Ke Lelei Age Tatatou Faifakamafola​—Lagaʼi He Fehuʼi Ke Ke Toe Liliu ʼo Fai Te ʼAʼahi

HE KOʼE ʼE MAʼUHIGA?

ʼE tou fia fakapala ia te ʼu pulapula ʼo te moʼoni ʼae neʼe to. (1Ko 3:6) Ka tou maʼu he tahi ʼe fia logo, ʼe lelei anai ke tou lagaʼi he fehuʼi ke feala hatatou toe liliu ʼo tali ki ai. ʼI tatatou fai te faʼahi ʼaia, ʼe feala ke ina iloʼi ʼe tou toe liliu age anai. Pea ʼe faigafua anai tatatou teuteuʼi tatatou toe liliu ʼo fai te ʼaʼahi. Ka tou toe liliu,ʼe feala ke tou ui age ki ai ʼe tou ʼomai ʼo tali ki te fehuʼi ʼae neʼe tou fai age ki ai.

TE ʼU MEʼA ʼAE ʼE TONU KE KE FAI:

• ʼI tau teuteuʼi ʼau ʼuluaki palalau, ʼe feala ke ke teuteuʼi he fehuʼi ka ke tali anai ʼi tau toe liliu ʼo fai te ʼaʼahi. ʼE lagi ko he fehuʼi ʼe maʼu tona tali ʼi te tohi ʼae neʼe ke tufa peʼe ʼi te tohi ʼae ka ke ʼavage anai ʼi tau toe liliu ʼo fai te ʼaʼahi.

• Ka ʼosi tau faipalalau mo he tahi ʼe fia logo, ʼe tonu ke ke ui age ʼe ke toe fia hoko atu tau faipalalau mo ia. Fai age te fehuʼi ʼae neʼe ke teuteuʼi. Kole age pe ʼe feala ke ina tuku atu tona numelo telefoni.

• Kapau neʼe ke fakatuʼutuʼu mo ia ʼe ke toe liliu age anai, ʼe tonu ke ke fakahoko te faʼahi ʼaia.—Mt 5:37.