ʼE Feafeaʼi Hatatou Tokaga Ki ʼAtatou ʼu Tohi?

ʼE ko he fehuʼi maʼuhiga ke tou fai ʼo ʼuhiga mo te ʼu tohi ʼaē ʼe tou teuteuʼi ke tufa. Ko he tohi kua makanuminumi tona ʼu pāsina, kua ʼāfea, kua fakaʼaogaʼi peʼe kua mahae ʼe ina fakahā anai tatatou mole tokaga lelei ki tona fakatokatoka. Koia, ʼe feala anai ke fakalelu ki te hahaʼi hanatou fia logo ki te logo matalelei ʼo te maʼuli ʼaē ʼe maʼu i te ʼu tohi.

ʼE feafeaʼi hatatou tokaga lelei ki ʼatatou ʼu tohi? ʼI te teuteuʼi ʼo tanatou ʼu kato fai fakamafola, tokolahi ʼe natou ai fakatahi tanatou ʼu tohi gāue. Ohagē lā ʼi te loto kato fai fakamafola, ʼe ʼi ai he ʼaiʼaga ki te ʼu tohi, he tahi ʼaiʼaga ki te ʼu Tule Leʼo mo te ʼu kaupepa lalahi, pea mo he tahi atu ʼaiʼaga ki te ʼu kiʼi pepa lotu, ʼo toe fēia ki ʼihi atu ʼu faʼahiga tohi. ʼI te temi fuli pē ʼe natou toe fafaʼo ia te Tohi-Tapu pea mo ʼihi atu ʼu tohi ki tonatou ʼu ʼaiʼaga, ʼo natou tōkakaga fakalelei ke ʼaua naʼa makahaehae peʼe maumau. Ko ʼihi kau fai fakamafola ʼe natou taupau lelei tanatou ʼu tohi ki he ʼu tōsie peʼe ki he ʼu pepa palasitike ʼe maʼa. ʼI te ʼu faʼahiga teuteuʼi ʼaia ʼo ʼatatou ʼu kato, ʼe mole tou tuku ai ki he tahi ke ina maʼu he tupuʼaga ke palalau kovi ki totatou minisitelio, ʼi he tuku age ki ai he tohi kua maumau.—2 Ko. 6:3.