He Faʼifaʼitaki ʼo He ʼu ʼUluaki Palalau

Moʼo Kamata He ʼu Ako Tohi-Tapu ʼi Te ʼUluaki Moeaki ʼo Oketopeli

“ ʼE teitei pe ko te hahaʼi fuli ʼae ʼe faikole. Maʼia mo natou ʼae ʼe mole tui ki te ʼAtua, ʼe natou faikole ʼi te ʼu temi faigataʼa. ʼI tau manatu la, ʼe fagono koa te ʼAtua ki te ʼu faikole fuli?” Tuku ke fai mai hana tali. ʼOsi ʼaia, fakaha age te pasina fakaʼosi ʼo Te Tule Leʼo ʼo Oketopeli–Tesepeli, pea mo vakaʼi fakatahi mo ia te palakalafe ʼae ʼe hoa mai ki te ʼuluaki fehuʼi pea mo he vaega Tohi-Tapu ʼi te ʼu vaega ʼae ʼe tohi ai. Kotou tuku age ki ai te ʼu nusipepa, pea mo fai he fakatuʼutuʼu ke kotou toe liliu moʼo vakaʼi fakatahi mo ia te fehuʼi ʼae ʼe hoa mai ki ai.

Ko Te Tule Leʼo Oketopeli–Tesepeli

“Neʼe matou tokagaʼi tokolahi te hahaʼi ʼe natou tuʼania ʼi te kua tuputupu ʼo te ʼu ʼata kovi. Kaʼe ʼe manatu ʼihi ko te ʼu ʼata kovi ʼe mole kovi ia. Kotea la tau manatu? [Tuku ke fai mai hana tali.] Neʼe ui e Sesu ʼe feala hatatou iloʼi pe ʼe lelei he faʼahi ʼi ʼona fua. [Lau ia Mateo 7:17.] ʼE fakaha ʼi te nusipepa ʼaeni te ʼu fua ʼo te ʼu ʼata kovi. ʼE toe tuku mai ʼi ai ni tokoni moʼo taʼofi te sioʼi ʼo te ʼu ʼata kovi.”

Réveillez-vous! ʼo Oketopeli

“ ʼE au fia iloʼi pe kotea la tau manatu ʼo ʼuhiga mo te fehuʼi ʼaeni: ʼE feala koa ke kita maʼuli fakafeauga mo kapau la ʼe kita masiva? [Tuku ke fai mai hana tali.] Ke ke tokagaʼi pe ʼe kotea ʼae ʼe ui ʼi te Tohi-Tapu. [Lau ia 1 Timoteo 6:8.] ʼE fakaha ʼi te nusipepa ʼaeni he manatu fakapotopoto ʼo ʼuhiga mo te ʼu koloa pea mo vakaʼi ʼi ai te ʼu faʼahi maʼuhiga ʼe tolu ʼe mole feala ke tou totogi ʼaki te paʼaga.”