue ohagē ko tona fakatotonu ʼi te ʼalatike ʼaenī, ʼe lagolago anai te ʼu tehina ke fai te ʼu Fono Gāue “ ʼi te fakapotopoto pea mo te fakatokatoka.”—1 Ko. 14:40.