“Kapau e Kau Te Atua Mo Tatou, Pe Ko Ai Ae e Fakafehagai Mai Kia Tatou?”
“Koia, kotea e tou lau anai kia mea aia? Kapau e kau te Atua mo tatou, pe ko ai ae e fakafehagai mai kia tatou?”—Loma 8:31.
1. Ko ai ʼaē neʼe mavae mai Esipito mo te kau Iselaele, pea ko ai ʼaē neʼe ina faka fealagia kia nātou te faʼahi ʼaia?
ʼI TE mavae ʼa te kau Iselaele kua ʼāteaina mai tanatou nonofo ia taʼu e 215 ʼi Esipito, ʼaē neʼe fualoa ai tanatou maʼuli popūla pea ko te “toe hahaʼi tokolahi pea mo kehekehe neʼe hake mo nātou.” (Ekesote 12:38) Neʼe sio te hahaʼi ʼaia ʼe mole ko he kau Iselaele, ki te ʼu tautea fakamataku e hogofulu ʼaē neʼe tō ki Esipito pea mo fakalainoaʼi ai tonatou ʼu ʼatua hala. Neʼe nātou sisio tāfito ki te fā tautea ʼaē neʼe fakahā ai e Sehova tana lava puipui tana hahaʼi. (Ekesote 8:23, 24) Logola tanatou mole heʼeki mahino katoa ki te ʼu fakatuʼutuʼu ʼa Sehova, kae neʼe nātou ʼiloʼi papau te meʼa ʼaenī: Neʼe mole lava puipui e te ʼu ʼatua ʼo Esipito tana hahaʼi, kae neʼe fakahā totonu e Sehova tona mālohi ʼo ʼuhiga mo te kau Iselaele.
2. He koʼe neʼe tokoni ia Laape ki te ʼu malomu Iselaele, pea he koʼe neʼe mole faihala ʼi tana falala ki tonā ʼAtua?
2 Hili taʼu e fāgofulu ki muli age, ʼi muʼa ʼo te hū ʼa te kau Iselaele ki te Kele ʼo Te Fakapapau, ko Sosue ʼaē neʼe hoa mai kia Moisese neʼe ina fekauʼi te ʼu malomu e lua ki te fenua. ʼI te fenua ʼaia neʼe nā felāveʼi mo Laape, ko te fafine neʼe nofo ʼi Seliko. ʼI tana logo ki te ʼu gāue fakaofoofo ʼa Sehova moʼo puipui te kau Iselaele lolotoga taʼu e 40 talu mai tanatou mavae mai Esipito, neʼe mahino ai kia ia kapau ʼe loto ki te tapuakina ʼa te ʼAtua, pea ʼe tonu ke tokoni ki tana hahaʼi. Ko Laape mo tona famili neʼe hāo ʼi te temi ʼaē neʼe ʼohofiʼi ai e te kau Iselaele te kolo, koteʼuhi neʼe ina fai te tonu fakapotopoto. Ko te ʼaluʼaga faka milakulo ʼaē neʼe hāofaki ai nātou neʼe ko he fakamoʼoni lelei ʼaia ko te ʼAtua neʼe nofo mo nātou. Koia, neʼe fua lelei ai te falala ʼa Laape ki te ʼAtua ʼo te kau Iselaele.—Sosue 2:1, 9-13; 6:15-17, 25.
3. (a) Koteā te milakulo neʼe fai e Sesu ʼe ōvi ki te kolo ʼo Seliko ʼaē neʼe toe laga, pea neʼe tali feafeaʼi e te kau takitaki lotu Sutea? (b) Koteā te meʼa ʼaē neʼe mahino kiai ʼihi Sutea, pea ki muli age mo te ʼu hahaʼi tokolahi ʼaē ʼe mole ko he kau Sutea?
