Tou Fakamālohiʼi Tatatou Falala Ki Te Faitotonu ʼa Te ʼAtua

“Neʼe ʼau foaki atu kia te koe te ʼatamai mālama ke ke falala kia Sehova totonu.”​—Tāʼaga Lea 22:19.

1, 2. (a) He koʼe ʼe falala te kau Fakamoʼoni ʼa Sehova ki te ʼAtua? (Tāʼaga Lea 22:​19) (b) Koteā ʼaē ʼe hā ʼaki mai ʼe ʼi ai ʼihi ʼe tonu ke nātou fakamālohiʼi tanatou falala kia Sehova?

ʼE MAʼU e te kau Kilisitiano moʼoni te ʼatamai mālama ʼo ʼuhiga mo Sehova pea mo tana ʼu fakatuʼutuʼu. ʼAki he lotoʼofa, ʼe foaki kia nātou e te “tagata kaugana agatonu mo poto” te “meʼa kai [fakalaumālie] ʼi tona temi totonu.” (Mateo 24:45) ʼAki te ʼatamai mālama ʼaia, ʼe nātou maʼu ai he tafitoʼaga mālohi ke nātou falala ki te ʼAtua. Koia, ʼe fakahā e te kau Fakamoʼoni ʼa Sehova fuli tanatou falala mālohi kia Sehova pea mo tana faitotonu.

² Kae ʼe hage ʼe ʼaoga ki ʼihi kau Fakamoʼoni ke fakamālohiʼi tanatou falala. ʼE tautau momoli ki te Sosiete te ʼu tohi ʼe hā ai te ʼu mahalohalo ʼa ʼihi ʼo ʼuhiga mo he ʼu fakamahino neʼe fai ʼi te ʼu tohi ʼa te Sosiete. ʼE lagi hoko te ʼu faʼahi ʼaia ʼuhi ko te ʼu fetogi ʼaē neʼe fai ʼo ʼuhiga mo te ʼu meʼa ʼaē kua tou mahino kiai, peʼe lagi ko he ʼu meʼa neʼe mole faʼa leleiʼia e ʼihi, neʼe lave kovi tāfito ki tonatou loto.​—Vakaʼi ia Soane 6:​60, 61.

3. Koteā ʼaē ʼe feala ke hoko ki te ʼu kaugana agatonu ʼa Sehova, pea koteā tona tupuʼaga?

³ Māʼia mo te kau kaugana moʼoni ʼa Sehova ʼe hoko kia nātou te meʼa ʼaē neʼe ʼui ia Tagata Tānaki 9:​11: “Neʼe ʼau maliu pea neʼe ʼau mamata ʼi te lalo laʼā ʼe mole ʼa te tagata vaʼevave ia te mālo ʼi te lele, peʼe ʼa te tagata mālohi ia te mālo ʼi te tau, peʼe ʼa te kau popoto ia te maʼu ʼo te meʼa kai, pea ʼe mole ʼa te hahaʼi ʼatamai te maʼu ʼo te ʼu koloā, pea ʼe mole ko nātou ʼaē ʼe nātou maʼu te ʼatamai mālama ʼaē ka nātou maʼu anai te ʼofa, heʼe ko te ʼu temi pea mo te ʼu meʼa fakafokifā ʼe hoko ia kia nātou fuli.” E feafeaʼi te moʼoni ʼo te ʼu palalau ʼaia ʼi hona ʼaluʼaga lahi peʼe ʼi te faʼahi fakalaumālie? ʼE lagi tou ʼiloʼi he ʼu Kilisitiano neʼe mole tuai tanatou maʼuliʼi te ʼu tokoni ʼo te Tohi-Tapu, neʼe nātou lagolago mālohi ki te moʼoni, mo popoto ʼi te maʼuliʼi ʼo te ʼu pelesepeto ʼo te Tohi-Tapu, pea mo nātou kumi mālohi te ʼatamai mālama totonu. Kae ʼuhi ko “te ʼu temi pea mo te ʼu meʼa fakafokifā [ʼaē] ʼe hoko,” kua lagi mole kei feala kia ʼihi ke nātou gāue mālohi kia Sehova, he neʼe fakaʼī nātou peʼe kua nātou matutuʼa. ʼE lagi nātou feʼekeʼaki peʼe nātou maʼuʼuli haohaoa anai ʼo aʼu ki te mālama foʼou ʼa te ʼAtua.

