Les Témoins de Jéhovah — la foi en action, 2e partie : que brille la lumière !
ʼI te ʼosi mavae mai ʼi te pilisoni ia te Tehina Rutherford pea mo tana ʼu kaugā gāue ʼi te taʼu 1919, neʼe ko te toe gāue maʼuhiga ʼaē ʼe ʼamanaki fakahoko e te kau Ako Tohi-Tapu. Ohagē ko tona fakahā ʼi te foʼi ʼata Les Témoins de Jéhovah — la foi en action, 2e partie : que brille la lumière !, tokolahi te hahaʼi ʼe fakafeagai anai ki te kau Ako Tohi-Tapu. ʼE haga tuputupu anai ia tanatou mahino ʼaē ki te ʼu vaega Fakatohi-tapu, pea ʼe fakamaʼa pea mo māsila ai anai tanatou tui. (Taag. 4:18; Mala. 3:1-3; Soa. 15:20) ʼI te ʼosi sioʼi ʼo te foʼi ʼata, ʼe kotou lava tali anai ki te ʼu fehuʼi ʼaenī:
(1) Koteā te ʼu faʼahiga fai fakamafola ʼaē neʼe fai e te kau Ako Tohi-Tapu moʼo tala ia te logo lelei? (2) Koteā ʼaē neʼe tala ʼi te ʼu fakatahi makehe ʼi te taʼu 1931 pea mo te taʼu 1935? (3) Koteā te manatu maʼuhiga ʼaē neʼe fakamahino ʼi Te Tule Leʼo ʼaho 1 ʼo Novepeli 1939? (4) Kotou fakamatala koteā ʼaē neʼe hoko ʼi Madison Square Garden lolotoga ia te akonaki ʼa te Tehina Rutherford ʼaē ko tona kupu tāfito “Te Puleʼaga Mo Te Tokalelei.” (5) He koʼē neʼe lelei ʼaupitō ia te ʼakonaki ʼaē neʼe fai e te Tehina Knorr ʼaē ko tona kupu tāfito “ ʼE Tologa Anai Koa Te Tokalelei ʼo ʼApogipogi?” (6) ʼI te taʼu 1942, koteā te ʼu fakatuʼutuʼu ʼaē neʼe fai e te kau Fakamoʼoni ʼa Sehova ke lahi age ia tanatou gāue fai fakamafola? (7) Kotou fakamatala te ʼu fihi ʼaē neʼe hoko ʼi te ʼu telepinale ʼi Amelika, ʼi Kanata pea mo ʼi Keleka. (8) Koteā te ʼu fua ʼo te ako ʼo Kileate ki te tuputupu ʼo te gāue fai fakamafola? (9) Koteā te gāue maʼuhiga ʼaē neʼe fai ʼi te taʼu 1946, pea koteā tona tupuʼaga? (10) Koteā te ʼu fetogi lelei neʼe fai e te kau Fakamoʼoni ʼa Sehova ke ʼalutahi tonatou maʼuli mo te ʼu lēkula Fakatohi-tapu? (11) Kotou fakamahino ni ʼu fetogi neʼe fai e te kautahi ʼi te taʼu 1970 moʼo mulimuli lelei ki te kautahi ʼi te ʼuluaki sēkulō ʼaē ʼe tuʼu ʼi te Tohi-Tapu. (12) ʼI takotou sioʼi ia te foʼi ʼata, ʼe tuputupu feafeaʼi tokotou loto fakafetaʼi ʼi takotou mahino lelei ʼaē ko Sehova ʼe tokaga kiā meʼa fuli pē, pea mo takotou mahino lelei aē ʼe ko tana kautahi ʼaia? (13) Neʼe fakalotomālohiʼi feafeaʼi koa ia te foʼi ʼata ki ʼakotou faiga ʼaē ke hoholo atu takotou faʼafai ʼi te fai fakamafola, logolā ia te ʼu fihifihia? (14) ʼE feafeaʼi anai hatatou fakaʼaogaʼi ia te foʼi ʼata ʼaenī moʼo tokoni ki ʼotatou fāmili, ki ʼatatou ako Tohi-Tapu, pea mo ʼihi atu?
ʼI te ʼaho fuli pe, ʼe hoko he ʼu ʼaluʼaga foʼou ʼi te hisitolia ʼo te kau Fakamoʼoni ʼa Sehova. Koteā ʼaē ʼe fakahā mai anai e te tānaki gāue ʼo ʼuhiga mo ʼatatou faiga ʼi te minisitelio? Ohagē ko te faʼafai ʼotatou tehina ʼi te temi muʼa, ʼe tou fakaʼamu ke tou haga ai ʼo faʼafai “ke mu te malama”!—2 Ko. 4:6.