3 Hili kiai sēkulō e 15, neʼe fakamālōlō e Sesu Kilisito te tagata kainono kivi neʼe nofo ōvi ʼi te kolo ʼo Seliko ʼaē neʼe toe laga. (Maleko 10:46-52; Luka 18:35-43) Neʼe kolekole e te tagata ʼaia ke fakahā age e Sesu ia tona manavaʼofa he neʼe ina ʼiloʼi ʼe lagolago te ʼAtua kia Sesu. Kae neʼe mole tali e te kau takitaki lotu Sutea pea mo tana kau tisipulo, ko te ʼu milakulo ʼa Sesu ʼe ko he fakamoʼoni ʼaia neʼe ina fai te gāue ʼa te ʼAtua. Kae neʼe nātou valokiʼi ia ia. (Maleko 2:15, 16; 3:1-6; Luka 7:31-35) Logola tanatou ʼiloʼi ʼaē neʼe kua fakatuʼuake ia Sesu ʼaē neʼe nātou matehi, neʼe mole nātou fia fakamoʼoni ʼe ko te gāue ʼaia ʼa te ʼAtua. Kae neʼe nātou toe hoko atu pe tanatou fakatagaʼi te ʼu tisipulo ʼa Sesu, ʼo nātou faigaʼi ke nātou tāʼofi tanatou gāue ʼaē ko te “fagonogono te logo lelei ʼo te ʼAliki ko Sesu.” Kae ko ʼihi Sutea, pea ki muli age mo te hahaʼi tokolahi ʼe mole ko he kau Sutea, neʼe nātou tokagaʼi te ʼu meʼa ʼaia neʼe hoko pea neʼe nātou fakakaukauʼi fakapotopoto. Neʼe mahino kia nātou kua līaki e te ʼAtua te kau takitaki Sutea ʼaē ʼe manatu pe kia nātou totonu, pea neʼe tokoni ki te kau tisipulo agavaivai ʼa Sesu Kilisito.—Gaue 11:19-21, MN.
Ko Ai ʼi Te Temi Nei ʼe Lagolago Ki Ai Te ʼAtua?
4, 5. (a) Koteā ʼaē ʼe sioʼi e te hahaʼi moʼo filifili tanatou lotu? (b) Koteā te fehuʼi ʼaē ʼe maʼuhiga ke kita ʼiloʼi ai te lotu moʼoni?
4 ʼO ʼuhiga mo te lotu moʼoni, neʼe ʼui fēnei e te tagata takitaki lotu ʼi te televisio: “ ʼE ʼau faka tui ko he lotu ʼe moʼoni mo kapau ʼe ina fakaliliu he tahi ʼo agalelei mokā ina maʼuliʼi te lotu ʼaia.” ʼE moʼoni, ko te lotu moʼoni ʼe ina fakaliliu te hahaʼi ke agalelei. Kae kapau ko he lotu ʼe ina fakaliliu te hahaʼi ko he ʼu hahaʼi agalelei, ʼe ko he fakamoʼoni koa ʼaia ʼe lagolago te ʼAtua ki te lotu ʼaia? ʼE ko te fakamoʼoni pe koa ʼaia e tahi moʼo fakafuafua ko he lotu ʼe moʼoni?
5 Ko tatou fuli ʼe tou fia filifili te ʼu meʼa ʼaē ʼe kita loto kiai ohage ko te filifili ʼo te lotu ʼaē ʼe kita fia kau kiai. Kae ko te filifili faʼifaʼitaliha, ʼe mole faka ʼuhiga leva ʼe kita filifili anai te meʼa ʼaē ʼe lelei. Ohage la ko ʼihi hahaʼi, ʼe nātou filifili he lotu ʼo mulimuli ki te kaugamālie ʼo tona hahaʼi, tona ʼu koloā, te matalelei ʼo tona ʼu toʼotoʼoga, peʼe ko tonatou ʼu vāhaʼa faka famili. ʼE mole he meʼa ʼi te ʼu meʼa ʼaia ʼe ko he tupuʼaga tāfito moʼo fakafuafua peʼe moʼoni he lotu peʼe hala. Koʼeni te fehuʼi ʼaē ʼe maʼuhiga ke lagaʼi: Ko te lotu fea ʼaē ʼe ina uga tana ʼu tisipulo ke nātou fai te finegalo ʼo te ʼAtua, pea mo foaki he fakamoʼoni mālohi ko te ʼAtua ʼe lagolago kiai, ke feala ai ki tana hahaʼi tauhi ke nātou ʼui papau, “E kau te Atua mo tatou”?
