Ke Lelei Age Tatatou Minisitelio: ʼAki Tau Tali Ki He Tahi ʼe Itaita

He Koʼe ʼe Maʼuhiga? ʼI te minisitelio, ʼe tou felaveʼi ai mo he ʼu hahaʼi ʼe natou fakaʼapaʼapa. Kaʼe neʼe fakakikite e Sesu ʼe ʼi ai anai ʼihi hahaʼi ʼe natou fehihiʼa kia tatou. (Soa. 17:14) Koia, ʼe mole tou punamaʼuli anai moka ʼe tou felaveʼi mo he tahi ʼe itaita. ʼE tou fai anai he tali ʼe lelei ke fiafia ia ia ʼae ʼe tou fakafofoga, ia Sehova. (Loma 12:17-21; 1 Pet. 3:15) ʼI tatatou fai ia te faʼahi ʼaia, ʼe mole hoko ai anai he fihifihia. ʼE tou foaki anai he fakamoʼoni ʼe lelei ki he tahi pea mo natou ʼae ʼi ʼotatou tafaʼaki. Pea ʼe natou fia fakalogo leva ki te kau Fakamoʼoni ʼa Sehova moka natou toe liliu mai ʼo ʼaʼahi natou.—2 Ko. 6:3.

Te ʼu Meʼa ʼAe ʼe Tonu Ke Ke Fai:

Taupau he aga fakatokatoka pea mo he aga fakakaumeʼa. Pea ʼe maʼu ai anai te tokalelei. ʼAua naʼa kotou manatu ʼe itaita ia te kilisitiano ʼaia kia koutou totonu. (Ekl. 7:9) ʼE lagi itaita koteʼuhi ʼe tau mo he ʼu fihifihia peʼe mole ko hona lakaga ʼaia. Tatau aipe moka ʼe natou itaita ʼuhi ko te logo lelei, kaʼe ʼe tonu ke tou manatuʼi ʼe natou feia la he neʼe lohiʼi natou.—2 Ko. 4:4.
Tali ki ai ʼaki he ʼu palalau malu. (Taag. 15:1) Neʼe kotou fafagu koa ia tana moe peʼe neʼe kotou fakahohaʼa ki ai? ʼE mole tou faifakalelei age anai ʼo ʼuhiga mo tatatou gaue kaʼe ʼe tou fakasilou age ʼaki he agavaivai ʼi tatatou fakalaka age ʼi he temi ʼe mole ina faʼa leleiʼia. ʼE itaita koa ʼuhi ko he fasituʼu neʼe logo ki ai ʼo ʼuhiga mo tatou? Kapau koia, ʼe feala takotou ui fenei age: “ ʼE au mahino ki te tupuʼaga ʼo tau itaita. ʼE hage kia au ko te faʼahi ʼae neʼe ke logo ki ai ʼo ʼuhiga mo matou ʼe mole moʼoni. Kaʼe ʼe feala la haku fakamahino atu?” ʼE lagi ʼe mole manatu tahi mo tatou ʼo ʼuhiga mo he faʼahi ʼo tatatou tui. Ohage la, ko te toto peʼe ko he tahi neʼe fakamavae. ʼE feala ke tou ui fenei age: “ ʼE au lotomahino. Koteʼuhi tokolahi ʼe natou fakaha ia te ʼu tuʼania ʼaia. ʼE ke lotolelei la ke au fakaha atu ia te manatu ʼa te Tohi-Tapu ʼo ʼuhiga mo te akonaki ʼaia?”
Kapau ʼe itaita kovi ia te kilisitiano ʼaia ʼe lelei age pe ia te mavae mai ai. Kapau ʼe mole kei ina loto ke ʼaʼahi ia ia e te kau Fakamoʼoni ʼa Sehova pea ʼe tou fakaʼapaʼapa anai ki ai.

ʼAhiʼahi Fai Te Faʼahi ʼAeni Lolotoga Te Mahina:

Fai he ʼu faʼifaʼitaki lolotoga takotou ako fakafamili.
Hili takotou mavae mai he tahi ʼe itaita, kotou faipalalau mo takotou kaugā gaue ki te aga ʼae ʼe tonu ke fai.