Ko Ai Te ʼu Fili ʼo Te ʼAtua?

Te fili tāfito ʼo te ʼAtua ʼe ko Satana te Tevolo. ʼE ko he laumālie neʼe agatuʼu kia Sehova. ʼE kei hoko atu te fakafeagai ʼa Satana ki te ʼAtua, pea ʼe ina fakatupu te ʼu faigataʼaʼia ki te tagata. ʼE agakovi Satana, mo gutuloi pea mo fai fakapō.—Soane 8:44.

Ko te tahi ʼu laumālie neʼe nātou fakatahi mo Satana ʼi tana agatuʼu ki te ʼAtua. ʼE fakahigoa nātou e te Tohi-Tapu ko te kau temonio. Ohage ko Satana, ko te kau temonio ʼe ko he ʼu fili ʼo te tagata, pea ʼe nātou leleiʼia te gaohi koviʼi ʼo te hahaʼi. (Mateo 9:32, 33; 12:22) ʼE fakaʼauha anai e Sehova ia Satana pea mo tana kau temonio ʼo talu ai. ʼE kei toe pe tonatou kiʼi temi nounou moʼo gaohi koviʼi ʼo te hahaʼi.—Apokalipesi 12:12.

Kapau ʼe koutou fia kaumeʼa mo te ʼAtua, pea ʼe mole tonu ke koutou fai te ʼu meʼa ʼaē ʼe loto kiai Satana. Ko Satana mo tana kau temonio ʼe nātou fehiʼa kia Sehova. ʼE ko he ʼu fili ʼo te ʼAtua, pea ʼe nātou loto ke koutou liliu mo koutou ko hana ʼu fili. ʼE tonu ke koutou filifili pe ko ai ʼaē ʼe koutou fia lelei ki ai—ko Satana pe ko Sehova. Kapau ʼe koutou fia maʼu te maʼuli heʼegata, pea ʼe tonu ke koutou filifili ke koutou fai te finegalo ʼo te ʼAtua. ʼE lahi te ʼu hele pea mo te ʼu faʼahiga fai ʼa Satana moʼo kākāʼi te hahaʼi. ʼE ina kākāʼi te tokolahi ʼo te hahaʼi.—Apokalipesi 12:9.