6. Koteā te ʼu palalau ʼaē neʼe fai e Sesu ke feala ai hatatou ʼiloʼi te lotu moʼoni pea mo te lotu hala?
6 Neʼe fakahā mai e Sesu peʼe feafeaʼi hakita ʼiloʼi ia te lotu moʼoni mai te lotu hala, ʼi tana ʼui ʼaenī: “Koutou tokaga ki te kau polofeta lohi, e natou omai kia koutou mo onatou kofu fakaʼakeno, kae ko he u lupo kaikai i onatou loto. E Koutou iloi anai natou i onatou fua.” (Mateo 7:15, 16; Malakia 3:18) Tou vakaʼi he ʼu “fua,” peʼe ko he ʼu fakaʼiloga ʼo te lotu moʼoni, ke tou ʼiloʼi lelei ai peʼe ko ai ʼaē ʼe lagolago ki ai te ʼAtua ia ʼaho nei.
Te ʼu Fakaʼiloga ʼo Te Hahaʼi ʼAē ʼe Lagolago Ki Ai Te ʼAtua
7. Koteā te faka ʼuhiga ʼo te ako ʼaē ʼe fakatafito pe ki te Tohi-Tapu?
7 ʼE nātou fakatafito tanatou ʼu akonaki ki te Tohi-Tapu. Neʼe ʼui fēnei e Sesu: “Ko taku akonaki e mole a aku kae a ia ae nee ina fekaui mai au. Kapau e i ai he tahi e ina fia fai tona finegalo, e ina iloi anai te uhiga o te akonaki, pe mai te Atua, pe e au lea atu maia te au pe.” Pea neʼe ina toe ʼui fēnei: “Ko ae mai te Atua e fakalogo ia ki te u folafola a te Atua.” (Soane 7:16, 17; 8:47) ʼI tona fakahagatonu, ke lagolago te ʼAtua ki he tahi, ʼe tonu ke ina akoʼi pe ki te hahaʼi te ʼu meʼa ʼaē ʼe fakahā ʼi tana Folafola; pea ʼe ina līaki te ʼu akonaki ʼaē ʼe fakatafito ki te poto pea mo te talatisio fakatagata.—Isaia 29:13; Mateo 15:3-9; Kolose 2:8.
8. He koʼe ʼe maʼuhiga ke fakaʼaogaʼi te huafa ʼo te ʼAtua ʼi te tauhi?
8 ʼE nātou fakaʼaogaʼi pea mo tala te huafa ʼo te ʼAtua, ko Sehova. Neʼe fakakikite fēnei e Isaia: “ ʼI te ʼaho ʼaia ʼe koutou ʼui moʼoni anai: ‘Koutou fakafetaʼi kia Sehova! Koutou fetapā ki tona huafa. Koutou fakaʼilo ki te hahaʼi tana ʼu faʼahiga aga. Koutou fakahā ʼe māʼoluga tona huafa. Koutou hiva kia Sehova, he neʼe ina fai te ʼu meʼa fakaofoofo. Ko te meʼa ʼaia ʼe fakaʼilo ʼi te kele katoa.’ ” (Isaia 12:4, 5) Neʼe akoʼi e Sesu tana kau tisipulo ke nātou faikole fēnei: “Ko tamatou Tamai e i Selo, ke tapuha tou Huafa.” (Mateo 6:9) Koia, peʼe ko he Sutea peʼe mole ko he Sutea, kae neʼe tonu ke liliu te kau Kilisitiano ko “he hahai ki [te] huafa [ʼo te ʼAtua].” (Gaue 15:14) ʼE ʼiloga ia ʼe leleiʼia e te ʼAtua te tokoni ʼa te hahaʼi, ʼaē ʼe nātou fiafia ʼi tonatou ʼuhiga “hahai ki tona huafa.”
