Te Tali Ki ʼAkotou Fehuʼi
◼ ʼE tonu koa ki te kau faifakamafola ke natou fakaʼaogaʼi te Neti moʼo faifakamafola peʼe takitaki he ako Tohi-Tapu mo he ʼu hahaʼi ʼe maʼuʼuli ʼi he tahi fenua?
Ko ʼihi kau faifakamafola ʼe natou fakaʼaogaʼi te Neti ke natou maʼu ai ʼanatou ako Tohi-Tapu ʼi te ʼu fenua ʼae ʼe tapuʼi ai te gaue peʼe mole lahi ai he kau faifakamafola. ʼI ʼihi aluʼaga, neʼe ʼi ai ʼona fua lelei. Kaʼe, ʼe fakatupu tuʼutamaki moka fefaitohiʼaki ia te kau faifakamafola mo he ʼu hahaʼi ʼe mole natou feʼiloʼiʼaki ʼi te Neti. (Vakaʼi Te Minisitelio ʼo Te Puleʼaga ʼo Sulio 2007, p. 3.) Logo la ʼe tou fakatuʼutuʼu ke malave ki te loto ʼo te hahaʼi ia te logo ʼo te Puleʼaga, kaʼe ʼaki te fakaʼaogaʼi ʼo te ʼu faʼahi ʼaia ʼe feala ki he tehina peʼe ko he tuagaʼane ke felogoʼi mo he ʼu fakakaugā kovi, tafitō te kau aposeta. (1 Ko. 1:19-25; Kol. 2:8) Pea tahi, ʼe feala ki te kau takitaki ʼo te fenua ke natou leʼoleʼo ia te ʼu felogoʼi ʼae ʼe fai mo te hahaʼi ʼo te ʼu fenua ʼae ʼe tapuʼi ai te gaue ʼo te Puleʼaga. Pea ʼe feala ke fakatupu tuʼutamaki ki te ʼu tehina mo tuagaʼane ʼae ʼe maʼuʼuli ʼi te fenua ʼaia. Koia ʼae ʼe mole tonu ai ki te kau faifakamafola ke natou olo ki te Neti ʼo kumi ai te hahaʼi ʼo te tahi ʼu fenua moʼo vaevae ki ai te logo lelei.
Kapau ʼe tou felaveʼi mo he tahi ʼi te faifagonogono faigamalie ʼe haʼu mai he tahi fenua, ʼe mole tou faiga anai ke tou hoko atu te felogoʼi mo ia ʼi tana toe liliu ki tona fenua. Kaʼe ʼe feala ke tou fakaha ki ai pe ʼe feafeaʼi tana fakaʼaogaʼi ia te tuʼasila jw.org ke ina maʼu ai he tahi age ʼu fakamahino peʼe felogoʼi feafeaʼi anai mo te filiale ʼo te fenua. ʼE feala ke tou toe fakalotomalohiʼi ia ia ke alu ʼo ʼaʼahi he Fale Fono ʼe tuʼu ovi ki tona ʼapi. ʼE mahino ia, ʼe ʼi ai ʼihi fenua ʼe mole ʼi ai he Fale Fono. Kapau ʼe ina loto ke ʼaʼahi ia ia e he Fakamoʼoni ʼo tona fenua, ʼe tonu anai ke tou tohi ia te kiʼi pepa (S-43) Veuillez suivre lʼintérêt pea mo fakatoʼo age ki te sikalaipe ʼo te kokelekasio ke ina fakahu ki te jw.org ʼi te Neti maʼa te filiale. Pea ko te filiale ʼae ʼe tokaga ki te gaue ʼo te fenua ʼae ʼe maʼuli ai he tahi ʼe fia logo, ʼe ina iloʼi lelei age te ʼu aluʼaga ʼo te fenua ʼaia pea mo te tokoni fakalaumalie ʼae ʼe tonu ke foaki.—Vakaʼi Te Minisitelio ʼo Te Puleʼaga ʼo Sunio 2014, p. 5 pea mo Te Minisitelio ʼo Te Puleʼaga ʼo Novepeli 2011, p. 2.
Kapau ʼe tou lolotoga ʼaʼahi he tahi ʼe alu ki he tahi fenua peʼe tou lolotoga ako mo he tahi ʼe maʼuli ʼi he tahi fenua pea neʼe tou iloʼi ia ia ʼuhi ko te Neti, ʼe tonu anai ke tou mulimuli ki te ʼu tokoni ʼae ʼe tuʼu ʼi ʼoluga. Kaʼe, ʼe feala ke tou haga taupau tana fia logo ʼo kaku ki te hoki alu age ʼa he tehina peʼe ko he tuagaʼane ʼo te fenua ʼaia ʼo toe hoko atu. Pea kapau ʼe maʼuli he tahi ʼi he fenua ʼe tapuʼi ai tatatou gaue, ʼe tonu ke tou tokakaga moka tou palalau ki he ʼu manatu Fakatohi-tapu ʼi te telefoni, peʼe ʼi te Neti peʼe moka tou fefaitohiʼaki.—Mat. 10:16.