Te ʼu Fehuʼi ʼa Te Kau Lautohi
ʼE lava ʼiloʼi koa e Satana te Tevolo te ʼu meʼa ʼaē ʼi te fakakaukau ʼa te tagata?
Logope ʼe mole feala ke tou ʼui papau ei peʼe kailoa, kae ʼe ʼiloga mai ʼe mole lava ʼiloʼi e Satana peʼe ko tana kau temonio te ʼu meʼa ʼaē ʼi tatatou ʼu fakakaukau.
Koutou fakatokagaʼi age muʼa te ʼu higoa ʼaē ʼe fakatoʼo moʼo fakamatalatala ia Satana. ʼE fakahigoaʼi ia ia ko Satana (Ko He Tahi ʼe Fakafeagai), ko Tevolo (Ko He Tahi ʼe Fasituʼu), ko te Gata (ʼe tatau mo he Tahi ʼe Aga Fakakākā), ko Fakahala, pea ko Gutu Loi. (Sopo 1:6; Mateo 4:3; Soane 8:44; 2 Kolonito 11:3; Apokalipesi 12:9) ʼE mole ʼi ai he higoa ʼi te ʼu higoa ʼaia ʼe ina fakahā ʼe lava sio ia Satana ki tatatou ʼu fakakaukau.
Kae ʼe ʼui ʼo ʼuhiga mo Sehova ʼAtua “ ʼe ina sivisivi te ʼu loto.” (Tāʼaga Lea 17:3; 1 Samuele 16:7; 1 Fakamatala 29:17) ʼE ʼui ia Hepeleo 4:13 (MN ): “ ʼE mole ʼi ai he fakatupu ʼe puli ki te sio [ʼa Sehova], kae ko meʼa fuli pe ʼe telefua pea mo ʼātea kia mata ʼo ia ʼaē ʼe tonu ke ina fakamāuʼi tatou.” ʼE mole tou punamaʼuli ki te foaki e Sehova ki tona ʼAlo ko Sesu ia te fealagia ʼaē ke ina sivisivi te ʼu loto. Neʼe tala fēnei e Sesu ʼi tona kua fakatuʼuake: “Ko ʼau ia ia ʼaē ʼe ina vakaʼi te ʼu ifiifi pea mo te ʼu loto, pea ʼe ʼau foaki atu anai kia koutou takitokotahi ʼo mulimuli pe ki takotou ʼu gāue.”—Apokalipesi 2:23, MN.
ʼE mole ʼui mai e te Tohi-Tapu ʼe lava sio ia Satana ki te ʼu loto pea mo te ʼu fakakaukau ʼa te tagata. ʼE maʼuhiga te faʼahi ʼaia, koteʼuhi ʼe fakamoʼoni mai e te ʼapositolo ko Paulo ko te kau Kilisitiano “ ʼe mole pulipuli kia [nātou] te ʼu fakatuʼutuʼu [ʼa Satana].” (2 Kolonito 2:11, MN ) Koia ʼe mole tonu ai ke tou tuʼania ki te maʼu e Satana he fealagia makehe ʼe mole tou mālama kiai.
Kae ʼe mole tonu ke tou ʼui ko totatou Fili ʼe mole ina lava ʼiloʼi totatou ʼu vaivaiʼaga. Kua fualoa ʼaupito te sivisivi e Satana ia te agaaga ʼo te tagata. ʼE mole ʼaoga kia ia ke sio ki te ʼu meʼa ʼaē ʼi tatatou fakakaukau, ke ina ʼiloʼi ai tatatou faʼahiga aga, mo tatatou faʼahiga fakafiafia, peʼe logo ki te ʼu meʼa ʼaē ʼe tou palalau kiai, pea mo te tahi ʼu meʼa. ʼE feala pe ke ʼiloga ʼi ʼotatou fofoga peʼe ʼi te agaaga ʼo totatou sino ia te meʼa ʼaē ʼe tou manatu kiai peʼe tou logoʼi.
Kae ʼi te agamāhani, ʼe fakaʼaogaʼi pe e Satana te faʼahiga kākā ʼaē neʼe ina fakaʼaogaʼi ʼi te ʼōloto ʼo Eteni—te loi, mo te kākā, pea mo te ʼu logo hala ʼaē ʼe feʼāveʼaki. (Senesi 3:1-5) Logope ʼe mole tonu ke tuʼaniaʼi te kau Kilisitiano naʼa sio ia Satana ki ʼanatou fakakaukau, kae ʼe tonu aipe ke nātou tokakaga ki te ʼu faʼahiga manatu ʼe faigaʼi e Satana ke ina fakahū ki tanatou fakakaukau. Ko te loto ʼo Satana ke liliu te kau Kilisitiano ʼo “fakahehema tonatou loto pea mo puli ia nātou te moʼoni.” (1 Timoteo 6:5, MN ) Koia ʼe mole tou punamaʼuli ai ki te ʼu tuʼuga logo fakahehema pea mo te ʼu tuʼuga fakafiafia ʼe maʼu ʼi te mālama ʼa Satana. Moʼo teteke ʼo te ʼohofi ʼaia, ʼe tonu ki te kau Kilisitiano ke nātou puipui tanatou ʼu fakakaukau ʼo nātou kofuʼi “te puloga o te fakamauli.” (Efeso 6:17) ʼE nātou fakahoko te faʼahi ʼaia ʼaki te fakafonu ʼo tanatou fakakaukau ki te ʼu moʼoni faka Tohi-Tapu pea mo fakamamaʼo mai te ʼu faʼahi fakatupu tuʼutāmaki ʼo te mālama ʼa Satana.
Ko Satana ʼe ko he fili fakaofoofo. Kae ʼe mole tonu ke tou tuʼania fakavale ia ia mo tana kau temonio. ʼE fakaloto mālohiʼi fēnei tatou e Sakopo 4:7 (MN ): “Koutou fakafeagai ki te Tevolo, pea ʼe hola mamaʼo anai ia koutou.” Kapau ʼe tou muliʼi te tokoni ʼaia, ʼe tou lava ʼui anai ohage ko Sesu, ko Satana ʼe mole maʼu hana puke ia tatou.—Soane 14:30.