Te ʼu Tupuʼaga e Hogofulu-Mā-Lua Moʼo Fai Fakamafola

He koʼē koa ʼe tonu ke tou fai fakamafola pea mo akoʼi ia te logo lelei ki te hahaʼi? ʼE tou fai tāfito koa moʼo tokoni ki te hahaʼi fakamālotoloto ke nātou haʼele ʼi te ala ʼo te maʼuli? (Mat. 7:14) Ko te ʼuluaki tupuʼaga ʼaia ʼaē ʼe tuʼu ʼi te lisi ʼaenī ʼi lalo, kae ʼe mole ko te tupuʼaga tāfito. Maʼa kotou lā, ʼi te ʼu tupuʼaga ʼaenī e 12, ko te tupuʼaga fea ʼaē ʼe maʼuhiga age ke tou kau ki te minisitelio?

1. ʼE ina haofaki te hahaʼi.—Soa. 17:3.

2. ʼE ina fakatokaga ki te tagata agakovi. —Esk. 3:18, 19.

3. ʼE ina fakahoko ia te lea fakapolofetā.—Mat. 24:14.

4. ʼE ina fakahā ia te faitotonu ʼa te ʼAtua. ʼE mole feala ke tukugākoviʼi ia Sehova ʼi tana fakaʼauha ia te tagata agakovi koteʼuhi neʼe ina tuku age ia te fealagia ʼaē ke fakahemala.—Gaue 17:30, 31; 1 Tim. 2:3, 4.

5. ʼE ina fakafealagia ke tou fakahoko totatou maʼua ʼaē ke tou tokoni fakalaumālie ki te hahaʼi, ʼaē neʼe totogi ʼaki te taʼataʼa ʼo Sesu.—Loma 1:14, 15.

6. ʼE ina fakafealagia ke tou maʼa mai te toto ʼo te hahaʼi.—Gaue 20:26, 27.

7. ʼE ko he fakamaʼua ki totatou haofaki.—Esk. 3:19; Loma 10:9, 10.

8. ʼE ina fakahā totatou ʼofa ki te tagata fuli pe.—Mat. 22:39.

9. ʼE ina fakahā tatatou fakalogo ʼaē kiā Sehova mo tona ʼAlo.—Mat. 28:19, 20.

10. ʼE kau ki tatatou tauhi ki te ʼAtua.—Hep. 13:15.

11. ʼE ina fakahā totatou ʼofa aē ki te ʼAtua. —1 Soa. 5:3.

12. ʼE lagolago ki te fakatapuhā ʼo te huafa ʼo te ʼAtua.—Esa. 43:10-12; Mat. 6:9.

ʼE moʼoni ia, ʼe mole ko te ʼu tupuʼaga pē ʼaenī ʼaē ʼe tou kau ai ki te minisitelio. Ohagē lā, ko te fai fakamafola ʼe ina fakalotomālohiʼi tatatou tui pea ʼe ina toe foaki mai ia te pilivilēsio ʼaē ke tou kaugā gāue mo te ʼAtua. (1 Ko. 3:9) Kae, ko te tupuʼaga tāfito ʼaē ke tou kau ki te minisitelio, ʼe ko te tupuʼaga 12. Peʼe tali e te hahaʼi ia te logo lelei peʼe kailoa, ko te minisitelio ʼe ina lagolago ki te fakatapuhā ʼo te huafa ʼo Sehova, pea ʼe ina fakafealagia kiā Sehova te tali kiā ia ʼaē ʼe fakafihi age. (Taag. 27:11) ʼE mahino papau ia, ʼe lahi te ʼu tupuʼaga maʼuhiga ke tou haga akoʼi ia te hahaʼi pea mo tou haga tala ia te logo lelei.—Gaue 5:42.