9. (a) He koʼe ʼe fiafia te hahaʼi ʼo te lotu moʼoni? (b) ʼE fakakeheʼi feafeaʼi e Isaia te lotu moʼoni ʼi te lotu hala?
9 ʼE nātou maʼu te ʼulugaaga fakafiafia ʼo te ʼAtua. ʼI tona ʼuhiga ʼaē ko ia te matapuna ʼo te “Logolelei,” ʼe ko Sehova “ko te ʼAtua fiafia.” (1 Timoteo 1:11, MN ) Koia ʼe fiafia ai tana kau atolasio pea ʼe nātou loto falala tuʼumaʼu. Logola te mālama maveuveu pea mo tonatou ʼu fihifihia takitokotahi, kae ʼe taupau tuʼumaʼu e te kau Kilisitiano tanatou fiafia, koteʼuhi ʼe mahu te meʼa kai fakalaumālie ʼaē ʼe nātou kai kiai tuʼumaʼu. ʼE fakahā e Isaia tanatou kehekehe pea mo te hahaʼi ʼaē ʼe nātou maʼuliʼi te lotu hala: “Koʼeni te folafola ʼa te Tuʼi ʼAliki ko Sehova: ‘Koʼeni ko ʼaku tagata kaugana ʼe kakai anai, kae ko koutou ʼe koutou pakupaku anai. Koʼeni ko ʼaku tagata kaugana ʼe ʼiʼinu anai, kae ko koutou ʼe koutou fia ʼiʼinu anai. Koʼeni ko ʼaku kaugana ʼe nātou fiafia anai, kae ʼe koutou ufiufi anai. Koʼeni ko ʼaku kaugana ʼe nātou kalaga fakafiafia anai, heʼe lelei tonatou loto, kae ko koutou ʼe koutou kalaga anai, heʼe mamahi tokotou loto, pea ʼe koutou kekē anai, ʼuhi ko te mamahi ʼo te ʼatamai.’ ”—Isaia 65:13, 14.
10. He koʼe ʼe mole maʼuli mamahi anai te hahaʼi ʼaē ʼi te lotu moʼoni?
10 Ko tanatou aga pea mo tanatou ʼu tonu, ʼe fakatafito ki te ʼu pelesepeto ʼo te Tohi-Tapu. ʼE tokoniʼi fēnei tatou e te tagata fai tāʼaga lea: “Falala kia Sehova ʼaki tou loto katoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.” (Tāʼaga Lea 3:5, 6) ʼE tokoni te ʼAtua ki te hahaʼi ʼaē ʼe nātou kumi tana takitaki, kae mole nātou falala ki te ʼu akonaki hala ʼa te tagata ʼaē ʼe mole ina maʼu te poto fakaʼatua. Kapau ʼe fia mulimuli lelei he tahi ki te Folafola ʼa te ʼAtua, pea ʼe mole maʼuli mamahi anai ʼuhi he neʼe mole ina fai te fili ʼaē ʼe kovi.—Pesalemo 119:33; 1 Kolonito 1:19-21.
11. (a) He koʼe ʼe mole tou maʼu ʼi te hahaʼi ʼo te lotu moʼoni he kalasi ʼa he kau takitaki lotu pea mo he hahaʼi fakalogo? (b) Koteā te faʼifaʼitaki ʼaē ʼe tuku ki te faga ōvi, e te ʼu tēhina ʼaē ʼe nātou takitaki te hahaʼi ʼa te ʼAtua?