4, 5. He koʼe ʼe mole tonu ke puli te falala ʼa te kau Kilisitiano ki te faitotonu ʼa Sehova?

⁴ Mokā mate he ʼohoana ʼo he Kilisitiano, pea ʼe lotomamahi ʼaupito. ʼI tonā ʼuhiga taumatuʼa, neʼe lagi nā tauhi kia Sehova lolotoga ni ʼu taʼu. ʼE ʼiloʼi e ia ʼaē ʼe kei maʼuli ko te mate ʼe ina fakamavete tanā nofo ʼohoana.a (1 Kolonito 7:​39) ʼI te temi ʼaia, ke ʼaua naʼa vaivai tana falala, ʼe tonu ke ina lolomi te ʼu meʼa ʼaē ʼi tona loto.​—Vakaʼi ia Maleko 16:⁠8.

⁵ ʼE ko he meʼa fakapotopoto hakita manatu ko te mate ʼo tokita ʼohoana, pe ko takita faʼe, pe ko takita tāmai, pe ko he fānau, pe ko hokita kaumeʼa Kilisitiano, ʼe ko he fealagia ʼaia ke kita fakahā takita falala ki te faitotonu ʼa Sehova! Pea tatau aipe peʼe tonu ke tou mamate, kae ʼe feala ke tou falala ʼe mole heʼe faitotonu ia Sehova. ʼE feala ke tou falala ʼe fiafia anai ia nātou fuli ʼaē ka nātou maʼu te maʼuli heʼegata​—peʼe nātou hāo anai ʼi te mamahi lahi peʼe fakatuʼuake anai nātou. ʼO ʼuhiga mo te ʼAtua, ʼe ʼui fēnei e te tagata fai pesalemo: “ ʼE ke avahi tou nima pea ʼe ke fakafimālie te loto ʼo te meʼa maʼuli fuli pe. Ko Sehova ʼe faitotonu ʼi tona ʼu ala fuli pea ʼe agatonu ʼi tana ʼu gāue fuli. ʼE ōvi ia Sehova kia nātou fuli ʼaē ʼe nātou fetapā kia te ia, ʼaki te moʼoni. ʼE ina fakahoko anai te holi ʼo nātou ʼaē ʼe manavasiʼi kia te ia, pea ʼe logo anai ki tanatou tagi ʼaē ke tokoni age kia nātou, pea ʼe ina hāofaki anai nātou.”​—Pesalemo 145:⁠16-​19.

Kapau ʼe Tou Manatu Neʼe Tou Mamahi Kae Neʼe Mole Hona ʼAoga

6, 7. (a) ʼI te temi ʼaenī, he koʼe ʼe feala ke fetogi te mahino ʼo ʼihi kau Fakamoʼoni ʼaē neʼe mamahi ki muʼa atu? (b) He koʼe ʼe mole tonu ke tou manatu neʼe heʼe faitotonu ia Sehova ʼi tana tuku ke hoko te meʼa ʼaia ki muʼa atu?

