‘Ke Tapuhā Te Huafa ʼo Te ʼAtua’
1. Koteā te kupu tāfito ʼo te polokalama ʼo te fakatahi fakasilikō ʼo te taʼu gāue 2012, pea koteā ʼaē ʼe fakatafito kiai?
1 ʼE ko te toe pilivilēsio lahi ia te fakahigoaʼi ʼo tātou ki te huafa ʼo te Tuʼi ʼo te ʼAtulaulau ʼaē ko Sehova! Ko te ʼAtua totonu ʼaē neʼe ina foaki ia tona huafa ke toʼo kiā tātou, tāfito talu mai te taʼu 1931, neʼe fakahigoaʼi tātou ʼaki tona huafa, ʼo tou liliu ai ko te Kau Fakamoʼoni ʼa Sehova. (Isa. 43:10) Ko Sesu, ko te ʼAlo ʼulu tokotahi ʼo te ʼAtua, neʼe ina fakamaʼuhigaʼi ia te huafa ʼo te ʼAtua, ʼo ina fakamuʼamuʼa ʼi tana faikole ʼaē neʼe ina akoʼi ki tana ʼu tisipulo. (Mat. 6:9) ʼE fakatafito ia te kupu tāfito ʼo te polokalama ʼo te fakatahi fakasilikō ʼo te taʼu gāue 2012, ki te ʼu palalau ʼa Sesu ʼaē “Ke Tapuhā Te Huafa ʼo Te ʼAtua.”
2. Koteā te ʼu logo ʼe tou fia atalitali ke tou fakalogo kiai?
2 Koteā ʼAē Kā Tou Fakalogo Anai Kiai: Ko te akonaki ʼo te Moeaki ʼaē ko tona kupu “Kotou Fakahā Ia Te Huafa ʼo Te ʼAtua Ohagē Ko He ʼu Kaugana ʼe Kau Ki Te Selevisi Temi Katoa” e fakahā ai pe koʼē ko te selevisi pioniē kātoa ʼe ko he faʼahiga maʼuli ʼe fakalotofiafia. E tou toe fakalogo anai ki he tahi akonaki “Kotou Tōkakaga Naʼa Kotou ʼUlihi Ia Te Huafa ʼo Sehova,” e ina tokoniʼi anai tātou ke ʼaua naʼa tou tō ki te ʼu hele e fā. Ko te akonaki ʼaē “He Koʼē ʼe Maʼua Ke Fakatapuhā Ia Te Huafa ʼo Te ʼAtua,” ʼe fai anai ʼi ai te ʼu tali ki te fehuʼi ʼaenī: peʼe Koteā ʼaē ʼe tokoni mai anai kiā tātou ke tou gāue mālohi ki te gāue fai fakamafola logolā te mole fia logo ʼa te hahaʼi? ʼo fēia mo te fehuʼi ʼaenī pe Koteā ʼaē kā tokoni mai anai kiā tātou ke ʼi ai he ʼuhiga ʼo tatatou gāue fakaminisitelio? ʼI te ʼAhotapu, ʼe tou fia fakalogo anai ki te akonaki ʼe koga fā, ʼe ina fakahā anai peʼe feafeaʼi hatatou fakatapuhā te huafa ʼo te ʼAtua ʼaki tatatou ʼu manatu, mo tatatou ʼu palalau, mo tatatou ʼu fakatuʼutuʼu, pea mo tatatou ʼu aga. Ko nātou aē ʼe foʼofoʼou ʼe natou fiafia anai ʼi te fakalogo ki te akonaki ʼaē ko tona kupu tāfito “ ʼE Fakatapuhā Anai e Sehova Ia Tona Huafa Lahi ʼi Halamaketone.”
3. Koteā ia te pilivilēsio ʼe tou maʼu, pea ʼe tokoni feafeaʼi mai anai ia te polokalama kiā tātou?
3 Kua vave ʼaupitō te fakatapuhā e Sehova ia tona huafa. (Esk. 36:23) ʼO ʼatalitali ki te ʼaho ʼaia, ʼe ko he pilivilēsio fakaofoofo hatatou lagolago ki te ʼu meʼa fuli ʼaē ʼe fakaʼuhiga ki te huafa māʼoniʼoni ʼo Sehova. ʼE tou falala ʼaupitō ko te polokalama ʼo te fakatahi fakasilikō, ʼe tokoni anai kiā tātou takitokotahi ke tou fakahoko fakalelei totatou ʼu maʼua ʼaē ʼe pipiki ki tatatou higoa ki te huafa ʼo te ʼAtua.