He Faʼifaʼitaki ʼo He ʼu ʼUluaki Palalau

Moʼo Kamata He ʼu Ako Tohi-Tapu ʼi Te ʼUluaki Moeaki ʼo Sūnio

“Kiā koe lā, ko te lotu ʼe ina uga koa ia te hahaʼi ki te ʼofa pea mo te tokalelei, peʼe ʼe ina uga ia te hahaʼi ki te aga kovi pea mo te agamālohi? [Tuku ke fai mai hana tali.] ʼE au fia fakahā atu he manatu maʼuhiga ʼo ʼuhiga mo te faʼahi ʼaia.” Kotou tuku age Te Tule Leʼo ʼo te ʼaho 1 ʼo Sūnio, pea kotou vakaʼi fakatahi ia te manatu ʼaē ʼi te ʼuluaki kupu taki ʼi te pāsina 26 pea mo kotou lau age he vaega Fakatohi-tapu ʼe tuʼu ʼi ai. Kotou tuku age te ʼu nusipepa, pea mo kotou fakatuʼutuʼu ke kotou toe liliu age ke kotou vakaʼi fakatahi ia te tali ki te fehuʼi ʼaē ʼe hoa mai kiai.

Te Tule Leʼo ʼaho 1 ʼo Sūnio

“Ko ʼihi ʼe natou leleʼia mokā ʼe kau ia te kau takitaki lotu ki te politike, kae ko ʼihi ʼe mole natou faʼa leleiʼia ia te faʼahi ʼaia. Kotēa lā tau manatu? [Tuku ke fai hana tali.] ʼE au fia lau atu ia te meʼa ʼaē neʼe fai e Sesu ʼi te ʼaho ʼaē neʼe loto e te hahaʼi ke kau ki te politike. [Lau ia Soane 6:15.] ʼE fakamahino mai ia te nusipepa ʼaenī pe koʼe neʼe fai e Sesu ia te faʼahi ʼaia, pea e fakahā ai ia te ʼu gāue ʼaē ʼe lelei age ke fai e te kau Kilisitiano moʼo tokoni ki te hahaʼi.”

Réveillez-vous! ʼo Sūnio

“ ʼI te taʼu fuli, ko te lauʼi miliona hahaʼi ʼe natou mahahaki ʼuhi pē ko te mole faʼa lelei ʼo te meʼa kai. ʼI tau manatu lā, neʼe fai koa he ʼu puleʼaki moʼo puipui te ʼu meʼa kai ʼi totatou kolo? [Tuku ke fai hana tali.] Ko te nusipepa ʼaenī, ʼe ina fakamahino mai ia te ʼu ʼaluʼaga e fā ʼe feala ai ke tou fai he ʼu puleʼaki ke hao ai totatou fāmili mai te ʼu mahaki ʼaē ʼe tou maʼu mai te ʼu meʼa kai. Pea ʼe toe fakapapau mai ʼi te Tohi-Tapu ʼo ʼuhiga mo te fiafia ʼaē kā tou maʼu anai mai te mahu ʼo te ʼu meʼa kai lelei.” Lau ia Pesalemo 104:14, 15.