He Faʼifaʼitaki ʼo He ʼu ʼUluaki Palalau
Moʼo Kamata He ʼu Ako Tohi-Tapu ʼi Te ʼUluaki Moeaki ʼo Sulio
“ ʼE tou laka hala fuli. Neʼe kua kotou feʼekeʼaki koa pe ʼe feala ki te ʼAtua ke ina fakamolemole ia te ʼu agahala ʼae ʼe mamafa?” [Tuku ke fai mai hana tali.] Fakaha age ia te alatike ʼi te pasina 11 ʼo Te Tule Leʼo ʼo Sulio–Sepetepeli, mo vakaʼi ia te palakalafe ʼo te ʼuluaki fehuʼi pea mo lau age ia he vaega ʼe tuʼu ai. Kotou tuku age ki ai te ʼu nusipepa pea mo fai he fakatuʼutuʼu ke kotou toe liliu ʼo vakaʼi fakatahi mo ia te tali ki te fehuʼi ʼae ʼe hoa mai ki ai.
Nota: ʼE tonu ke fai ia te faʼifaʼitaki ʼaeni lolotoga te fono gaue ʼi te ʼaho 6 ʼo Sulio.
Ko Te Tule Leʼo Sulio–Sepetepeli
“ ʼE au fia iloʼi pe kotea tau manatu ʼo ʼuhiga mo te vaega Tohi-Tapu ʼaeni. [Lau age ia 1 Soane 4:8.] Tokolahi ʼe natou fakamoʼoni ki te ʼu palalau ʼaia, kaʼe ko ʼihi ʼe natou manatu ʼe agakovi te ʼAtua, ʼuhi ko tana fakahoko peʼe ko tana tuku ʼae ke hoko ia te ʼu tuʼutamaki fakanatula. Kotea la tau manatu? [Tuku ke fai mai hana tali.] ʼE ke maʼu anai ʼi te nusipepa ʼaeni ia te ʼu tupuʼaga ʼo te mole tonu ʼae ke tou manatu ʼe agakovi ia te ʼAtua.”
Réveillez-vous ! ʼo Sulio
“ ʼE matou ʼaʼahi te hahaʼi ʼo tokotou kolo moʼo talanoa ʼo ʼuhiga mo he aluʼaga ʼe fakatupu hoha ki te hahaʼi, ʼae ko te heʼe faitotonu. Ko ʼihi hahaʼi ʼe natou faigaʼi ke natou tauʼi te ʼu ʼaluʼaga ʼaia ʼaki tanatou ʼolo ʼo laka moʼo fakaha tonatou ita. ʼI tau manatu la, ʼe feala ke hoko he ʼu fetogi ʼaki te ʼu faʼahiga fai ʼaia? [Tuku ke fai mai hana tali.] Ke ke tokagaʼi, ʼe ui ʼi te Tohi-Tapu pe ʼe kotea ʼae ka ina fakahoko moʼoni anai ia te ʼu fetogi ʼi te kele. [Lau age ia Mateo 6:9, 10.] ʼE fakaha ʼi te nusipepa aeni pe ʼe ko he puleʼaki lelei koa ia te ʼu faʼahiga laka ʼaia?”
Te ʼu Logo Lelei Mai Te ʼAtua
“ ʼE matou ʼaʼahi te hahaʼi moʼo vaevae mo natou he ʼu manatu fakalotomalohi mai te Tohi-Tapu. Tokolahi ʼae neʼe matou palalau mo natou neʼe natou feʼekeʼaki pe ko ʼe ʼe fakagafua ʼe he ʼAtua ʼofa ke hoko he ʼu mamahi feia ki te hahaʼi ʼi te malamanei. ʼI tau manatu la, neʼe kau koa te mamahi ki te ʼuluaki fakatuʼutuʼu ʼa te ʼAtua ʼo ʼuhiga mo te kele?” Tuku ke fai mai hana tali. Fakaha age ia te ako 5, pea lau mo talanoa ki te ʼu ʼuluaki palakalafe ʼe lua pea mo te ʼu vaega Tohi-Tapu ʼae ʼe tohi fakafalele. Tuku age ia te kaupepa lahi, pea mo fai he fakatuʼutuʼu ke kotou toe liliu ʼo vakaʼi fakatahi mo ia te tali ki te fehuʼi ʼae ʼe tohi fakamatolu ʼae ʼe hoa mai ki ai.