Neʼe Puipui Au He Neʼe Au Falala Kia Sehova

ʼE AU ILOʼI IA SEHOVA MO AU FALALA KIA TE IA

Neʼe au tupu ʼi te 1948, ʼi te kiʼi kolo ʼi te potu saute uesite ʼo Nigéria. ʼI te temi ʼaia, ko te tehina veliveli ʼo taku tamai ko Moustapha neʼe papitema ko he ʼu Fakamoʼoni ʼa Sehova pea ki muli age neʼe ko toku tehina lahi ko Wahabi. ʼI toku taʼu hiva, neʼe mate taku tamai. Neʼe au lotomamahi ʼosi. Neʼe ui mai e Wahabi ʼe feala hamatou toe fesioʼaki mo papa ʼi te fakatuʼuake. Neʼe fakalotofimalie kia au te ʼu palalau ʼaia, pea neʼe au fia ako ai te Tohi-Tapu. Neʼe au papitema ʼi te 1963. Neʼe toe papitema mo ʼoku tahi ʼu tehina ʼe toko tolu.

ʼI te 1965, neʼe au maʼuli mo toku tehina lahi ko Wilson, ʼi Lagos, pea neʼe au fakatahi mo ni pionie katoa ʼo te kokelekasio ʼo Igbobi. Ko tonatou fiafia mo tanatou faʼafai neʼe ina uga ai au ke au pionie ʼi Sanualio 1968.

Ko te tehina ʼo te Petele, ko Albert Olugbebi neʼe ina fakatuʼutuʼu he fono makehe maʼa matou kau tupulaga. Neʼe palalau ai ki te ʼaoga ʼae ʼo ni pionie makehe ʼi te potu noleto ʼo Nigéria. ʼE kei au manatuʼi pe ʼana palalau fakalotomalohi. Neʼe ina ui fenei: “Kei kotou tupulaga, pea ʼe feala ke kotou foaki tokotou temi mo tokotou malohi kia Sehova. ʼE lahi te gaue ʼi ai.” Neʼe au fia maʼu te faʼahiga manatu ʼa te polofeta ko Esaia, ke fekauʼi au e Sehova ki te koga meʼa ʼae ʼe loto ki ai. Koia neʼe au fai ai taku kole ke au pionie makehe.—Esa. 6:8.

ʼI Maio 1968, neʼe hinoʼi au ke au pionie makehe ʼi te kolo ko Kano, ʼi te potu noleto ʼo Nigéria. Neʼe lolotoga hoko ai te tau ʼo Biafra (1967-1970). Neʼe lahi te ʼu mamahi mo te ʼu mātea ʼi te potu noleto ʼo Nigéria, pea neʼe hoko atu ki te potu esite. Neʼe ʼi ai te tehina neʼe mole loto ke au alu ki ai, he neʼe tuʼania ki toku maʼuli. Kae neʼe au ui fenei age: “ ʼE malave kia au tau tuʼania ʼaia. Kae kapau ʼe loto e Sehova ke au alu ʼo gaue maʼa ia ʼi te potu ʼaia, ʼe au tui papau ʼe nofo anai mo au.”

ʼE AU FALALA KIA SEHOVA ʼI HE KOGA MEʼA NEʼE HOKO AI TE TAU

Neʼe kovi ʼosi te maʼuli ʼae ʼi Kano ʼuhi ko te tau. Neʼe lahi ʼaupito te ʼu maumau. ʼI ʼihi temi, ka matou faifakamafola, neʼe matou sisio ki leta ʼo te ʼu sino ʼo natou ʼae neʼe mamate ʼi te tau. Logo la neʼe lahi te ʼu kokelekasio ʼi Kano, kae tokolahi te ʼu tehina neʼe feholaki. Neʼe kei toe pe te toko 15 kau faifakamafola, pea neʼe natou matataku mo lotovaivai. Neʼe natou fiafia ʼaupito ʼi tamatou olo age, ia te ʼu pionie makehe ʼe toko ono. Neʼe matou fakalotomalohiʼi natou, pea neʼe natou fiafia ai. Neʼe matou tokoni ki te toe fai ʼo te ʼu fono mo te faifakamafola, pea ke toe momoli te ʼu pepa tanaki gaue pea mo te ʼu pepa fakaui tohi ki te Petele.

