Te ʼu Fakamatala

◼ ʼOsitalalia: Ko John, te tagata maʼu pepa lelei, ʼi tana kei veliveli neʼe alu ʼo misa, kaʼe neʼe mole kei tui leva ia ki te ʼAtua. Ko te pionie neʼe ina tuku age te kaupepa lahi La vie a-t-elle été créée ? pea ʼi tana toe ʼaʼahi ia John, neʼe ina tuku age te kaupepa lahi Origine de la vie. Neʼe hoko atu te ʼaʼahi ʼo ia e te pionie ʼo ina tuku age te ʼu nusipepa fakamuli pea mo ina fakaha age he ʼu alatike ʼo ʼuhiga mo te fakatupu peʼe ko te ʼu lea fakapolofeta. Neʼe tokagaʼi ai e te pionie kua feala leva ke ina foaki age ia te tohi La Bible : Parole de Dieu ou des hommes ? ʼI te ʼosi lau e John ia te tohi ʼaia, neʼe ina ui kua kamata tui veliveli pe ki te ʼAtua. Neʼe foaki age leva e te pionie ia te tohi Te Ako Mai Te Tohi-Tapu, ʼo ina fakaha age kia John te palakalafe 8 ʼi te pasina 20 pea mo te ʼu palakalafe 13-16 ʼi te ʼu pasina 23-24. Neʼe punamaʼuli ia John ʼi tana lau te ʼu vaega Tohi-Tapu ʼe tuʼu ai, pea neʼe ina ui fenei ai: “ ʼE lagi tonu nei ke au lau te Tohi-Tapu.”

◼ Mexique: Neʼe ui age e te tagata ki te tehina ʼe mole tui ko te Tohi-Tapu ʼe haʼu mai te ʼAtua. Neʼe kole age e te tehina ki te tagata pe feala la ke ina fakaha age he fakamoʼoni ʼe haʼu ia te Tohi-Tapu mai te ʼAtua. Hili tanā faipalalau tuʼa lahi, neʼe kamata malave ki te loto ʼo te tagata te ʼu meʼa ʼae neʼe ina ako ʼi te Tohi-Tapu. Neʼe malave ʼaupito kia ia te ʼu tokoni fakaʼatua ʼae ʼe tuʼu ai. Neʼe ina ui fenei ki te tehina: “ ʼI te kamata, ʼi tatā lau te Tohi-Tapu, neʼe hage kia au ʼe tatau mo te ʼu tokoni ʼae ʼe tuʼu ʼi te tahi age tohi pea neʼe mole malave kia au. Kaʼe ʼi te temi nei, ka ta lau te Tohi-Tapu, pea ʼe malave ki toku loto, tafitō la te ʼu tokoni ʼo ʼuhiga mo te aga ʼae ʼe tonu ke fai.”

◼ Amelika: ʼI tanā kau ki te faifakamafola makehe ʼi te kolo lahi, neʼe felaveʼi te taumatuʼa mo he fafine mai Taïwan neʼe tui ki te ʼAtua kaʼe neʼe manatu ia neʼe tohi pe ia te Tohi-Tapu maʼa te kau papalagi. Neʼe haʼu te fafine ʼo vakaʼi te laupapa ʼae neʼe fakahaha ai ʼanā tohi, ʼuhi he neʼe mole kei ina iloʼi he meʼa ke ina fai logo la te fimalie ʼo tona maʼuli. Neʼe fakaʼamu ʼe tokoni age anai te Tohi-Tapu ke ina maʼu he fakatuʼutuʼu ʼi tona maʼuli. Neʼe kamata ako ia te taumatuʼa mo ia ʼi te tohi Te Ako Mai Te Tohi-Tapu pea mo te kaupepa lahi La paix et le bonheur durables : comment les trouver. Neʼe mole natou ako te kapite 2 ʼo te tohi, kaʼe natou vakaʼi te faʼahi ʼo te kaupepa lahi ko tona kupu tafitō “Un guide bénéfique pour tous les humains.” ʼI tanatou ʼosi vakaʼi te ʼu ʼuluaki palakalafe ʼe 6 ʼo te faʼahi ʼaia, neʼe fakaha age e te fafine ia tana punamaʼuli ʼae ki te kehekehe ʼo te Tohi-Tapu mo te tahi age ʼu tohi lotu. ʼI tana ʼosi ako ia te ʼu lea fakapolofeta ʼae kua fakahoko, neʼe ina ui fenei: “Kia au, ʼe mole he tahi age tohi ʼe totonu ai te ʼu manatu ohage ko te Tohi-Tapu!”

◼ Saponia: Neʼe ui age e te tagata ki te tehina ʼe mole tui ʼe ʼi ai te ʼAtua. Neʼe hoko atu e te tehina tana ʼaʼahi te tagata, ʼo ina fakaha age te ʼu alatike ʼi te Réveillez-vous ! ʼae ko tona kupu tafitō: “Hasard ou conception ?” Mamalie pe neʼe fetogi e te tagata tana manatu pea ina kamata ui ʼe lagi ʼi ai he Tupuʼaga. ʼI te temi leva ʼaeni, kua tui ʼe ʼi ai te ʼAtua, pea ʼe fai nei e te tehina tana ako ʼi te kaupepa lahi Te ʼu Logo Lelei Mai Te ʼAtua.

◼ Kanata: Neʼe tuku e te tuagaʼane ia te ʼu nusipepa ki he fafine neʼe mavae mai tona ʼapi ʼo alu ki tana motoka. ʼI te ʼaʼahi e te tuagaʼane ia te fafine ʼaia, neʼe ui fakalelei age e te fafine ʼe mole fia logo ia pea ʼe mole tui ia ki te ʼAtua. Neʼe mole lotovaivai ai te tuagaʼane kaʼe neʼe ina fakatuʼutuʼu ke ina foaki age ki te fafine te kaupepa lahi Une vie pleinement satisfaisante : comment ? ʼI te maʼu atu e te tuagaʼane ia te fafine ʼi tona ʼapi, neʼe ina ui age ʼe ina iloʼi pe ʼe mole tui ia ki te ʼAtua, kaʼe neʼe ina manatuʼi ia ia he neʼe ina iloʼi ʼe ina taupau tokotahi ʼana toe. Neʼe fakaha age e te tuagaʼane ia te palakalafe 6 ʼi te pasina 4 ʼo te kaupepa lahi, ʼae ʼe talanoa ai pe tou lava maʼu ʼi fea ia he ʼu tokoni lelei. Pea neʼe ina fakalotomalohiʼi te fafine ke ina lau te ʼu tokoni ʼi te ako 2 ʼo ʼuhiga mo te pusiaki ʼo te fanau. Neʼe fiafia lahi te fafine ʼi tana toʼo te kaupepa lahi ʼaia.