⁶ ʼI muʼa atu, neʼe gaohi koviʼi ʼihi kau Fakamoʼoni, he neʼe nātou fakafisi ki he ʼu meʼa ʼe kua fakagafua ʼi te temi nei e tonatou leʼo ʼo loto ke nātou fai. Lagi ki muʼa atu neʼe nātou fakafisi ki he ʼu faʼahiga gāue faka sivile. ʼI te temi nei, kua lagi fakafuafua e he tēhina, ʼe fakagafua e tona leʼo ʼo loto ke ina fai te faʼahi ʼaia, pea ʼi tana fai te faʼahi ʼaia ʼe mole kau ia ki te tuʼu ʼo te ʼu faʼahiga meʼa ʼaenī.

⁷ Neʼe heʼe faitotonu koa ia Sehova ʼi tana tuku ʼaē ke gaohi koviʼi te tēhina ʼaia he neʼe fakafisi ki he meʼa kua gafua ke ina fai ʼi te temi nei? ʼE mole ko te manatu ʼaia ʼa te tokolahi ʼaē neʼe gaohi koviʼi. Kailoa, kae ʼe nātou fiafia he neʼe ko te fealagia ʼaia ke nātou fakahā lelei ki te hahaʼi neʼe kua nātou fakatotonu ke nātou lagolago mālohi ki te pule faʼifaʼitaliha ʼa Sehova ʼi te ʼatulaulau. (Vakaʼi ia Sopo 27:5.) ʼE ʼi ai anai koa he tupuʼaga ke lotomamahi he tahi he neʼe mulimuli ki tona leʼo ʼo loto pea neʼe lagolago mālohi kia Sehova? Ko tanatou lagolago agatonu ʼaia ki tanatou mahino ki te ʼu pelesepeto faka Kilisitiano pe ko tanatou mulimuli fakalelei ki tonatou leʼo ʼo loto, neʼe ko he fakamoʼoni ʼaia ʼe tāu mo nātou ke nātou kaumeʼa mo Sehova. ʼE mahino papau ia, ʼe ko he aga fakapotopoto te teteke ʼa he tahi he meʼa ʼe feala ke fakatupu kovi ki tona leʼo ʼo loto, peʼe tupu ʼaki ai he lotovaivai ʼo ʼihi. ʼO ʼuhiga mo te faʼahi ʼaia, ʼe feala ke tou manatuʼi mo te faʼifaʼitaki ʼaē neʼe tuku mai e te ʼapositolo ko Paulo.​—1 Kolonito 8:​12, 13; 10:31-​33.

8. ʼO ʼuhiga mo te faitotonu ʼa Sehova, he koʼe neʼe mole tonu ke lotolotolua te kau Kilisitiano Sutea ʼaē neʼe nātou mulimuli ʼi te temi muʼa ki te Lao?

⁸ Moʼo fakafiafia ia Sehova, neʼe fakamaʼua ki te kau Sutea ke nātou mulimuli ki te ʼu Folafola e Hogofulu pea mo te ʼu tuʼuga lao kehekehe e 600 ʼaē neʼe hilifaki kiai. Ki muli age, ʼi te fakatuʼutuʼu faka Kilisitiano, neʼe mole kei fakamaʼua ki te hahaʼi, ʼo feiā mo te kau Sutea, ke nātou fakalogo ki te ʼu lao ʼaia ʼi tanatou tauhi kia Sehova. Neʼe mole kei maʼua ke nātou mulimuli ki te ʼu lao ohage ko te silikosisio, te Sapato, te momoli ʼo he ʼu sakilifisio manu, pea mo te ʼu meʼa ʼaē neʼe mole tonu ke nātou kai. (1 Kolonito 7:​19; 10:25; Kolose 2:​16, 17; Hepeleo 10:​1, 11-​14) Ko te kau Sutea ʼaē neʼe liliu ko he kau Kilisitiano​—ʼo kau ki ai mo te kau ʼapositolo​—neʼe mole kei fakamaʼua kia nātou ke nātou mulimuli ki te ʼu lao ʼaē neʼe fakamaʼua age ke nātou mulimuli kiai, ʼi tanatou kei nonofo ʼi te fuakava ʼo te Lao. Neʼe nātou meo koa, ʼo nātou ʼui neʼe heʼe faitotonu te ʼu fakatuʼutuʼu ʼa te ʼAtua he ki muʼa atu, neʼe ina fakamaʼua kia nātou he ʼu meʼa neʼe mole kei ʼaoga? Kailoa, kae neʼe nātou fakafiafia ʼi te fakamahino foʼou ʼaia ʼo te ʼu fakatuʼutuʼu ʼa Sehova.​—Gāue 16:​4, 5.