11 ʼE tatau tanatou ʼu fakatuʼutuʼu mo te kokelekasio faka Kilisitiano ʼo te ʼuluaki sēkulō. Neʼe tuku mai e Sesu te pelesepeto ʼaenī: “ ʼAua naʼa fakahigoaʼi koutou ko Lapi, heʼe ko te tokotahi pe ʼe ko tokotou tagata faiako, pea ko koutou ʼe koutou tautehina fuli. Pea tahi foki, ʼaua naʼa koutou fakahigoa he tahi ko hakotou tāmai ʼi te kele, heʼe ko te tokotahi pe ʼe ko takotou Tāmai, ia Ia ʼaē ʼe ʼi selo. ʼAua naʼa fakahigoaʼi koutou ko he ‘kau takitaki,’ heʼe ko te tokotahi pe ʼe ko tokotou Takitaki, ko Kilisito. Kaʼe ko ʼaē ʼe lahi tokotahi ia koutou ʼe tonu ia ke liliu ko takotou tagata faifekau.” (Mateo 23:8-11, MN ) Ko he kokelekasio ʼo he ʼu tēhina ʼe nātou tokakaga anai ke ʼaua naʼa ʼi ai he kalasi ʼo he kau takitaki fialahi ʼe nātou faka maʼuhigaʼi ia nātou totonu ʼaki he ʼu higoa faka tuʼulaga, pea mo fia māʼoluga age ʼi te hahaʼi. (Sopo 32:21, 22) Neʼe fakatotonu age ki te ʼu tēhina ʼaia ke nātou tauhi ki te faga ōvi ʼa te ʼAtua, kae ke “ ʼaua naʼa [nātou] fakakinau, kae ʼaki te lotolelei; ʼo mole fai ʼaki te manako ki he koloā heʼe faitotonu, kae ʼaki he fia gāue mālohi; ʼo mole [nātou] fai ohage ko he ʼu hahaʼi ʼe nātou pule faka ʼaliki kia nātou ʼaē ko te tōfiga ʼa te ʼAtua, kae ke nātou liliu ko ni ʼu faʼifaʼitakiʼaga ki te faga ōvi.” (1 Petelo 5:2, 3, MN ) Ko te kau tagata tauhi ōvi moʼoni, ʼe nātou tokaga naʼa nātou fia puleʼi te tui ʼa ʼihi. ʼI tonatou ʼuhiga kaugā gāue ʼi te tauhi ki te ʼAtua, ʼe nātou faiga tāfito ke nātou tuku he faʼifaʼitaki lelei.—2 Kolonito 1:24.
12. ʼO ʼuhiga mo te ʼu puleʼaga fakatagata, koteā te manatu fakapotopoto ʼaē ʼe fakamaʼua e te ʼAtua ki te hahaʼi ʼaē ʼe nātou fia maʼu tana tokoni?
