He Faʼifaʼitaki ʼo He ʼu ʼUluaki Palalau

Moʼo Kamata He ʼu Ako Tohi-Tapu ʼi Te ʼUluaki Moeaki ʼo Maio

“Tokolahi ʼe natou tahi maʼu tanatou manatu ʼo ʼuhiga mo te ʼAtua. Ko ʼihi ʼe natou manatu ʼe mole feala ke tou iloʼi ia te ʼAtua. Pea ko ʼihi ʼe natou manatu ʼe ko he Tamai ʼofa ʼe nofo ʼi te lagi. Kaʼe ʼe feafeaʼi la kia koe?” Tuku ke fai mai hana tali. Fakaha age ia te pasina 8 ʼo Te Tule Leʼo ʼo Apelili–Sunio, pea kotou vakaʼi fakatahi te ʼu palakalafe ʼae ʼe tuʼu ʼi te ʼuluaki fehuʼi pea mo he vaega Tohi-Tapu ʼi te ʼu vaega ʼae ʼe tohi ai. Kotou tuku age ki ai te ʼu nusipepa, pea mo fai he fakatuʼutuʼu ke kotou toe liliu moʼo vakaʼi fakatahi mo ia te fehuʼi ʼae ʼe hoa mai ki ai.

Ko Te Tule Leʼo Apelili–Sunio

“ʼE ma ʼaʼahi te hahaʼi moʼo talanoa ki he aluʼaga faigataʼa ʼe tou tau fuli mo ia, ko te mate ʼae ʼo he tahi neʼe tou ʼofa mamahi ai. ʼE mahino ia ʼe ko he aluʼaga ʼe fakatupu lotomamahi ʼaupito. Kotea la tau manatu? [Tuku ke fai mai hana tali.] Tokolahi neʼe natou maʼu he fakalotofimalie ʼi tanatou lau ia te vaega ʼaeni. [Lau ia Esaia 25:8.] ʼE ke maʼu anai ʼi te nusipepa ʼaeni te fakapapau ʼe fai ʼi te Tohi-Tapu, ʼe gata anai te mate pea ʼe toe fakatuʼuake anai ia te kau mate.” Fakaha age ia te ʼu alatike ʼae ʼe kamata ʼi te pasina 9.

Réveillez-vous! Maio

“ʼE ma ʼaʼahi te hahaʼi moʼo tokoni kia natou ke natou lava tauʼi tanatou hoha fau. Neʼe ke tokagaʼi koa la te lahi ʼo te hoha ʼa te hahaʼi ʼi te temi nei, ʼo mole tatau mo te temi muʼa? [Tuku ke fai mai hana tali.] Tokolahi neʼe natou tokagaʼi te lelei ʼo te ʼu tokoni ʼae ʼi te Tohi-Tapu moʼo tauʼi tanatou hoha fau. Ohage la ko te tokoni ʼaeni. [Lau ia Mateo 6:34.] ʼE fakamahino ʼi te nusipepa ʼaeni pe ʼe tou lava tauʼi feafeaʼi te ʼu aluʼaga fakatupu hoha ʼe fa, ʼaki ia te ʼu pelesepeto Fakatohi-tapu.”

Nota: ʼE ʼaoga tafitō te nusipepa ʼaeni ki te hahaʼi gaue pilo.