9. Koteā ʼaē neʼe hoko ki ʼihi kau Fakamoʼoni, kae he koʼe ʼe mole tonu ke nātou fakahemala ki te ʼu meʼa ʼaia?

⁹ ʼI totatou temi, neʼe ʼi ai te kau Fakamoʼoni neʼe fefeka tanatou manatu ʼo ʼuhiga mo te ʼu meʼa ʼaē ʼe tonu ke nātou fai pea mo te ʼu meʼa ʼaē ʼe mole tonu ke nātou fai. Koia neʼe lahi ai te ʼu mamahi ʼaē neʼe hoko kia nātou. Ki muli age, ko te ʼu faka mālamagia foʼou, neʼe tokoni kia nātou ke toe lahi age tanatou mahino ki te ʼu meʼa. Kae ʼe mole tonu ke nātou fakahemala ki tanatou mulimuli ki muʼa atu ki tonatou leʼo ʼo loto, māʼiape la pe neʼe nātou mamahi ʼaupito ai. Kae ʼe tonu ke vikiʼi tanatou tali te ʼu mamahi ʼaē neʼe hoko kia nātou, ʼuhi ko tanatou fia nofo agatonu kia Sehova, pea mo tanatou “fai ia meʼa fuli ʼuhi ko te logo lelei.” ʼE tapuakina e Sehova te tauhi fakamalotoloto ʼaia. (1 Kolonito 9:​23; Hepeleo 6:​10) ʼAki he fakasiosio tonu, neʼe tohi fēnei e te ʼapositolo ko Petelo: “Kapau, ʼi takotou fai te meʼa ʼaē ʼe lelei pea mo koutou mamahi, ʼe koutou kātakiʼi, pea ʼe ko he meʼa lelei ki te ʼAtua.”​—1 Petelo 2:⁠20.

Tou Ako Mai Te Faʼifaʼitaki ʼa Sonasi

10, 11. Neʼe fakahā feafeaʼi e Sonasi tana mole falala kia Sehova (a) ʼi te fakatotonu ʼaē ke ʼalu ki Ninive? (b) ʼi te temi ʼaē neʼe mole fakaʼauha ai e te ʼAtua te kau Ninive?

¹⁰ ʼI te temi ʼaē neʼe fakatotonu ai ke ʼalu ki Ninive, neʼe mole loto fakafetaʼi ia Sonasi ki te falala ʼa Sehova kia ia. ʼI te ʼosi hoko ʼo te meʼa fakamataku kia ia ʼuhi ko tana mole fia fakalogo, neʼe toe fakakaukau ai ia Sonasi, ʼo mahino ki tana faihala, pea neʼe ina tali ai leva ke ʼalu ki te fenua matāpule, pea neʼe ina fakatokaga ki te kau Ninive te kua ōvi mai ʼo te fakaʼauha. Pea neʼe hoko te meʼa fakapunamaʼuli: ʼI te loto fakahemala ʼa te kau Ninive, neʼe fakatotonu ai e Sehova ke mole ina fakaʼauha ia nātou.​—Sonasi 1:​1–​3:⁠10.