12 ʼE nātou fakalogo ki te ʼu puleʼaga fakatagata kae ʼe mole nātou kau ki te ʼu meʼa ʼo te malamanei. Ko he tahi ʼe mole “fakalogo . . . ki te ʼu pule māʼoluga” ʼe mole feala ke lagolago ki ai te ʼAtua. Koteā tona tupuʼaga? Koteʼuhi ko “te ʼu pule ʼaē ʼe tuʼu ʼe nātou tahi tuʼu ʼi tona tuʼulaga ʼuhi pe ko te ʼAtua. Koia ko ʼaē ʼe fakafeagai ki te pule ʼe fakafeagai ia ki te fakatuʼutuʼu ʼa te ʼAtua.” (Loma 13:1, 2, MN ) Kae neʼe ʼiloʼi e Sesu ʼe feala ke hoko he fefakafeagaiʼaki, he neʼe ina ʼui fēnei: “Ko mea a Sesale ave kia Sesale, pea mo mea a te Atua ki te Atua.” (Maleko 12:17) Ko te hahaʼi ʼaē ʼe nātou loto ki te tokoni ʼa te ʼAtua, ʼe tonu “ke [nātou] haga kumi muʼa te puleʼaga [ʼo te ʼAtua] pea mo tona faitotonu,” pea mo nātou fakalogo ki te ʼu lao ʼo te fenua ʼaē ʼe mole fakafeagai ki tonatou ʼu maʼua maʼuhiga ʼaē ki te ʼAtua. (Mateo 6:33; Gaue 5:29) Neʼe fakahā lelei e Sesu ki tana kau tisipulo, ʼe tonu ke nātou kehe ʼi te malamanei: “ ʼE mole nātou kau ʼi te malamanei, ohage pe ko ʼau ʼe mole ʼau kau ʼi te malamanei.” Neʼe ina toe ʼui fēnei ki muli age: “Ko toku puleʼaga ʼe mole kau ia ʼi te mālama ʼaenī.”—Soane 17:16, MN; 18:36, MN.
13. ʼE ʼiloga feafeaʼi te ʼofa ʼi te hahaʼi ʼa te ʼAtua?
13 ʼE mole nātou fakapalatahi moʼo “fai ia te lelei ki te tagata fuape.” (Kalate 6:10) Ko te ʼofa faka Kilisitiano ʼe mole fakapalatahi, ʼe ina tali te hahaʼi fuli pe logola tonatou lanu, tonatou ʼuhiga faka ekonomika peʼe ko tanatou faʼahiga ako, tonatou fenua, peʼe ko tanatou lea. ʼE ʼiloga te hahaʼi ʼaē ʼe tokoni ki ai te ʼAtua heʼe nātou fai te lelei ki te tagata fuape kae tāfito ki te hahaʼi ʼaē ʼe tauhi fakatahi mo nātou. Neʼe ʼui fēnei e Sesu: “Aki te mea aia, e iloi anai e te tagata fuape, ko koutou ko aku tisipulo, kapau e koutou maù te feʼofaʼofani.”—Soane 13:35; Gaue 10:34, 35.
14. Ko te hahaʼi ʼaē ʼe tali e te ʼAtua ʼe ʼofainaʼi tuʼumaʼu koa nātou e te hahaʼi? Koutou fakamahino.
14 ʼE nātou tali ke fakatagaʼi nātou heʼe nātou fai ia te finegalo ʼo te ʼAtua. Neʼe fakatokagaʼi fēnei e Sesu tana kau tisipulo: “Kapau nee natou fakatagai au pea e natou fakatagai anai mo koutou; kapau nee natou taupau taku folafola pea e natou taupau anai mo ʼa koutou.” (Soane 15:20; Mateo 5:11, 12; 2 Timoteo 3:12) Ko te hahaʼi ʼaē ʼe lagolago ki ai te ʼAtua, neʼe mole ʼofainaʼi tuʼumaʼu nātou e te hahaʼi, ohage ko Noe ʼaē neʼe ina tauteaʼi te malamanei ʼaki tana tui. (Hepeleo 11:7) Ia ʼaho nei, ko te hahaʼi ʼaē ʼe nātou loto ke lagolago age te ʼAtua kia nātou, ʼe mole nātou meʼa noaʼi te folafola ʼa te ʼAtua peʼe nātou fakafisi ki tana ʼu pelesepeto ke nātou hāo mai te ʼu fakataga. Kapau ʼe nātou haga tauhi agatonu ki te ʼAtua, pea ʼe nātou ʼiloʼi ko te hahaʼi “ ʼe nātou punamaʼuli [anai] pea ʼe nātou talanoa kovi” [anai] ʼo ʼuhiga mo nātou.—1 Petelo 2:12; 3:16; 4:4, MN.
