Te ʼu ʼUluaki Palalau ʼe Lagaʼi Ai Te Fia Logo
1 Neʼe fakaʼaogaʼi e Sesu te ʼu ʼuluaki palalau ʼe ʼaoga ki te hahaʼi. Neʼe ina ʼiloʼi pe ʼe feafeaʼi te uga ʼo he tokolahi pe ko he tokotahi ʼo fakahā kia nātou takitokotahi te ʼaoga ʼo te fahaʼi ʼaia kia ia. Neʼe ina fakahā kia nātou ʼe fakalogo age te maʼuhiga ʼo te meʼa ʼaē ʼe palalau ia ki ai. — Mat. 5:3-12; Soane 4:7-30.
2 ʼE ʼaoga ke teuteu: Kapau ʼe tou loto ke fia logo te hahaʼi ki tatatou logo, ʼe tonu ke tou fakaʼaveʼave ʼatatou ʼu ʼuluaki palalau ke feala ai hanatou fia logo, ʼo ʼalu tahi mo te ʼu meʼa ʼe nātou tuʼaniaʼia pea mo fakahā age kia nātou ko te logo ʼo te Puleʼaga ʼe feala tana tokoniʼi nātou takitokotahi.
3 Ka tou teuteu ki te minisitelio, tou manatuʼi te ʼu meʼa ʼe tuʼaniaʼi e te hahaʼi ʼi te telituale ʼi te temi nei. Neʼe nātou puna’maʼuli koa ʼi he logo foʼou ia ʼaho nei? Koteā te meʼa ʼe fia logo anai ki ai he tūpulaga? he tahi kua matuʼa? he tagata pe ko he fafine ʼohoana, he tāmai pe ko he faʼe? ʼE tou fakapotopoto anai mokā, ʼe mole gata pe ʼi ta kita fakaʼaogaʼi te ʼuluaki palalau ʼi te ʼu matapā fuli, kae neʼe tou teuteuʼi he ʼu ʼuluaki palalau pea kua tou nofo teuteu ki tona fakaʼaogaʼi ʼo ʼalu tahi mo te aga ʼa te hahaʼi. Ko ʼihi kau faka mafola ʼe nātou maʼu hona ʼu fua lelei ʼi tanatou teuteuʼi pea mo fakaʼaogaʼi te ʼu ʼuluaki palalau kehekehe ʼe tuʼu ʼi te tohi Comment raisonner ʼi te temi fuli pe ʼe nātou fai faka mafola ai ʼi te ʼu ʼapi (rs pp. 9-15). ʼE fēnei tanatou palalau tuʼumaʼu mo te hahaʼi ʼaki he ʼu manatu fakapotopoto.
4 ʼI te māhina ko ʼaukusito, ʼe lagi tou fia fakaʼaogaʼi anai he fakahā ohage ko te fakahā ʼe tuʼu ʼi heni:
◼ “Mālo tou maʼuli Tagata (peʼe ko he Fafine). Neʼe mātou palalau mo ʼihi ʼi tou vāhaʼa fale ki te ʼu kalitate ʼaē, ʼi tanatou manatu, ʼe feala ai ki he tahi ke ina takitaki leleiʼi niʼihi. ʼE ʼau fia fehuʼi atu pe ʼe feala tau fakahā mai he kalitate e tahi peʼe lua ʼe lagi ʼi tau sio ʼe ʼaoga ki te fahaʼi ʼaia. [Tuku ke fai mai hana tali. Fakalogo lelei ki ai pea mo ʼio ki ai mokā ʼe feala.] ʼE ke ʼiloʼi koa neʼe fakahāhā mai ʼe te Tohi-Tapu te ʼu agaaga ʼo Ia ʼaē neʼe fili moʼo taki ʼo te malamanei katoa? ʼE tuʼu ʼi heni, ia Isaia 9:6, 7. [Lau.] ʼI tau manatu, ʼe feafeaʼi anai te maʼuli mokā ʼe taki tatou ʼe he tagata feiā? Tuku ke fai mai hana tali, ʼosi ʼaia pea fakahā age ia Pesalemo 146:3, 4 pea mo te manatu ʼa te tohi Comment raisonner, ʼi te ʼu pasina 173 pea mo 174, ʼo ʼuhiga mo te ʼu kalitate ka fakahā e Sesu ʼi tona temi hau. ʼE feala ai foki ke fakaʼaogaʼi te tohi Mauli O Heegata, ʼi te ʼu pasina 112 pea mo te 113, moʼo hoko atu ʼo te fai palalau.
5 Kapau ʼe tou fai palalau mo te hahaʼi ʼaē ʼe nātou tuʼania tonatou famili, ko te fakahā ʼaenī ʼe lagi ʼaoga moʼo fakahā ʼo te tohi Mauli O Heegata:
ʼI te ʼosi fakamālo fakaʼapaʼapa ki he tahi, ʼe feala ke tou ʼui age:
◼ “Neʼe koutou fakasiosio koa ko te ʼu tuʼania ʼi te ʼaho fuli ʼe ko he faigataʼa moʼoni ʼaia ki te ʼu famili? [Tuku ke fai mai hana tali.] ʼI takotou manatu, ko te fahaʼi fea ʼaē ʼe maʼu ai e te ʼu famili te ʼu tokoni lelei? [Tuku ke fai mai hana tali.] ʼE mātou fakatokaga atu ʼo ʼuhiga mo te meʼa ʼe ʼui mai ʼe te Tohi-Tapu ʼo ʼuhiga mo te fahaʼi ʼaia. Koutou vakaʼi te palalau ʼa te Tupuʼaga ʼo te ʼohoana neʼe ina fai ki te ʼuluaki taumātuʼa.” Lau ia Senesi 1:28, ʼosi ʼaia pea avahi te tohi Mauli O Heegata ʼi te pasina 238 pea hoko te fai palalau ʼo fakaʼaogaʼi te ʼu manatu ʼi te kapite 29.
6 Ko te fakaʼaogaʼi ʼo te ʼu faʼahiga meʼa neʼe fai e Sesu moʼo uga ai nātou ʼe fai palalau mo tatou pea mo faigaʼi ke nātou fakahā mai tanatou ʼu manatu, ʼe tou fakahā ai ki te ʼu hahaʼi fakamalotoloto te maʼuhiga ʼo te ʼu meʼa fakalaumālie.