Te ʼu Fehuʼi ʼa Te Kau Lautohi

He koʼe koa neʼe fakaʼaogaʼi te ʼu kupuʼi palalau “te tokotahi ae e ina mau te heegata” pea mo te kupu “iaʼia ae nee heeki mamata e he tagata, pea e mole feala te sio ki ai” moʼo talanoa ʼo ʼuhiga mo Sesu kae mole talanoa ia kiā Sehova ʼAtua?

Neʼe tohi fēnei e te ʼapositolo ko Paulo: “E fakaha mai anai i te temi kua [“fakakatofa,” MN ] ki ai, e te Aliki-hau ulutokotahi mo manuia, te Hau o te u hau, mo te Aliki o te u aliki, te tokotahi ae e ina mau te heegata, e afio i te malama e mole kakusia, iaʼia ae nee heeki mamata e he tagata, pea e mole feala te sio ki ai.”​—1 Timoteo 6:​15, 16.

ʼE manatu fēnei te kau fakamahino Tohi-Tapu: ‘Ko te ʼu kupuʼi palalau aē “te tokotahi ae e ina mau te heegata,” pea mo te “Aliki-hau ulutokotahi” pea mo “iaʼia ae nee heeki mamata e he tagata, pea e mole feala te sio ki ai,” ʼe feala koa tona fakaʼaogaʼi ki he tahi kehe age ʼi te Māfimāfi?’ E moʼoni ia, ko te ʼu kupu ʼaia ʼe feala pe tona fakaʼaogaʼi mo fakamatalatala ia Sehova. Kae ʼi te ʼu vaega ki muʼa mo te ʼu vaega aē ʼe hoa ki te ʼu vaega ʼo 1 Timoteo 6:​15, 16, ʼe talanoa tāfito ia Paulo ʼo ʼuhiga mo Sesu.

ʼI te fakaʼosi ʼo te vaega 14, ʼe talanoa ia Paulo ki “te ha mai o totatou Aliki ko Sesu Kilisito.” (1 Timoteo 6:14) Koia, ʼi te haga ʼa Paulo ʼo tohi te vaega 15 ʼo ʼuhiga mo “[ia] e fakaha mai anai i te temi kua [fakakatofa] ki ai e te Aliki-hau ulutokotahi mo manuia” ʼe talanoa ia ki te fakahā ʼo Sesu, kae mole talanoa ia kiā Sehova ʼAtua. Kae ko ai koa “te Aliki-hau ulutokotahi”? ʼE feala pe ke tou ʼui ko Sesu te ʼAliki hau tokotahi ʼaē ʼe talanoa ki ai ia Paulo. Koteā tona tupuʼaga? Ko te ʼu vaega ki muʼa pea mo te ʼu vaega ʼaē ʼe hoa kiai, ʼe mahino ai kiā tatou ko Paulo ʼe ina fakatatau ia Sesu mo te ʼu tagata takitaki. Ohage pe ko tona tohi e Paulo, ko Sesu totonu ko “te Hau o te u hau, mo te Aliki o te u aliki.”a Koia, kapau ʼe tou fakatatau ia Sesu kiā nātou ʼaia, ko Sesu ko te “Aliki-hau ulutokotahi.” Neʼe kua foaki kiā Sesu “te pule, pea mo te fakaʼaliʼaliki, pea mo te puleʼaga, koteʼuhi ke tauhi kiā te ia te hahaʼi, pea mo te ʼu fenua pea mo te ʼu faʼahiga lea kehekehe.” (Taniela 7:14) E mole ʼi ai he tagata ʼaliki ʼe feala ke ina maʼu te tuʼulaga aia!

Pea koteā te manatu ʼo ʼuhiga mo te kupu “te tokotahi ae e ina mau te heegata”? E toe fai ai he fakatatau ʼo Sesu mo te ʼu hau ʼo te kele. ʼE mole ʼi ai he tagata takitaki ʼi te kele ʼe feala ke ina ʼui neʼe ina maʼu te maʼuli tuputupua, ʼe gata pe kiā Sesu. Neʼe tohi fēnei e Paulo: “E tou iloi kua tuuake Kilisito mai te mate, e mole toe mate ia, ʼe mole toe pule te mate kia te ia.” (Loma 6:9) Pea ko Sesu pe ʼaē ʼe ʼui ʼi te Tohi-Tapu neʼe ina ʼuluaki maʼu ia te meʼa ʼofa ʼaē ko te maʼuli tuputupua. Koia, ʼi te temi pe aē neʼe faitohi ai ia Paulo, neʼe ko Sesu tokotahi pe ʼaē neʼe kua foaki kiā ia te maʼuli aē ʼe mole feala ke toe maumauʼi.

ʼE feala pe ke tou ʼui ʼe hala te manatu ʼa Paulo ʼi tana ʼui ʼaē ko Sehova ʼAtua tokotahi pe ʼaē ʼe ina maʼu te maʼuli tuputupua, koteʼuhi neʼe kua maʼuli tuputupua ia Sesu ʼi te temi pe ʼaē neʼe tohi ai e Paulo ia te ʼu palalau ʼaia. Kae ʼe feala pe kiā Paulo ke ina ʼui ko Sesu tokotahi pe ʼaē ʼe maʼuli tuputupua mokā tou fakatatau ia ia mo te ʼu tagata takitaki ʼo te kele.

Koia ʼe moʼoni, ʼi te hili ʼo tona fakatuʼuake pea mo tana hake ʼaē ki te lagi, neʼe feala pe ke ʼui ʼo ʼuhiga mo ia ko “iaʼia ae nee heeki mamata e he tagata, pea e mole feala te sio ki ai.” ʼE moʼoni, ʼe feala pe ki tana ʼu tisipulo fakanofo ke nātou sio kiā Sesu ʼi te hili ʼo tanatou mate pea mo tonatou fakatuʼuake ki te lagi ʼo nātou hage ko he ʼu laumālie. (Soane 17:24) Kae ʼe mole ʼi ai he tagata ʼi te kele ʼe feala ke sio kiā Sesu ʼaē kua fakakolōliaʼi. Koia la ʼaē ʼe feala ke tou tui moʼoni ai, talu mai te fakatuʼuake ʼo Sesu pea mo tana hake ʼaē ki te lagi, ʼe mole he tahi ʼe feala ke sio totonu kiā Sesu.

ʼE moʼoni, ʼi tatatou ʼuluaki lau te ʼu fakamatalatala ʼaē ʼe tou maʼu iā 1 Timoteo 6:​15, 16, ʼe feala pe ke tou ʼui ʼe talanoa ia ki te ʼAtua. Kae ko te ʼu vaega ki muʼa pea mo te ʼu vaega aē ʼe hoa atu ki te ʼu palalau ʼa Paulo​—ʼo fakamoʼoni ʼaki te tahi ʼu vaega​—ʼe fakahā ai neʼe talanoa pe ia Paulo ʼo ʼuhiga mo Sesu totonu.

[Kiʼi nota]