Les Témoins de Jéhovah — la foi en action, 1re partie : la sortie des ténèbres
ʼI te Tohi-Tapu, ʼe fakatatau ia te mālama ki te moʼoni, kae ko te fakapōʼuli ʼe fakatatau ia ki te loi. (Pes. 43:3; Esa. 5:20) ʼI te temi ʼaē neʼe kākāʼi ai e Satana ia Eva, neʼe hū ai ia te fakapōʼuli ki te mālamanei. Koia leva, neʼe tō ia te mālamanei ki te fakapōʼuli mātolu. (Apk. 12:9) Ko te foʼi ʼata Les Témoins de Jéhovah — la foi en action, 1re partie : la sortie des ténèbres, ʼe ina fakamatala pe neʼe haʼu feafeaʼi ia te mālama fakalaumālie, logolā ia te fakapōʼuli ʼo te mālamanei. (Esa. 60:1, 2) ʼI te ʼosi sioʼi ʼo te foʼi ʼata, ʼe kotou lava tali anai ki te ʼu fehuʼi ʼaenī:
(1) Neʼe haʼu feafeaʼi ia te fakapōʼuli mātolu ʼi te ʼosi mate ʼa te kau ʼapositolo? (2) ʼI te kamata ʼo te ʼu taʼu 1100, koteā ʼaē neʼe tokoni ki te hahaʼi ke natou mahino ʼe mole akoʼi e te ʼu ʼēkelesia ia te moʼoni? (3) Koteā ʼaē ʼe tonu ke tou ʼiloʼi ʼo ʼuhiga mo Henry Grew pea mo George Storrs? (4) Koteā te ʼu meʼa ʼaē neʼe hoko ʼi te maʼuli ʼo Charles Russell ʼaē neʼe malave ʼaupitō kiā ia? (5) Neʼe taki feafeaʼi e te Tehina Russell, pea mo tana matuʼa, pea mo ʼihi kaumeʼa, ia tanatou ako Tohi-Tapu? Pea koteā te ʼu manatu ʼaē neʼe natou mahino kiai ʼi te Tohi-Tapu? (6) Neʼe hoko feafeaʼi ia te fakatahi ʼa te kūtuga ako Tohi-Tapu ʼaia mo te kūtuga ʼa Nelson Barbour, kae koteā te tupuʼaga ʼaē neʼe mavae ai ia te Tehina Russell? (7) Koteā ʼaē neʼe hoko ʼi Sūlio 1879 ʼaē neʼe kamata ai ia te ʼaluʼaga foʼou ʼo te mālama fakalaumālie? (8) ʼOsi ʼaia, koteā ʼaē neʼe fai e te kau Ako Tohi-Tapu ʼaē kua kaugamālie, moʼo tala ia te logo lelei? (9) ʼI ni taʼu ki muʼa atu ʼi te 1914, koteā ʼaē neʼe ʼamanaki e te kau Ako Tohi-Tapu ke hoko ʼi te taʼu ʼaia? (10) Koteā te ʼu fihifihia ʼaē neʼe tauʼi e te kau Ako Tohi-Tapu ʼi te ʼosi mate ʼo te Tehina Russell? (11) ʼI te ʼosi mavae mai ʼi te pilisoni ia te Tehina Rutherford pea mo tona ʼu kaugā gāue, koteā ʼaē neʼe fai e te kau Ako Tohi-Tapu? (12) ʼI takotou sioʼi ia te foʼi ʼata, neʼe fakatuputupu feafeaʼi ia tokotou loto fakafetaʼi ki te kautahi ʼa Sehova? (13) Neʼe fakalotomālohiʼi feafeaʼi koa ia te foʼi ʼata ki ʼakotou faiga ʼaē ke hoholo atu takotou faʼafai ʼi te fai fakamafola, logolā ia te ʼu fihifihia? (14) ʼE feafeaʼi anai hatatou fakaʼaogaʼi ia te foʼi ʼata ʼaenī moʼo tokoni ki ʼotatou fāmili, ki ʼatatou ako Tohi-Tapu, pea mo ʼihi atu?
Neʼe tuku mai e te kau ʼuluaki Ako Tohi-Tapu ia he tofiʼa fakalaumālie ʼe maʼuhiga kiā tātou! Neʼe ko he ʼu hahaʼi ʼe lototoʼa pea mo faʼafai ʼi te ʼave ʼo te mālama fakalaumālie, ʼi he mālama ʼe fakapōʼuli fakalaumālie. ʼE feala koa hatatou mulimuli ki tanatou faʼifaʼitaki pea mo “haele o hage ko ni fanau o te malama”?—Efe. 5:8.