Te Tali Ki ʼAkotou ʼu Fehuʼi
◼ Ko ai ʼaē ʼe feala ke ina tohi te ʼu kiʼi pepa ʼaē ʼe maʼu ʼi tatatou ʼu nusipepa pea mo fai ni ʼu kole ʼi te Neti?
ʼE maʼu ʼi tatatou ʼu nusipepa te ʼu kiʼi pepa ʼe feala ke tohi ai e te hahaʼi ʼo natou momoli ki te filiale ia te ʼu fakaʼui tohi peʼe ko he ʼaʼahi ʼe fai age e te kau Fakamoʼoni ʼa Sehova. Pea tahi ʼaē, ʼe feala ke fakaʼaogaʼi totatou tuʼasila ʼi te Neti www.watchtower.org moʼo kole he ako Tohi-Tapu. Ko te ʼu fakatuʼutuʼu ʼaia, ʼe tokoni ki te tokolahi ke natou ako te moʼoni. Kae, neʼe tupu ai ia te ʼu fihifihia mai tona ʼaluʼaga ʼaē neʼe fakaʼaogaʼi e te kau fai fakamafola te ʼu fakatuʼutuʼu ʼaia moʼo foaki he tokoni fakalaumālie ki tanatou fāmili pea mo ʼihi atu.
Ko ʼihi neʼe natou meo, he neʼe momoli age te ʼu tohi e te filiale kae neʼe mole natou fakaʼui. ʼI tanatou manatu, ʼe fakakinauʼi tatatou kautahi, ʼo natou ʼui ʼe tou nofo mo he lisi ʼe tuʼu ai tonatou tuʼasila. Ko te kau fai fakamafola ʼaē neʼe kole age e te filiale ke natou ʼolo ʼo vakaʼi te hahaʼi kae neʼe mole natou kole ke ʼaʼahi nātou, neʼe lainoa ai te ʼu tehina mo tuagaʼane he neʼe ʼiʼita te hahaʼi ʼaia. Koia, ko te ʼu kole ʼaē ʼe fai ʼi totatou tuʼasila ʼi te Neti peʼe ʼi te ʼu kiʼi pepa, ʼe tonu ko te hahaʼi totonu pē ʼaē ʼe natou fai mo kapau ʼe natou loto kiai kae ʼe mole fai e te kau fai fakamafola. Koia, ko te kole ʼaē ʼe ʼiloʼi e te filiale neʼe haʼu mai he tehina peʼe tuagaʼane ke ʼaʼahi he tahi, ʼe mole ina fakahoko te kole ʼaia.
ʼE feafeaʼi koa hatatou foaki he tokoni fakalaumālie ki he kāiga peʼe ki he tahi ʼe tou feʼiloʼiʼaki? Kapau ʼe kotou fakaʼamu ke natou maʼu he tohi, he koʼē ʼe mole kotou momoli tonu ki ai? Kapau ʼe fia logo ki te moʼoni pea ʼe fakaʼamu ke ʼaʼahi ia ia e te kau Fakamoʼoni kae ʼe mole kotou ʼiloʼi peʼe feafeaʼi hakotou felōgoi mo te ʼu tagata ʼāfea ʼo te kōkelekāsio ʼi tona kolo, ʼe tonu ke kotou tohi ia te pepa Veuillez suivre lʼintérêt (S-43) ʼo foaki ki te sīkalaipe ʼo takotou kōkelekāsio, pea ʼe ina momoli leva te pepa ʼaia ki te filiale. Kae, kapau ʼe nofo ʼi te pilisoni, peʼe nofo ʼi te lōpitali, ʼe mole tonu ke kotou felōgoi mo te filiale. Kae, ʼe kotou fakalotomālohiʼi anai ia ia ke felōgoi mo te ʼu tehina ʼaē ʼe natou ʼomai ʼo ʼaʼahi te ʼu koga meʼa ʼaē ʼe nofo ai peʼe feala pē ia ke faitohi tonu ki te filiale.