¹¹ Koteā ʼaē neʼe fai e Sonasi? Neʼe ʼita, pea neʼe faikole ʼo meo ki te ʼAtua. Neʼe lagi meo fēnei: ‘Neʼe ʼau ʼiloʼi lelei pe ʼe hoko feiā anai. Ko te tupuʼaga la ʼaia ʼo taku mole fia haʼu ki Ninive ʼi te kamata. ʼI te temi nei, ʼi te ʼosi ʼo te ʼu meʼa fuli ʼaē neʼe hoko kia ʼau, taku mataku pea mo toku lainoaʼi ʼi toku folo e te foʼi ika, pea ʼi taku ʼosi gāue kinakina moʼo fakatokaga te kau Ninive ki te ōvi mai ʼo te fakaʼauha, ʼe ʼau sio ʼe mole he ʼaoga ʼo taku ʼu gāue fuli ʼaia pea mo te ʼu mamahi ʼaē neʼe hoko kia ʼau! ʼE lelei age pe haku mate!’​—Sonasi 4:​1-3.

12. Koteā ʼaē ʼe tou tāʼofi ʼi te ʼu meʼa ʼaē neʼe hoko kia Sonasi?

¹² Neʼe tonu koa te meo ʼaia ʼa Sonasi? Neʼe heʼe faitotonu koa ia Sehova ʼi tana loto manavaʼofa ki te kau agahala ʼaē neʼe fakahemala? ʼI tona fakahagatonu neʼe tonu ke fiafia ia Sonasi he neʼe mole fakaʼauha te toko lauʼi hogofulu afe hahaʼi! (Sonasi 4:​11) Kae ko tana mole fakaʼapaʼapa ʼaia pea mo tana meo, neʼe hā ʼaki ai ʼe mole falala mālohi ki te faitotonu ʼa Sehova. Neʼe lahi fau tana manatu kia ia totonu, pea ko te hahaʼi neʼe ko he meʼa noa kia ia. Ko te meʼa ʼaē neʼe hoko kia Sonasi, ʼe ko he fakatokaga ʼaia kia tatou ke tou tuku ki muli tatatou ʼu manatu ʼa tatou totonu. Tou tui papau ʼe lelei ke tou fakalogo kia Sehova, ʼo tou mulimuli ki tana takitaki ʼaē ʼe ina fai ʼaki tana kautahi pea mo tou tali te ʼu tonu ʼaē ʼe ina fai. ʼE tou tui papau “ ʼe fua lelei anai kia nātou ʼaē ʼe manavasiʼi ki te ʼAtua moʼoni.”​—Tagata Tānaki 8:​12.

Tou Fakamālohiʼi Tatatou Falala ʼi Te Temi ʼAenī!

13. ʼE lava feafeaʼi kia tatou fuli ke tou fakamālohiʼi tatatou falala kia Sehova?

¹³ ʼE ko he agapoto hatatou falala kia Sehova. (Tāʼaga Lea 3:​5-8) ʼE mahino papau ia, ʼe mole tonu ke gata ʼaki pe tatatou faikole ʼaē kia Sehova ke tokoni mai ke lahi age tatatou falala kia te ia. ʼE tuputupu tatatou falala mokā ʼe fakatafito ki te ʼatamai mālama, koia ʼe tonu ai ke tou ako takitokotahi te Tohi-Tapu mo lau ʼi te ʼaho fuli pea mo te ʼu tohi ʼaē ʼe maʼu ai te ʼu fakamahino faka Tohi-Tapu. ʼE maʼuhiga te kau tuʼumaʼu ki te ʼu fono faka Kilisitiano, pea ʼe toe maʼuhiga foki ke tou teuteuʼi lelei te ʼu fono ʼaia pea mo tou fai hatatou ʼu tali. Ko te tahi meʼa ʼaē ʼe ina fakaloloto anai tatatou falala kia Sehova pea mo tana Folafola, ʼe ko tatatou palalau tuʼumaʼu ki te hahaʼi ʼo ʼuhiga mo te ʼu moʼoni faka Tohi-Tapu, ʼo tou fai he ʼu tali fakapotopoto mokā nātou fakafeagai mai. Kapau ʼe tou fai te ʼu faʼahi ʼaia, pea ʼe tou ʼāsili fakaōvi anai kia te ia ʼi te ʼaho fuli.

