Fā Talatuku: Ko Te ʼAtua ʼe Ko He Tahitolu

ʼE haʼu maifea ia te talatuku ʼaia? “ ʼI te vakavakaʼi fakamuli, ʼe hagē mai ko te akonaki ʼo te Tahitolu neʼe faʼu ʼi te fakaʼosiʼosi ʼo te fā sēkulō. Pea ʼe moʼoni ia te manatu ʼaia . . . [Koteʼuhi] ko te ʼui ʼaē ko ‘he ʼAtua ʼe ʼIpotasi tolu’ neʼe mole heʼeki fakatuʼu mālohi, pea neʼe lagi mole heʼeki akoʼi ʼi te maʼuli Fakakilisitiano pea mo te ʼu gāue ʼaē ʼe ʼalutahi mo tanatou tui, ʼi muʼa ʼo te fakaʼosi ʼo te fā sēkulō.”—New Catholic Encyclopedia (1967), Tohi 14, pāsina 299.

“Ko te Fono ʼi Nicée ʼaē neʼe fai ʼi te ʼaho 20 ʼo Maio ʼo te taʼu 325 ʼo totatou temi, neʼe ko Constantin totonu ʼaē neʼe ina takitaki te fono ʼaia, ʼo fai mālohi te ʼu tālaga, pea neʼe ko ia totonu ʼaē neʼe talanoa . . . ki te akonaki lahi ʼaē neʼe fakahā ai ia te vāhaʼa ʼo Kilisito mo te ʼAtua ʼaē neʼe tohi ʼi te pepa neʼe tā e te fono, neʼe ʼui ai ‘ ʼe tatau ia [Kilisito] mo te Tamai.’ . . . ʼI te mātataku ʼaē ʼa te kau ʼēpikopō ki te pule, neʼe natou sinie ai te pepa ʼaia, gata pē ki te ʼu ʼēpikopō e toko lua, kae tokolahi te kau ʼēpikopō neʼe natou sinie kae neʼe mole natou tali te tonu ʼaia.”—Encyclopædia Britannica (1970), Tohi 6, pāsina 386.

Koteā te manatu ʼi te Tohi-Tapu? “Kae nee fonu ia [Setefano] i te Laumalie-Maonioni, nee tagaki ake ona fofoga ki te lagi pea nee mamata ki te kololia o te Atua mo Sesu e tuu i te toomatau o te Atua. Pea nee ui maʼana: ‘Koeni, e au mamata ki te ava o Selo pea mo te Foha o te tagata e tuu i te toomatau o te Atua.’ ”—Gāue 7:55, 56, Tauhi Foou.

Koteā ʼaē ʼe tou mahino kiai? ʼI tana fonu ʼi te mālohi gāue ʼo te ʼAtua, neʼe sio ia Setefano kiā Sesu “e tuu i te toomatau o te Atua.” Koia ʼe hā lelei mai ai, neʼe mole liliu ia Sesu ʼo ʼAtua ʼi tona ʼosi fakatuʼuake ʼaē ki selō, kae neʼe liliu ia ko he tahi ʼe fakalaumālie ʼe kehe mo te ʼAtua. ʼE mole talanoa ʼi te vaega ki he tolu ʼipotasi iā tafa ʼo te ʼAtua. Logolā ia te ʼu faiga ʼaē ke maʼu he ʼu vaega Fakatohi-tapu ʼe lagolago ki te akonaki ʼo te Tahitolu, kae ko te pātele Dominicain ko Marie-Émile Boismard, neʼe ina ʼui fēnei ʼi tana tohi À lʼaube du christianisme — La naissance des dogmes (ʼI te kamataʼaga ʼo te lotu fakakilisitiano—Te faʼu ʼo te ʼu akonaki): “Ko te ʼui ʼaē ʼe ʼi ai te ʼu ʼipotasi e tolu ʼi he ʼAtua e tahi . . . ʼe mole tou maʼu ia te manatu ʼaia ʼi he vaega ʼo te Tauhi Foʼou.”

Ko te akonaki ʼaē neʼe lagolago kiai ia Constantin neʼe fakatuʼu ia moʼo fakagata ia te ʼu fihi ʼaē neʼe hoko ʼi te ’Ēkelesia ʼo te fā sēkulō. Kae neʼe ina lagaʼi moʼoni te tahi age fehuʼi: Ko Malia, ʼaē neʼe ina fuafatuʼi moʼoni ia Sesu, neʼe ko “te Faʼē [koa] ʼa te ʼAtua”?

Vakaʼi ia te ʼu vaega Fakatohi-Tapu ʼaenī: Mateo 26:39; Soane 14:28; 1 Kolonito 15:27, 28; Kolose 1:15, 16

TE MANATU ʼAĒ ʼE MOʼONI:

Ko te akonaki ʼo te Tahitolu neʼe faʼu ʼi te fā sēkulō

[Haʼuʼaga ʼo te paki pasina 7]

Museo Bardini, Florence