He Faʼifaʼitaki ʼo He ʼu ʼUluaki Palalau

Te Tufa ʼo Te Pepa Fakaafe Ki Te ʼAho Fakamanatu

“ ʼE mole ma fualoa anai. ʼE ma fia fakaha atu he toʼotoʼoga ka fai anai ʼi te ʼaho 14 ʼo Apelili. ʼE fakamanatu ai anai te mate ʼo Sesu. Ko ʼihi ʼe natou fakamanatu anai te aluʼaga ʼaia heʼe kia natou neʼe maʼuhiga tona mate. Kaʼe ki ʼihi, ʼe mole natou faʼa mahino ki te fakaʼuhiga ʼo te mate ʼo Sesu. ʼI tau manatu la, ʼaki te mate ʼo Sesu, ʼe ʼi ai koa ʼona fua lelei kia taua?” Tuku ke fai mai hana tali. [Fakatoʼo age tana pepa fakaafe.] ʼE fai anai he akonaki Fakatohi-tapu ʼe ina fakamahino ia te ʼu fua lelei ʼae ʼe tou maʼu mai te totogi ʼae neʼe foaki e Kilisito. ʼE tuʼu ʼi tau pepa fakaafe te koga meʼa ʼae ka fai ai te fono ʼaia pea mo te hola.”

Ko Te Tule Leʼo Sanualio – Malesio

“ ʼI tau manatu la, ʼe maʼuhiga koa ke tou fakamolemole ki ʼihi ʼaki he lotolelei? [Tuku ke fai mai hana tali.] ʼE feala ke ke tokagaʼi ia te ʼu palalau ʼaeni neʼe fai e te apositolo ko Paulo. [Lau age ia Kolose 3:13.] ʼE fakaha ʼi te alatike ʼaeni ʼo Te Tule Leʼo pe ko ʼe ʼe maʼuhiga ke tou fakamolemole ki ʼihi.” Fakaha age te alatike ʼi te pasina 11.

Réveillez-vous! Malesio

“ ʼE ma faigaʼi ke ma fakaha ki te hahaʼi ia te moʼoni ʼo ʼuhiga mo te mahino hala ʼa te tokolahi ki te vaega Tohi-Tapu ʼaeni. [Lau age ia Senesi 1:1.] ʼE manatu ʼihi neʼe fakatupu ia te ʼatulaulau, kaʼe ʼe mole tui ʼihi ki ai. Kaʼe kotea la tau manatu? [Tuku ke fai mai hana tali.] ʼE faigataʼa ki ʼihi tanatou tui ʼae neʼe fakatupu tatou koteʼuhi ʼe akoʼi e te kau takitaki lotu he akonaki ʼe mole tuʼu ia ʼi te Tohi-Tapu. ʼI te nusipepa ʼaeni, ʼe fakamahino lelei ai te kamataʼaga ʼo te ʼatulaulau, ʼo fakatafito ki te Tohi-Tapu.”