Ko Tanatou ʼu Gāue ʼAki Te Temi
15, 16. (a) Koteā te ʼu fehuʼi ʼaē ka tokoni anai kia tatou ke tou ʼiloʼi te kūtuga lotu ʼaē ʼe lagolago ki ai te ʼAtua? (b) Koteā te palalau ʼaē ʼe fai e te toko lauʼi miliona hahaʼi, pea koteā tona tupuʼaga?
15 Koutou fai te ʼu fehuʼi ʼaenī: ‘Ko te kūtuga lotu fea ʼaē ʼe fakatokagaʼi tanatou mulimuli lelei ki te Folafola ʼa te ʼAtua, tatau aipe mokā ʼe mole tatau tanatou ʼu akonaki pea mo te ʼu akonaki ʼa te hahaʼi tokolahi? Ko ai ʼaē ʼe nātou faka maʼuhigaʼi te huafa ʼo te ʼAtua, pea mo nātou fakaʼaogaʼi te huafa ʼaia kia nātou? Ko ai ʼaē ʼe falala ko te Puleʼaga ʼo te ʼAtua ʼe ko te puleʼaki pe ʼaia e tahi ki te ʼu fihifihia ʼa te tagata fuape? Ko ai ʼaē ʼe mulimuli ki te ʼu lekula faka Tohi-Tapu ʼo ʼuhiga mo te ʼu aga ʼaē ʼe tonu ke fai, tatau aipe peʼe vāʼi nātou? Ko ai te kūtuga ʼaē neʼe fakatokagaʼi ʼe mole ʼi ai hanatou kau takitaki lotu ʼe totogi, pea ko tana ʼu hahaʼi fuli ʼe ko te kau fai faka mafola? Ko ai ʼaē ʼe vikiʼi ʼuhi ko tanatou fakalogo ki te ʼu lao ʼo te fenua, logola tanatou mole kau ki te ʼu meʼa faka politike? Ko ai ʼaē ʼe ina foaki fakaʼofa tona temi pea mo tana falā, moʼo tokoni ki te hahaʼi ke nātou ako pe ko ai te ʼAtua pea mo tana ʼu fakatuʼutuʼu? Pea logola te ʼu meʼa lelei fuli ʼaia, ko ai ʼaē ʼe manukinuki, mo fakalainoaʼi, pea mo fakatagaʼi?’
16 Ko te lauʼi miliona hahaʼi ʼi te malamanei katoa, kua nātou mahino ki te ʼu meʼa ʼaia pea kua nātou faka tui ko te kau Fakamoʼoni ʼa Sehova pe ʼaē ʼe nātou maʼuliʼi te lotu moʼoni. Neʼe nātou mahino ki te faʼahi ʼaia ʼaki te ako ʼaē neʼe nātou maʼu mai te kau Fakamoʼoni ʼa Sehova, pea mo tanatou faʼahiga aga, pea mo te ʼu lelei ʼaē neʼe nātou maʼu mai tanatou lotu. (Isaia 48:17) Ohage ko tona fakakikite ia Sakalia 8:23, ʼe ʼui fēnei e te toko lauʼi miliona: “ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou.”
17. He koʼe ʼe mole ko he fialahi ʼa te kau Fakamoʼoni ʼa Sehova tanatou fakahā ʼe ko nātou ia te lotu moʼoni?
17 ʼE ko he fialahi koa ʼa te kau Fakamoʼoni ʼa Sehova hanatou ʼui ko nātou tokotahi pe ʼaē ʼe lagolago ki ai te ʼAtua? Kailoa, heʼe tatau mo te kau Iselaele ʼi Esipito, ʼaē neʼe nātou tala ʼe lagolago te ʼAtua kia nātou, logola te ʼu akonaki ʼa te kau Esipito, peʼe ko te kau Kilisitiano ʼo te ʼuluaki sēkulō ʼaē neʼe nātou tala ʼe lagolago te ʼAtua kia nātou, kae ina līaki te hahaʼi ʼo te lotu faka Sutea. ʼE fakamoʼoni tanatou ʼu gāue ki te ʼu meʼa ʼaē ʼe nātou faka mafola. ʼE fakahoko e te kau Fakamoʼoni ʼa Sehova ʼi te ʼu fenua e 235 te gāue ʼaē neʼe fakakikite e Sesu ʼe fai anai e tana kau tisipulo moʼoni ʼi te temi fakaʼosi: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.”—Mateo 24:14, MN.
