He Faʼifaʼitaki ʼo He ʼu ʼUluaki Palalau

Moʼo Kamata He ʼu Ako Tohi-Tapu ʼi Te ʼUluaki Moeaki ʼo Sanualio

“Tokolahi te hahaʼi ʼe natou fakaʼamu ke toe liliu mai ia Sesu. Ka toe liliu mai ia Sesu, kotea la he meʼa ʼe ke loto ke ina fakahoko?” Tuku ke fai mai hana tali. Fakaha age te tuʼa pasina ʼo Te Tule Leʼo ʼo Sanualio–Malesio, pea kotou vakaʼi fakatahi te palakalafe ʼae ʼe tuʼu ʼi te ʼuluaki fehuʼi pea mo he vaega Tohi-Tapu ʼi te ʼu vaega ʼae ʼe tohi ai. Kotou tuku age ki ai te ʼu nusipepa, pea mo fai he fakatuʼutuʼu ke kotou toe liliu moʼo vakaʼi fakatahi mo ia te fehuʼi ʼae ʼe hoa mai ki ai.

Ko Te Tule Leʼo Sanualio–Malesio

“ ʼI tau manatu la, kotea la ia te toe loi ʼae neʼe fai ʼo ʼuhiga mo te ʼAtua? [Tuku ke fai mai hana tali.] ʼO mulimuli ki te Tohi-Tapu, ʼe loto e te ʼAtua ke ʼoʼofa ia te hahaʼi kia te ia pea mo natou falala kia te ia. [Lau ia Esaia 41:13.] ʼE fakaha ʼi te nusipepa ʼaeni ia te ʼu loi ʼe tolu neʼe fai ʼo ʼuhiga mo te ʼAtua, ʼae neʼe liliu ai ʼo faigataʼa ki ʼihi hanatou fakaovi kia te ia.”

Réveillez-vous! Sanualio

“ ʼE ke ʼio koa ki te ui ʼae ʼe lahi te ʼu fihifihia ʼe tau mo te ʼu famili ia ʼaho nei? [Tuku ke fai mai hana tali.] ʼE fakaha mai ʼi te vaega ʼaeni ia te meʼa ʼae ʼe tonu ke fai e te ʼu famili ke malohi ai ʼanatou felogoʼi. [Lau ia Taaga Lea 24:3.] Tokolahi neʼe natou sisio ki te poto ʼae ʼe maʼu ʼi te Tohi-Tapu, ʼae ʼe tuha mo te falala. ʼE fakaha ʼi te nusipepa ʼaeni ia te tuʼasila ʼi te Neti, ʼe maʼu ai he ʼu alatike ʼe fakatafito ki te Tohi-Tapu pea ʼe lava tokoni ki te ʼu famili.”