“Koeni Au, Ke Ke Fekau Au”

ʼE tuha ia ke tou faʼifaʼitakiʼi te lotolelei ʼa Esaia. Neʼe ina fakaha tana tui. Logo la neʼe mole ina iloʼi ia faʼahi fuli kaʼe neʼe ina foimo tali atu aipe te kole ʼa Sehova. (Esa 6:8) ʼE feala koa hakotou fai ni fetogi ke kotou olo ʼo gaue ʼi te ʼu koga meʼa ʼae ʼe ʼaoga lahi ai he kau faifakamafola? (Ps 110:3, MN) ʼE mahino ia, ʼe maʼuhiga ke tou “lau muʼa te paʼaga ka puli anai” moka fai he fakatuʼutuʼu feia. (Luk 14:27, 28) Kaʼe, ʼe tonu foki ke tou lotolelei ʼo fai ni sakilifisio ʼuhi ko te gaue faifakamafola. (Mat 8:20; Mko 10:28-30) ʼI tatatou vakaʼi te ʼata viteo Faifakamafola ʼi Te ʼu Koga Meʼa Mamaʼo, ko te ʼu tapuakina ʼe tou maʼu anai ʼi te tauhi kia Sehova ʼe fakalaka maumau age ia ʼi te ʼu sakilifisio ʼae ʼe tou fai.

HILI TE VAKAʼI ʼO TE ʼATA VITEO, KOTOU TALI KI TE ʼU FEHUʼI ʼAENI:

• Kotea te ʼu sakilifisio neʼe fai e te kiʼi famili ʼo Williams ke feala hanatou olo ʼo gaue ʼi Équateur?

• Kotea ʼae neʼe natou vakaʼi ʼi tanatou filifili te koga meʼa ʼae ke natou olo ʼo gaue ai?

• Kotea te ʼu tapuakina neʼe natou maʼu?

• Kofea ʼae ʼe kotou lava maʼu ai he tahi age ʼu fakamahino ʼo ʼuhiga mo te ʼu koga meʼa ʼe ʼaoga lahi ai te gaue?

ʼI TAKOTOU AKO FAKAFAKAMILI ʼAE KA HOA MAI, KOTOU FAIPALALAU KI TE ʼU FEHUʼI ʼAENI:

• ʼE feafeaʼi hatatou fakalahi totatou minisitelio mo totatou kiʼi famili? (km 8/11 p. 4-6)

• Kapau ʼe mole feala ke tou olo ʼo gaue ʼi te ʼu koga meʼa ʼae ʼe ʼaoga lahi ai he kau faifakamafola, ʼe feafeaʼi hatatou tokoni ki ʼotatou kokelekasio? (w16.03 p. 3-5)