Kotou Fakaʼaogaʼi Te ʼu Faigamalie Fuli Moʼo Fakamafola Ia Te Logo Lelei ʼo Te Puleʼaga!

1. Kotea te ako ʼe tou lava taʼofi mai te faʼifaʼitaki ʼo Tavite?

¹ Neʼe mole tuku e te Hau ko Tavite ia he ʼu aluʼaga ke ina taʼofi tana gaue. Ohage la, neʼe fia laga e Tavite ia te fale ʼo Sehova. ʼI te temi ʼae neʼe fakatotonu age ai ke ʼaua tana fai ia te faʼahi ʼaia, neʼe fetogi ai e Tavite ʼana fakatuʼutuʼu pea neʼe ina teuteuʼi ia meʼa fuli ke tokalelei ki te haga ʼae ʼa Salomone ʼo laga te fale lotu. (1 Hau 8:17-19; 1 Klk. 29:3-9) Neʼe mole tokagaʼi e Tavite ia te ʼu meʼa ʼae neʼe mole feala ke ina fai, kaʼe ki te ʼu meʼa ʼae neʼe feala ke ina fai. ʼE tou lava faʼifaʼitakiʼi feafeaʼi ia Tavite ʼo tou kumi ia te ʼu faʼahiga fai ʼae moʼo fakamafola te logo lelei ʼo te Puleʼaga?

2. Kotea ʼae ʼe tonu ke tou tahi fakakaukau lelei ki ai?

² Fai Ia Meʼa Fuli ʼe Kotou Lavaʼi: Tokolahi neʼe natou fakafaigafua tonatou maʼuli ke feala ai hanatou pionie vaelua ʼi temi peʼe pionie katoa. (Mat. 6:22) ʼE kotou fia hage koa ko natou ʼaia? Kapau ʼe kotou fakakaukauʼi lelei te faʼahi ʼaia ʼi te faikole pea ʼe feala takotou sisio ki ‘he matapa lahi ʼe avahi atu kia koutou ki te gaue’. Kapau ʼe kotou sisio ki te faʼahi ʼaia, kotou fakaʼaoagaʼi te ʼu faigamalie fuli!—1 Ko. 16:8, 9, MN.

3. Tatau aipe pe ʼe mole tou pionie, kotea te ʼu faigamalie ʼe feala ke tou maʼu moʼo faifakamafola?

³ Kaʼe ʼe feafeaʼi age la mo kapau ʼe mole kotou lava pionie? ʼE ʼi ai te tahi ʼu faigamalie ʼe feala ke kotou maʼu. Ohage la ʼi takotou fale gaue, ʼe feala ke kotou felogoʼi ai mo ʼokotou kaugā gaue ʼae ʼe mole tui. He koʼe ʼe mole kotou fakaʼaogaʼi te faigamalie ʼaia moʼo fakamafola kia natou? Peʼe kapau ʼe kotou mahahaki, ʼe feala takotou fakamafola ki te kau toketa peʼe ki te kau afilimie. Kotou manatuʼi ʼe ʼi ai te fakatuʼutuʼu kia natou ʼae ʼe mole feala ke lahi tanatou faifakamafola ʼuhi ko te vaivai matuʼa peʼe ko te mahaki. ʼE feala ke natou tohi ki ʼanatou pepa tanaki gaue ia minuta ʼe 15. ʼI te temi ʼae ʼe kotou tohi ai ʼakotou pepa tanaki gaue, ʼaua naʼa kotou galoʼi te temi ʼae neʼe kotou faifagonogono faigamalie ai, mo te ʼu tohi ʼae neʼe kotou tuku, mo te ʼu kiʼi pepa lotu, mo te ʼu pepa fakaafe ki te ʼAho Fakamanatu pea mo te ʼu fakatahi. Kapau ʼe kotou fai te faʼahi ʼaia pea ʼe kotou tokagaʼi ai ʼe lahi te ʼu faigamalie moʼo fai te faʼahi ʼaia.

4. Kotea ʼae ʼe tou fakatotonu ke tou fai?

⁴ Tatau aipe pe ʼe kotea te ʼu aluʼaga ʼe tou tau mo ia, kaʼe tou fakaʼaogaʼi ia faigamalie fuli moʼo fakamafola te logo lelei. Kapau ʼe tou fai ia te faʼahi ʼaia pea ʼe tou iloʼi anai te fiafia ʼuhi ko te ʼu meʼa ʼae neʼe tou fai maʼa te Puleʼaga.—Mko. 14:8; Luka 21:2-4.