He Faʼifaʼitaki ʼo He ʼu ʼUluaki Palalau

Moʼo Kamata He ʼu Ako Tohi-Tapu ʼi Te ʼUluaki Moeaki ʼo Fepualio

“Neʼe fakapapau e Sesu ʼe toe liliu mai anai pea ʼe tokolahi te hahaʼi ʼe natou tui ki ai. Kotea la tau manatu?” Tuku ke fai mai hana tali. “Pea ʼe lagi tou feʼekeʼaki peʼe toe liliu mai anai koa Sesu ʼaki he sino kakano. ʼE feala ke ke tokagaʼi te tali ki te fehuʼi ʼaia ʼi te nusipepa ʼaeni.” Fakaha age ia te tuʼa pasina ʼo Te Tule Leʼo ʼo Sanualio–Malesio, pea vakaʼi fakatahi mo ia te lua palakalafe. Kotou tuku age ki ai te ʼu nusipepa pea mo fai he fakatuʼutuʼu ke kotou toe liliu ʼo vakaʼi fakatahi mo ia te tali ki te fehuʼi ʼae ʼe hoa mai ki ai.

Ko Te Tule Leʼo Sanualio–Malesio

“Tokolahi te hahaʼi ʼe natou tui ʼe tauteaʼi e te ʼAtua te kau agahala ʼi te ʼIfeli, hili tanatou mamate, pea ʼe fakamamahiʼi ai natou ʼo talu ai. Kaʼe ʼe feala ke ke tokagaʼi ia te ʼu palalau ʼaeni ʼe fai ʼi te Tohi-Tapu ʼo ʼuhiga mo te ʼofa ʼo te ʼAtua. [Lau ia 1 Soane 4:8.] ʼI tau manatu la, ʼe feala koa ki he ʼAtua ʼofa ke ina fakamamahiʼi te hahaʼi ʼo talu ai? [Tuku ke fai mai hana tali.] ʼE mahino mai, ko te ʼIfeli ʼe ko he loi ʼe tupu ai te manatu ʼa te hahaʼi ko te ʼAtua ʼe agakovi. [Fakaha age te pasina 6 ʼo te nusipepa.] ʼE talanoa ʼi te nusipepa ʼaeni ki te tahi ʼu loi neʼe fai ʼo ʼuhiga mo te ʼAtua. ʼE au fiafia anai ʼi taku tuku atu ia te nusipepa ʼaeni.”

Réveillez-vous! Fepualio

“ ʼE ma fia faipalalau pe mo koe ʼo ʼuhiga mo he fihifihia ʼe tou tau fuli mo ia, ʼae ko te mole maʼu ʼo he temi feʼauga moʼo fakahoko ʼatatou gaue fuli. ʼI tau manatu la, ʼe tou maʼumaʼua la ʼuhi heʼe lahi ʼatatou gaue peʼe ʼuhi heʼe lahi tatatou puli temi? [Tuku ke fai mai hana tali.] Tokolahi ʼe mole natou iloʼi ʼe foaki mai ʼi te Tohi-Tapu he ʼu tokoni moʼo fakatuʼutuʼu lelei totatou temi, ohage la ko te tokoni ʼaeni. [Lau age ia Filipe 1:10.] ʼE fakamaʼuhigaʼi ʼi te nusipepa ʼaeni ia tokoni ʼe fa neʼe feala ai ki te hahaʼi tokolahi ke natou fakatuʼutuʼu lelei tonatou temi.”