14. He koʼe ʼi he kiʼi temi siʼi pe, ʼe tonu anai ke fakahā e te hahaʼi ʼa te ʼAtua, ʼe nātou falala ʼaupito kia Sehova?

¹⁴ Mole tuai, pea ʼe hoko fakafokifā anai ki te malamanei katoa te mamahi ʼaē ʼe lahi tokotahi. (Mateo 24:21) Ka hoko mai anai te ʼaho ʼaia, pea ʼe tonu anai ki te kau kaugana ʼa te ʼAtua ke ʼāsili age tanatou falala ki te faitotonu ʼa Sehova pea mo te takitaki ʼaē ʼo tana kautahi. ʼI hona ʼaluʼaga fakatā, ʼe nātou falala anai ʼo fakalogo ki te fakatotonu ʼaenī ʼa te ʼAtua: “ ʼAlu, taku hahaʼi, hū ki tou ʼu kogafale loto, pea ke ke pupunu tou ʼu matapā. Nono ai ʼi he kiʼi temi siʼisiʼi pe, ʼo aʼu ki te fakalaka ʼa te ʼu laukovi.” (Isaia 26:20) Kua nātou hū ki he ʼu koga meʼa ʼe puipui ai nātou, ko te ʼu kokelekasio e toko 85 000 tupu ia fenua e 232. Tatau aipe peʼe ʼi ai he tahi faka ʼuhiga ʼo te fakatotonu ʼaē ʼe ina ʼui “hū ki tou ʼu kogafale loto,” kae ʼe feala ke tou falala ʼe tokoni mai anai ia Sehova kia tatou ke tou fai te faʼahi ʼaia.

15. ʼE faka maʼuhigaʼi feafeaʼi te falala lolotoga te taʼu 1998, pea he koʼe ʼe lelei te faʼahi ʼaia?

¹⁵ ʼE maʼuhiga ke tou fakamālohiʼi tatatou falala ʼi te temi ʼaenī. Kapau ʼe mole tou falala ki totatou ʼu tēhina, ki te kautahi ʼa Sehova, kae tāfito kia Sehova totonu, pea ʼe mole feala anai ke tou hāo. Koia ʼe lelei ʼi te lolotoga ʼo te taʼu 1998, he ko te vaega faka Tohi-Tapu ʼo te taʼu, ʼe ina fakamanatuʼi tuʼumaʼu ki te kau Fakamoʼoni ʼa Sehova ʼi te malamanei katoa “ko ia ʼaē ʼe tāpuhā ki te huafa ʼo Sehova ʼe hāo anai ia”! (Loma 10:13) Koia ʼe tonu ke tou falala tuʼumaʼu. Kapau ʼe tou fakatokagaʼi ʼe ʼi ai he kiʼi meʼa veliveli ʼe tou lotolotolua ai ʼi tatatou falala, pea ʼe tonu ke tou fakatonutonuʼi ʼi te lakaga ʼaenī, ei, ʼi te ʼaho nei.

ʼE Faitotonu Anai Te Fakamāu ʼa Sehova

16. Koteā ʼaē ʼe feala ke hoko ki tatatou falala, mo kapau ʼe mole tou faiga ke tuputupu, pea koteā ʼaē ʼe feala ke tou fai ke ʼaua naʼa hoko te faʼahi ʼaia?

