Tou Foimo Fai Te ʼu Ako ʼAe Neʼe Fakaui

Koteʼuhi kua fakaʼaogaʼi te ʼu fealagia foʼou ʼi tatatou tuʼasila ʼi te Neti, kua tokolahi te hahaʼi neʼe natou fakaui ke fai ni ʼanatou ako Tohi-Tapu. Ko ʼihi fakaui neʼe maʼu mai te ʼu fakatuʼutuʼu foʼou ki te faifakamafola ʼaki te laupapa. Pea ʼe faiga e te Petele ke foimo fai he ʼu fakatuʼutuʼu ki te ʼu fakaui ʼaia. Ohage la, kapau neʼe fai he fakaui ʼi te jw.org, hili pe ki ai ʼaho ʼe lua, ʼe foimo momoli e te filiale te fakaui ʼaia ki te kau tagata ʼafeā ʼo te telituale ʼae ʼe nofo ai. ʼE fakaha ʼi te tanaki gaue, ʼe atalitali lolotoga ni vahaʼa ia natou ʼae neʼe natou fakaui ke fai hanatou ako. ʼE tou lava tokoni feafeaʼi ki te hahaʼi ke hoko atu tanatou fia ako?—Maleko 4:14, 15.

Kapau ʼe fia logo ia he tahi kaʼe ʼe mole maʼuli ʼi tokotou telituale, pea kotou foimo tohi te kiʼi pepa Veuillez suivre lʼintérêt (S-43) pea kotou fakatoʼo ki te sikalaipe ʼo te kokelekasio ʼi te fono ʼae ka hoa mai. Hili ki ai te ʼaho ʼe tahi peʼe lua, ʼe tonu ke momoli e te sikalaipe ia te kiʼi pepa ʼaia ki te kokelekasio ʼae ʼe tokaga ki te telituale ʼaia peʼe ʼi te Neti ki te filiale. Pea kapau ʼe mole ina maʼu te Neti, ʼe ina momoli anai ohage ko tona fai mahani ʼi muʼa atu. ʼE tonu ke vakavakaʼi tuʼumaʼu e te kau tagata ʼafeā tatatou tuʼasila ʼi te Neti. Kapau ʼe natou maʼu he fakaui ʼa he tahi ʼe fia ako, pea ʼe tonu ke natou fakahoko fakavilivili te kole ʼaia. Ko he tehina peʼe ko he tuagaʼane ʼe lotolelei ke ina fai ia te ʼaʼahi ʼaia, ʼe tonu ke ina fakamuʼamuʼa te faʼahi ʼaia. Kaʼe kapau ʼe mole kotou maʼu te ʼaʼahi ki tona ʼapi, ʼe lagi feala ke kotou tuku he kiʼi moʼi pepa ʼe tohi ai tokotou higoa pea mo tokotou numelo telefoni.