18, 19. (a) He koʼe ʼe mole tonu ke tuku e te kau Fakamoʼoni ʼa Sehova tanatou gāue fai faka mafola, logola te ʼu fakafeagai ʼaē kia nātou? (b) ʼE hā feafeaʼi ia Pesalemo 41:11 ʼe lagolago te ʼAtua ki te kau Fakamoʼoni?
18 ʼE hoko atu anai te tala e te kau Fakamoʼoni ʼa Sehova te logo ʼaia, ʼo mole nātou tuku ki te ʼu fakataga peʼe ko te ʼu fakafeagai ke nātou tāʼofi tanatou gāue. ʼE tonu ke fakahoko te gāue ʼa Sehova pea ʼe fakahoko anai. Neʼe mole he fua ʼa te ʼu faiga ʼa ʼihi ʼi te ʼu sēkulō kua hili, moʼo fakagata te gāue ʼa te kau Fakamoʼoni, he neʼe fakapapau fēnei e Sehova: “Ko te ʼu mahafu tau fuli ʼaē ka faʼu anai moʼo fakafeagai kia te koe ʼe mole lava anai, pea ko te ʼu lea fuli ʼaē ʼe fakafeagai anai kia te koe ʼi he fakamāu, ʼe ke tauteaʼi anai. Koʼena te tofiʼa ʼa te kau kaugana ʼa Sehova, pea ko tanatou faitotonu ʼe haʼu mai ia te ʼau.”—Isaia 54:17.
19 Mai tona ʼaluʼaga ʼaē kua mālohi age te kau Fakamoʼoni ʼa Sehova pea mo gāue lahi age ia ʼaho nei—logola te ʼu fakafeagai ʼa te malamanei—ʼe ko he fakamoʼoni ʼe leleiʼia e Sehova te gāue ʼaē ʼe nātou fai. Neʼe ʼui fēnei e te Hau ko Tavite: “ ʼAki te meʼa ʼaia ʼe ʼau ʼiloʼi moʼoni neʼe ke fiafia ia te ʼau, koteʼuhi ko toku fili ʼe mole kalaga fakafiafia he neʼe mālo ia te ʼau.” (Pesalemo 41:11; 56:9, 11) Ko te ʼu fili ʼo te ʼAtua ʼe mole nātou lava kalaga fakafiafia anai ʼi he temi he neʼe nātou mālo ʼi te hahaʼi ʼa Sehova, koteʼuhi ʼe takitaki te hahaʼi ʼaia e Sesu Kilisito ʼaē ʼe mālo anai ʼi te fakaʼosi!
ʼE Feala Koa Hakotou Tali?
• Ko ai te ʼu faʼifaʼitaki ʼi te temi muʼa neʼe lagolago ki ai te ʼAtua?
• Koteā te ʼu agaaga ʼo te lotu moʼoni?
• He koʼe ʼe tou ʼiloʼi papau ʼe lagolago te ʼAtua ki te kau Fakamoʼoni ʼa Sehova?
[Paki ʼo te pasina 13]
Ko nātou ʼaē ʼe nātou loto ke lagolago age te ʼAtua, ʼe tonu ke nātou fakatafito tanatou ʼu akonaki ki tana Folafola
[Paki ʼo te pasina 15]
Te ʼu tagata ʼāfea ʼe ko he faʼifaʼitaki ki te faga ōvi