Ko matou, te ʼu pionie makehe neʼe matou ako te lea Fakahausa. Tokolahi te hahaʼi neʼe natou fia fagono moka natou logo ki te logo lelei ʼi tanatou lea. Kae ko natou ʼae neʼe kau ki te lotu maʼuhiga ʼi Kano neʼe mole natou leleiʼia tamatou faifakamafola. Koia neʼe tonu ke matou nonofo tokakaga. ʼI te tahi ʼaho, neʼe tuli au mo te tehina ʼi te faifakamafola e he tagata mo tana hele. Meʼa lelei foki he neʼe ma lele vave age maua pea neʼe mole ina maʼu maua. Logo la te ʼu aluʼaga fakatupu tuʼutamaki, kae neʼe puipui matou e Sehova pea neʼe kamata tuputupu leva te kau faifakamafola. (Pes. 4:8) Ia ʼaho nei, ko kauga fagona ʼe toko 500 tupu ia kokelekasio ʼe 11 ʼi Kano.

ʼE FAKATAGAʼI MATOU ʼI NIGER

ʼI ʼAukusito 1968, hili ni mahina ʼi taku kua nofo ʼi Kano, neʼe hinoʼi au ki te kolo muʼa ʼo te République du Niger, ʼae ko Niamey. Neʼe ko au mo te ʼu pionie makehe ʼe toko lua. Neʼe matou mahino vave leva ko Niger, ʼi te potu Uesite ʼo Afelika, ʼe kau ʼi te ʼu koga meʼa ʼae ʼe vevela ʼaupito ʼi te kele. Neʼe tonu ke matou fakamamahani mo te vevela, pea ke matou toe ako mo te lea ʼo te potu fenua, ia te Fakafalani. Logo la neʼe faigataʼa, kae neʼe matou falala kia Sehova. Neʼe matou gaue mo te kau faifakamafola ʼe tokosiʼi ʼae neʼe maʼuʼuli ai. Mole fualoa ki muli age, ko te hahaʼi ʼae neʼe poto ʼi te lautohi neʼe natou maʼu fuli te tohi ako La vérité qui conduit à la vie éternelle. Neʼe ʼomai pe la ʼihi ʼo kole hanatou ʼu tohi.

Neʼe matou iloʼi leva neʼe mole leleiʼia e te ʼu pule taki ia te kau Fakamoʼoni ʼa Sehova. ʼI Sulio 1969, neʼe hoki fai ai tamatou fakatahi mo te tehina taupau pea neʼe matou toko 20. Neʼe matou fakaʼamu ke matou sisio ki te papitema ʼa te ʼu kauga fagona ʼe toko lua. Kae ʼi te ʼuluaki ʼaho pe ʼo te fakatahi, neʼe ʼomai te kau polisi ʼo fakagata te polokalama. Neʼe natou ʼave matou, te ʼu pionie makehe mo te tehina taupau, ki te fale polisi. ʼI tanatou ʼosi fakafehuʼi matou, neʼe natou fakatotonu mai ke matou toe liliu age ʼi te ʼaho ake. Neʼe matou manatu ʼe hoko ai anai ni fihifihia. Koia neʼe matou fakatuʼutuʼu ke fai te akonaki ʼo te papitema ʼi te loto fale ʼo he tahi pea neʼe fai fakafufu te papitema ʼi te vai tafe.

Hili ki ai ni vahaʼa, neʼe fakatotonu mai e te puleʼaga ke au mavae ʼi Niger ʼo feia mo te ʼu pionie makehe ʼe toko nima ʼae. Neʼe natou tuku mai ʼaho ʼe lua. Neʼe matou fakalogo ki ai, pea matou olo ki te Petele ʼi Nigéria, ʼae neʼe toe hinoʼi ai matou ki he tahi age koga meʼa.

Neʼe hinoʼi au ki te kiʼi kolo ʼi Nigéria, ko Orisunbare. Neʼe au leleiʼia ʼosi te gaue fakatahi mo te kau faifakamafola tokosiʼi ʼae neʼe maʼuʼuli ʼi ai. Kae hili mahina e ono, neʼe toe kole mai e te Petele ke au toe liliu ki Niger. Neʼe au punamaʼuli ʼi te kamata pea mo tuʼania, kae neʼe au fakaʼamu lahi leva ke au toe felaveʼi mo te ʼu tehina ʼae ʼi Niger.

Neʼe au toe liliu ki te kolo ko Niamey. ʼI te ʼaho ake, neʼe au felaveʼi mo te tagata faikoloa neʼe tupu ʼi Niger. Neʼe ina iloʼi ko au ko te Fakamoʼoni ʼa Sehova, pea neʼe kamata faifehuʼi mai ʼo ʼuhiga mo te Tohi-Tapu. Neʼe au fai leva tana ako Tohi-Tapu, pea neʼe ina tuku tana suluka mo tana inu kava. Ki muli age neʼe papitema leva. Neʼe au fiafia ʼosi ʼi te faifakamafola mo te ʼu tehina mo tuagaʼane ʼi te ʼu koga meʼa kehekehe ʼo Niger, pea mo taku sio ki te tali mamalie pe e te hahaʼi ia te moʼoni. ʼI taku tau atu ki ai, neʼe ko te toko 31 ʼu Fakamoʼoni ʼa Sehova. ʼI taku mavae, neʼe natou toko 69.

