TE MAʼULI FAKAKILISITIANO
ʼAua Naʼa Galo ʼi ʼAkotou Faikole Ia Te Kau Kilisitiano ʼAe ʼe Fakatagaʼi
Neʼe fakakikite ʼi te Tohi-Tapu ʼe fakatagaʼi anai tatou e Satana pea ʼe faiga ke ina taʼofi tatatou faifakamafola. (Soa 15:20; Fkh 12:17) ʼE feafeaʼi hatatou tokoni ki te kau Kilisitiano ʼae ʼe fakatagaʼi ʼi te tahi ʼu fenua? ʼE feala ke tou manatuʼi natou ʼi ʼatatou faikole. ʼE ui fenei ʼi te Tohi-Tapu: “Ko te kole mamahi ʼa he tagata faitotonu ʼe malohi pea ʼe feala ke tokoni moʼoni ki te hahaʼi.”—Skp 5:16.
Kotea ʼae ʼe feala ke tou kole ʼi ʼatatou faikole? ʼE feala ke tou kole kia Sehova ke ina foaki te lototoʼa ki ʼotatou tehina mo tuagaʼane pea ke tokoni kia natou ke ʼaua tanatou matataku. (Esa 41:10-13) ʼE feala ke tou toe hufakiʼi te kau taki ke natou tali lelei pe te gaue faifakamafola ke feala ki ʼotatou tehina mo tuagaʼane ke natou “maʼuli fimalie pea mo tokalelei.”—1Ti 2:1, 2.
ʼI te temi ʼae neʼe fakatagaʼi ai ia Paulo mo Petelo, neʼe hufakiʼi naua e te kau ʼuluaki Kilisitiano ʼaki tanatou toʼo ʼonā higoa. (Gau 12:5; Lom 15:30, 31) Kapau ʼe mole tou iloʼi te ʼu higoa ʼo natou fuli ʼae ʼe fakatagaʼi ia ʼaho nei, ʼe feala ke tou toʼo ʼonatou kokelekasio peʼe ko te fenua ʼae ʼe natou maʼuʼuli ai.