Kotea ʼe Tou Lava Fai Ke Malave Ki Te Loto ʼo ʼAtatou Ako?
1. Neʼe malave feafeaʼi ki te ʼu loto ʼo te hahaʼi ia te faʼahiga faiakonaki ʼa Sesu?
1 Neʼe malave ki te loto ʼo te hahaʼi ia te faʼahiga faiakonaki ʼa Sesu Kilisito. ʼI te tahi ʼaho, hili tana fakamahino lelei te Tohi-Tapu neʼe ‘vela’ te ʼu loto ʼo ʼana tisipulo. (Luka 24:32) ʼE loto e te ʼAtua ke tou fakalogo kia te ia ʼaki totatou loto katoa. Koia, ka malave te loto ʼo ʼatatou ako ʼe feala ke natou fai he ʼu fetogi ʼi ʼonatou maʼuli. ʼO feafeaʼi?—Loma 6:17.
2. He koʼe ʼe maʼuhiga ke tou aga fakaʼeteʼete mo fakasiosio tonu?
2 Te Aga Fakaʼeteʼete Mo Te Fakasiosio Tonu: Ki te manatu ʼa te tokolahi, kapau ʼe tou fakaha pe kia natou te meʼa ʼae ʼe lelei mo ʼae ʼe kovi, ʼe mole uga anai natou ke natou fai he ʼu faiga. ʼI tona fakahagatonu, ka tou valoki te ʼu akonaki ʼae ʼe natou tui ki ai ʼaki he ʼu tuʼuga vaega Tohi-Tapu, ʼe feala ke mole kei fia hoko atu tanatou ako. ʼE feala ke tou ʼekenaki he tahi mo kapau kua tou iloʼi te ʼu tupuʼaga ʼo tana tui ki te ʼu akonaki ʼaia. ʼAki he aga fakaʼeteʼete, kapau ʼe tou fai he ʼu fehuʼi neʼe tou fakakaukauʼi lelei, ʼe tou ʼekenaki anai ia ia ke ina fakaha ʼana manatu loloto. (Taag. 20:5) Pea hoki ʼosi leva, kua tou lava filifili he ʼu manatu mai te Folafola ʼa te ʼAtua ʼe feala ke malave ki tona loto. Koia ʼae ʼe tonu ai ke tou fakaha he loto tokaga mo he faʼa kataki. (Taag. 25:15) Kotou manatuʼi ʼe tahi alu pe te tuputupu ʼa te kilisitiano takitahi ʼi te faʼahi fakalaumalie. Kotou tuku he temi ke gaue te laumalie maʼoniʼoni ʼo Sehova ʼi ʼonatou ʼatamai pea mo te ʼu gaue ʼae ʼe natou fai.—Mko. 4:26-29.
3. ʼE feafeaʼi hatatou tokoni ki ʼatatou ako ke natou maʼu he ʼu kalitate?
3 Tokoni Ke Natou Maʼu He ʼu Kalitate: ʼAki te ʼu vaega Tohi-Tapu ʼae ʼe ha ai te agalelei mo te ʼofa ʼo Sehova, ʼe feala ke tokoni ki ʼatatou ako ke natou maʼu he ʼu kalitate. Ohage la, ʼe feala ke tou fakaʼaogaʼi te ʼu vaega ʼo Pesalemo 139:1-4 peʼe ko Luka 12:6, 7 moʼo fakaha ko te ʼAtua ʼe tokaga kia tatou takitokotahi. Ka fakaha e te hahaʼi tonatou lotofakafetaʼi ki te manavaʼofa ʼo Sehova, ʼe malohi anai tonatou ʼofa mo tanatou pipiki ʼae ki te ʼAtua. (Loma 5:6-8; 1 Soa. 4:19) Pea tahi, ka natou iloʼi ʼe malave ʼanatou aga kia Sehova, ʼe lagi uga ai anai natou ke natou fai he aga ʼe fakafiafiaʼi mo fakamaʼuhigaʼi ai ia Sehova.—Pes. 78:40, 41; Taag. 23:15.
4. Ka tou fai he ako, ʼe tou fakaha feafeaʼi tatatou fakaʼapaʼapa ki tonatou lotofaʼitaliha?
4 ʼE mole fakakinauʼi e Sehova he tahi ke fakalogo ki ʼana fakatotonu. Kaʼe ʼe ina taki mai te hahaʼi ʼo ina fakaha kia natou ko ʼana fakatotonu ʼe maʼu ai te poto. (Esa. 48:17, 18) ʼE tou faʼifaʼitakiʼi ia Sehova moka tou tokoni ki te hahaʼi ke natou toʼo e natou totonu ʼanatou tonu. Ka mahino te hahaʼi ʼe ʼaoga ke natou fai he ʼu fetogi ʼi tonatou maʼuli, pea ʼe liliu anai te ʼu fetogi ʼaia ʼo tologa. (Loma 12:2) ʼE toe tokoni anai kia natou ke natou fakaovi kia Sehova, ia ia ʼae ʼe ina ‘sivisivi te ʼu loto.’—Taag. 17:3.