“HEʼEKI MATOU MAʼU NI LOGO MAI ʼOTATOU TEHINA ʼI GUINÉE”

ʼI Tesepeli 1977, neʼe au toe liliu ki Nigéria ki te ako neʼe fai ai, pea neʼe vahaʼa tolu. Hili ʼaia, ko te tehina ko Malcolm Vigo, te kootinatea ʼo te Komite ʼo Te Filiale, neʼe ina fakatoʼo mai te tohi mai te ʼu tehina ʼo te filiale ʼo Sierra Leone. Neʼe natou kumi he tehina pionie kei malohi mo selipatea, pea ʼe palalau Fakapilitania mo Fakafalani. ʼE taupau fealuʼaki anai ʼi Guinée. Neʼe ui mai e te tehina ko Vigo ko te ako ʼae neʼe au kau ki ai neʼe ina teuteuʼi au ki te selevisi ʼaia. Kae neʼe ina ui fakahagatonu mai ʼe mole faigafua anai. Neʼe ina fai mai te tokoni ʼaeni: “Fakakaukau lelei ʼi muʼa ʼo hau tali.” Neʼe au ui age: “ ʼE au alu anai he ʼe ko Sehova ʼae ʼe ina fekauʼi au.”

Neʼe au folau ai ki Sierra Leone pea neʼe au felaveʼi mo te ʼu tehina ʼo te filiale. Neʼe ui mai e he tehina ia natou: “Heʼeki matou maʼu ni logo mai ʼotatou tehina ʼi Guinée.” Neʼe tokaga te filiale ʼo Sierra Leone ki te faifakamafola ʼi Guinée, kae neʼe faigataʼa hanatou felogoi mo te ʼu tehina ʼuhi ko te ʼu tokakovi fakapolitike ʼae neʼe hoko ai. Neʼe natou faiga liuliuga ke alu he tehina ʼo ʼaʼahi te ʼu tehina ʼi ai, kae neʼe mole lava. Koia, neʼe natou kole mai ke au alu ki Conakry, te kolo muʼa ʼo Guinée, ʼo faiga ke fakagafua mai e te puleʼaga ke au nofo ai.

ʼI taku tau atu ki Conakry, neʼe au alu ki te fale ʼae ʼe fakafofoga ai ia te puleʼaga ʼo Nigéria pea neʼe au palalau ki te pule. Neʼe au fakaha age ʼe au fia faifakamafola ʼi Guinée. Kae neʼe ina ui mai ʼe lelei age pe haku mole nofo, he ʼe feala pe ke puke au peʼe kovi age la ia. Neʼe ina fai mai te tokoni ʼaeni: “Toe liliu ki Nigéria pea ke faifakamafola ʼi ai.” Kae neʼe au tali age: “Au fia nofo.” Neʼe ina fai ai te tohi, ʼo ina kole ai ki te Minisi ʼo te Puleʼaga ʼo Guinée ke tokoni mai ʼo ʼuhiga mo taku kole. Pea ko te meʼa pe ʼaia neʼe hoko.

Neʼe au toe liliu leva ki te Petele ʼi Sierra Leone, ʼo fakaha age te tonu ʼae neʼe fai e te Minisi ʼo te Puleʼaga. Neʼe kalaga fiafia ʼosi te ʼu tehina ʼi tanatou sisio ʼae neʼe tapuakinaʼi e Sehova taku alu ʼae ki Guinée. Neʼe fakagafua mai e te puleʼaga ʼo Guinée ke au nofo ai.

Mai te 1978 ki te 1989 neʼe au taupau fealuʼaki ʼi Guinée, ʼi Sierra Leone. Neʼe au toe fetogi mo te tehina taupau fealuʼaki ʼae ʼi Libéria. ʼI taku kamakamata, neʼe au tautau mahaki. Pea ʼi ʼihi temi neʼe hoko kae au nofo ʼi te ʼu koga meʼa mamaʼo ʼosi. Kae neʼe faiga fakamalotoloto pe ia te ʼu tehina ke natou ʼave au ki te lopitali.

ʼI te tahi lakaga, neʼe au maʼu te mahaki ʼae ko te paludisme, pea neʼe au logo kovi ʼosi. Neʼe toe manua mo toku fatu. Kae neʼe au toe lelei. Neʼe au iloʼi ki muli age, neʼe ui maʼa te ʼu tehina ʼe au mate anai. Pea neʼe natou felogoi pe ʼe tanu anai au ʼifea. Logo la te ʼu aluʼaga fakamataku ʼaia, kae neʼe mole pe la au manatu ke au tuku taku selevisi. Pea ʼe kei au tui papau ʼe ko te ʼAtua tokotahi pe ʼae ʼe feala ke ina puipui tatou, he ʼe tatau aipe pe ʼe tou mamate, kae ʼe feala ke ina fakatuʼuake anai tatou.

