Te Tali Ki ʼAkotou ʼu Fehuʼi
◼ Koteā ʼaē ʼe tonu ke tou fai moʼo mulimuli lelei ki te temi tuʼakoi ʼo te ʼu fono?
ʼE fakalaka vave te temi mokā tou fai he ʼu meʼa lelei mo tatatou ʼu kaumeʼa. ʼUhi ko te faʼahi ʼaia, ʼe feala ke faigataʼa hatatou mulimuli lelei ki te temi tuʼakoi ʼo te ʼu fono. Koteā ʼaē ʼe lava tokoni mai ki te faʼahi ʼaia?
Tou kamata tautonu. Ka fono te kokelekasio katoa, pea ʼe lagi lelei ʼi he minuta e tahi peʼe lua fakatomuʼa, ke fakaafe nātou ke nātou tahi nofo ki tona nofoʼaga, ke feala ki te fono ke kamata ʼi tona temi totonu pea ʼi te fakatokatoka. (Tnk. 3:1) Ko te ʼu fono ʼaē ʼe fai faka kūtuga, ohage ko te ʼu fono ki te fai faka mafola, ʼe mole tonu ke fakatalitali kia nātou ʼaē ʼe tuai mai.
Koutou teuteuʼi lelei. Moʼo mulimuli lelei ki te temi, ʼe tonu ke kita teuteuʼi lelei takita fono. Koutou manatuʼi lelei te fakatuʼutuʼu ʼo takotou akonaki. Vakaʼi te ʼu puani tāfito, pea mo faka maʼuhigaʼi, kae ʼaua naʼa koutou fualoa ʼi he ʼu puani ʼe mole maʼuhiga. Koutou fai ke mahino gafua te ʼu manatu ʼo takotou akonaki. Kapau ʼi te lolotoga ʼo takotou akonaki ʼe tonu ke fai ai he ʼu faʼifaʼitaki peʼe ko he ʼu fakafehuʼi, pea ʼe tonu ke koutou teuteuʼi fakatomuʼa. Kapau ʼe feala, koutou sivi tokotou temi mokā koutou ʼahiʼahi te fai leʼolahi ʼo takotou akonaki.
Koutou vaevae kehe te ʼu puani ʼo takotou akonaki. Kapau ʼe tonu ke koutou fai he akonaki peʼe ko he fai palalau mo te nofoʼaki, pea ʼe lagi lelei anai ke koutou vaevae kehe te ʼu puani ʼaē ka koutou palalau kiai. Koutou fakatuʼutuʼu te temi ʼaē ka koutou talanoa ai ki he puani, pea koutou tohi ʼi he faʼahi ʼo takotou pepa faiakonaki. Koutou fakasiosio ʼi takotou ʼuasi te temi ʼaē ʼe koutou fai ai takotou akonaki. ʼI he fai palalau mo te nofoʼaki, koutou tokaga naʼa lahi fau he ʼu tali ʼi te ʼu ʼuluaki palakalafe, heʼe koutou fakatevili anai te fai palalau mokā hoko mai te ʼu puani ʼaē ʼe maʼuhiga tāfito ʼi te ʼu palakalafe ki muli age. Ko te ʼu tēhina ʼaē ʼe nātou takitaki Te Tule Leʼo, ʼe nātou tokaga anai ke tāʼofi he temi feʼauga moʼo vakaʼi te ʼu fehuʼi fakamanatu ʼi te fakaʼosi. ʼE nātou toe tokakaga anai ke mole nātou fakalaka ʼi te temi ʼaē ʼe tonu ke hiva ai te katiko fakaʼosi pea mo te faikole.
Koutou fakaʼosi tautonu. Kapau ʼe fai ʼi te fono he ʼu akonaki kehekehe, ohage ko te Fono Gāue, pea ʼe tonu anai ke tokakaga lelei te ʼu tēhina takitokotahi ki te temi ʼaē ʼe tonu ke kamata ai pea mo fakaʼosi ai tanatou ʼu akonaki. Kae koteā ʼaē ʼe feala ke fai mo kapau ʼe tou fakatokagaʼi ʼe ʼosi tauhala anai te fono? ʼE feala ki te ʼu tēhina ke nātou fakanounou tonatou temi faiakonaki, ʼo nātou talanoa ki te ʼu puani ʼaē ʼe maʼuhiga tāfito. Ko he tēhina ʼe ina fai ia te faʼahi ʼaia, ʼe ʼiloga ai tana fakapotopoto ʼi te faiakonaki.
Ko te nofoʼaki, ʼe feala ke nātou tokoni ki te tēhina, ʼo nātou fakanounou tonatou ʼu tali pea mo talanoa ki te puani tāfito. Koia, ko tatou fuli ʼe tou lava faiga ke fai te ʼu fono “i te fakapotopoto mo te fakatokatoka.”—1 Ko. 14:40.