¹⁶ Ia Hepeleo 3:​14, ʼe fai te fakatokaga ʼaenī ki te kau Kilisitiano fakanofo: “Heʼe tou kau moʼoni kia Kilisito kapau ʼe tou taupau maʼu ʼo aʼu ki te fakaʼosi te falala ʼaē neʼe tou maʼu ʼi te kamata.” ʼE feala ke toe faka ʼuhiga te ʼu palalau ʼaia ki te kau Kilisitiano ʼaē ʼe nātou maʼu te ʼamanaki ke nātou maʼuʼuli ʼi te kele. ʼE feala ke puli tatatou falala ʼaē neʼe tou maʼu ʼi te kamata mo kapau ʼe mole tou faiga ke tuputupu. ʼE maʼuhiga ke tou haga kumi te ʼatamai mālama totonu, ke feala hana fakamālohiʼi te tafitoʼaga ʼo tatatou falala!

17. He koʼe ʼe feala ke tou falala ki te faitotonu ʼa te fakamāu ʼa Sesu ʼo ʼuhiga mo te hāofaki?

¹⁷ Kua ōvi mai te temi ʼaē ka fakamāuʼi ai e Kilisito te ʼu puleʼaga fuli ke feala ai hana “fevaevae kehe ʼaki anai te hahaʼi, ohage ko te vaheʼi e te tagata tauhi ōvi te ʼu ōvi mai te ʼu tao.” (Mateo 25:​31-​33) ʼE tou falala ʼe faitotonu anai ia Kilisito ʼi tana fakamāuʼi ia nātou ʼaē ʼe tau mo feʼauga ke nātou hāo. Neʼe foaki age e Sehova kia te ia te poto, te fakasiosio tonu, pea mo te tahi ʼu kalitate ʼe ʼaoga kia ia moʼo “fakamāuʼi te kele ʼi te faitotonu.” (Gāue 17:​30, 31) Tou maʼu te falala ʼaē neʼe maʼu e Apalahamo, ʼaē neʼe ina ʼui fēnei: “ ʼE mole ko he meʼa ʼe tāu mo koe [Sehova] ke ke fai te meʼa ʼaenī, ke ke matehi fakatahi te tagata faitotonu pea mo te agakovi, ke tatau te meʼa ʼaē ʼe hoko ki te tagata faitotonu pea mo te meʼa ʼaē ʼe hoko ki te agakovi! ʼE ko he meʼa ʼe mole tāu mo koe. Ko te Tuʼi Fakamāu ʼo te kele katoa ʼe mole ina fai anai koa te meʼa ʼaē ʼe totonu?”​—Senesi 18:⁠25.

18. He koʼe ʼe mole tonu ke tou tuʼania ʼo ʼuhiga mo te ʼu meʼa ʼaē ʼe mole heʼeki tou ʼiloʼi ʼi te temi nei?

¹⁸ ʼI tatatou falala katoa ki te faitotonu ʼa Sehova, ʼe mole tonu ke tou faiga ke tou maʼu he ʼu tali ohage la ki te ʼu fehuʼi ʼaenī: ‘ ʼE fakamāuʼi feafeaʼi anai te ʼu kiʼi toe ʼaē kei meamea pea mo te ʼu kihiʼi tamaliki? ʼE hoko mai anai koa ia Halamaketone, kae kei tokolahi te hahaʼi ʼaē heʼeki nātou logo ki te logo lelei? ʼE feafeaʼi anai ki te hahaʼi ʼulu vavale?’ ʼE moʼoni, ʼi te temi ʼaenī ʼe mole heʼeki tou ʼiloʼi peʼe fakahoko feafeaʼi anai e Sehova te ʼu faʼahi ʼaia. Kae ʼe ina fakahoko anai ʼaki te faitotonu pea mo te manavaʼofa. ʼE mole tonu ke tou lotolotolua ki te faʼahi ʼaia. ʼI tona fakahagatonu, ʼe lagi tou punamaʼuli anai pea mo fiafia ʼi tatatou sio ki tana fakatokatoka te ʼu faʼahi ʼaia, ʼi hona ʼaluʼaga neʼe mole tou ʼamanaki ʼe hoko feiā anai.​—Vakaʼi ia Sopo 42:3; Pesalemo 78:11-​16; 136:​4-9; Mateo 15:31; Luka 2:​47.