ʼE MA FALALA TAUMATUʼA KIA SEHOVA

ʼI te 1988, neʼe au felaveʼi mo Dorcas, ko he tuagaʼane pionie ʼe ʼofa ʼaupito ia Sehova pea mo agavaivai. Neʼe ma ʼohoana, pea neʼe fakatahi mo au ʼi te gaue taupau fealuʼaki. Neʼe lahi te lagolago mai ʼo toku ʼohoana ʼi tamā gaue ʼaia kia Sehova, pea neʼe ina tali lelei pe ke ina fai ni sakilifisio. Neʼe ma haʼele ia kilometa ʼe 25 ke ma ʼaʼahi te ʼu kokelekasio, ʼo ma ʼamo pe ʼama uta. Pea ka neʼe tuʼu mamaʼo age ʼihi kokelekasio, neʼe ma fakaʼaogaʼi he ʼu meʼa fealuʼaki kehekehe ʼo ma olo ʼi ni ala pelapela mo lahi ai ni foʼi pu.

ʼE lototoʼa ʼosi ia Dorcas. Ohage la, ʼi ʼihi temi neʼe tonu ke ma fakalaka ʼi ni vai tafe neʼe lahi ai te ʼu manu fekai ko te ʼu kolokotile. ʼI tamā tahi olo, neʼe ʼaho nima tamā faifagona, pea neʼe tonu ke ma fakalaka ʼi he vai tafe ʼi he ʼu kiʼi vaka he neʼe kua maumau te ʼaleso. Neʼe tuʼu ake leva ia Dorcas ke hifo ʼi te kiʼi vaka, kae neʼe to ki te vai, ʼi he faʼahi neʼe loloto. Neʼe mole ma popoto ʼi te kāuga pea neʼe ʼi ai ni kolokotile. Meʼa lelei he neʼe fakato ʼihi tama ki te vai, ʼo olo ʼo haofaki ia ia. Lolotoga ni po neʼe mole ma mamoe ai ʼuhi ko te aluʼaga ʼaia neʼe hoko, kae neʼe ma hoko atu pe tamā selevisi.

ʼI te kamata ʼo te 1992, neʼe ma punamaʼuli ʼi tamā iloʼi ʼae kua faitama ia Dorcas. Neʼe tonu koa ke ma tuku tamā gaue temi katoa kia Sehova? Neʼe ma manatu fenei: “Neʼe foaki mai e Sehova he meʼa ʼofa!” Koia, neʼe ma fakahigoaʼi ai tamā taʼahine ko Jahgift. (Ko tona fakaʼuhiga “Meʼa ʼOfa Mai Ia Sehova”) Hili taʼu ʼe fa ʼi te kua ʼosi tupu ʼo tamā taʼahine, neʼe tupu leva ia Eric. Neʼe nā liliu ko he ʼu meʼa ʼofa neʼe foaki mai e Sehova kia maua. Neʼe gaue tamā taʼahine ʼi te pilo faifakaliliu ʼi Conakry, pea ʼe faifekau fakaminisitelio ia Eric.

Logo la neʼe tonu ki muli age ke tuku e Dorcas tana pionie makehe, kae neʼe pionie katoa pea neʼe tokaga ki ʼama fanau. ʼAki te tokoni ʼa Sehova, neʼe feala ke au hoko atu taku pionie makehe. Pea ʼi te kua lalahi ʼo ʼama toe, neʼe feala ke toe pionie makehe ia Dorcas. ʼI te temi nei, ʼe ma misionea ʼi Conakry.

ʼE PUIPUI MAUA E SEHOVA

Ko he potu pe neʼe fekauʼi au e Sehova ki ai, neʼe au alu. Tuʼa lahi neʼe ma logoʼi taumatuʼa tana puipui mo tana tapuakinaʼi maua. Neʼe ma falala kia Sehova, koia neʼe ma hao ai mai te ʼu tuʼuga fihifihia mo tuʼania ʼae ʼe tau mo natou ʼae ʼe falala ki te ʼu koloa. ʼAki te ʼu faʼahi ʼae neʼe hoko kia au mo Dorcas neʼe ma tui papau ai ʼe ko Sehova ʼAtua totatou haofakiʼaga mo puipuiʼaga. (1 Klk. 16:35) Pea ʼe au iloʼi ʼe puipui anai e Sehova te maʼuli ʼo natou ʼae ʼe falala kia te ia “ohage ko te puipui ʼo he ʼu meʼa maʼuhiga.”—1 Sam. 25:29.