19, 20. (a) He koʼe ʼe mole kovi ke tou fai he ʼu fehuʼi fakapotopoto? (b) Ko ʼafea ʼaē ka tali anai kiai e Sehova?

¹⁹ ʼE mole fakafisi te kautahi ʼa Sehova ki te ʼu fehuʼi fakamalotoloto ʼaē ʼe fai e te hahaʼi ʼi tona temi totonu, ohage ko tona ʼui e nātou ʼaē ʼe fakafeagai kia tatou. (1 Petelo 1:​10-​12) Kae ʼe tokoniʼi tatou e te Tohi-Tapu ke mole tou fai he ʼu fehuʼi fakavale pea ʼe mole hona ʼaoga. (Tito 3:9) Kapau ʼe tou fai he ʼu fehuʼi fakapotopoto pea mo fai he ʼu kumi ki te Folafola ʼa te ʼAtua pea mo te ʼu tohi faka Kilisitiano, ke tou maʼu ai he ʼu tali faka Tohi-Tapu, ʼe tuputupu anai tatatou ʼatamai mālama pea ʼe toe ʼāsili mālohi ai tatatou falala kia Sehova. ʼE mulimuli te kautahi ki te faʼifaʼitaki ʼa Sesu. Neʼe mole ina fai he ʼu tali ki te ʼu fehuʼi ʼaē neʼe mole heʼeki hoko mai te temi ʼaē neʼe tonu ke tali kiai. Neʼe ina fakamahino fēnei: “ ʼE kei lahi te ʼu meʼa ke ʼau tala atu kia koutou, kaʼe mole feala ke koutou ʼamo ʼi te temi nei.” (Soane 16:12) Tahi ʼaē meʼa, neʼe ina fakamoʼoni ʼe ʼi ai te tahi ʼu meʼa neʼe mole heʼeki ina ʼiloʼi ʼi te temi ʼaia.​—Mateo 24:36.

²⁰ ʼE kei lahi te ʼu meʼa ʼaē ʼe tonu ke fakahā mai e Sehova. ʼE ko he meʼa fakapotopoto hatatou talitali ke ina fakamahino mai, ʼo tou falala ʼe ina fakahā mai anai tana ʼu fakatuʼutuʼu ʼi tona temi totonu. ʼE feala ke tou falala mokā hoko mai anai te temi ʼaē kua fakakatofa e Sehova, ʼe tou fiafia anai he kua toe lahi age tatatou mahino ki tana ʼu fakatuʼutuʼu. Ei, ʼe fakapale anai tatou mo kapau ʼe tou falala katoa kia Sehova pea mo tana kautahi ʼaē ʼe ina fakaʼaogaʼi. ʼE fakapapau fēnei mai kia tatou e Tāʼaga Lea 14:26: “ ʼI te manavasiʼi kia Sehova ʼe ʼi ai te falala mālohi, pea ʼe ʼi ai anai he holaʼaga maʼa tana ʼu foha.”

[Nota ʼi te lalo pasina

Koteā Takotou Manatu?

◻ He koʼe ʼe mole fakapotopoto ke tou fakavaivai tatatou falala kia Sehova ʼuhi ko te ʼu meʼa ʼaē ʼe mole tou mahino kiai?

◻ Koteā ʼaē ʼe feala ke tou tāʼofi ʼaki te meʼa ʼaē neʼe hoko kia Sonasi?

◻ He koʼe ʼe maʼuhiga ke tou ako te Tohi-Tapu pea mo tou kau ki te ʼu fono?

[Paki ʼo te pasina 16]

Tatau aipe peʼe tonu ke tou mamate, kae ʼe feala ke tou falala ko Sehova ʼe faitotonu

[Paki ʼo te pasina 18]

ʼE koutou ʼiloʼi papau koa peʼe koutou falala kia Sehova?