Koutou Gāue ʼAki Tokotou Nefesi Katoa
1 Ohage ko te kau tisipulo ʼa Sesu, neʼe fili tatou ke tou faka mafola te logo lelei ʼo te Puleʼaga ʼo te ʼAtua pea mo fai he ʼu tisipulo ʼa Sesu Kilisito. (Mat. 24:14; 28:19, 20) ʼE mole he tahi gāue fakavilivili peʼe maʼuhiga age ʼi te gāue ʼaia ʼi te kele. Ko te maʼuli ʼo te lauʼi miliona hahaʼi ʼe fakalogo ki te gāue ʼaia. Koia ʼe tonu ai ke tou faiga mālohi. Ko te tokoni ʼa Paulo ʼe ʼaoga lelei ki te faʼahi ʼaia: “Pe ko he meʼa pe ʼe koutou fai, koutou gāue ki ai mo tokotou nefesi katoa, ohage maʼa Sehova.” (Kol. 3:23) “Ko te nefesi katoa” ko tona faka ʼuhiga ʼe tou maʼu he “manako ʼaupito peʼe ko he aga faka lotu katoa.” ʼE koutou fakahoko koa takotou gāue ʼaki tokotou nefesi katoa?
2 Koteā ʼaē ʼe fakamaʼua kia tatou ke tou gāue ʼaki totatou nefesi katoa? ʼE fakatatau e Sehova te gāue ʼaia ki te time, peʼe ko te hogofulu ʼo te vahe. (Mal. 3:10) ʼO mole ina fakatotonuʼi te lahi ʼaē ʼo te meʼa ke foaki, ko te hogofulu ʼo te vahe ʼe fakatā ki te time pea mo tatatou faiga ʼaē ke tou foaki ki te gāue ʼa Sehova ohage ko he fakatā ʼaia ʼo totatou ʼofa pea mo te fakafetaʼi ʼi tatatou pipiki kia te ia. (w92 12/1 p. 15) ʼE tonu anai ke ʼiloga ʼi tatatou gāue te loloto ʼo tatatou pipiki pea mo totatou ʼofa kia Sehova. Ko he tahi ʼe fia kaugana katoa kia Sehova, ʼe ina logoʼi ʼi tona nefesi katoa ʼe tonu ke ina faka fālahi te faʼahi ʼaia mokā ʼe faka fealagia e tona maʼuli pea mo te ʼu ʼaluʼaga ʼaē ʼe tau mo ia.
3 Neʼe palalau fakalelei Paulo ʼo ʼuhiga mo te kau kilisitiano ke nātou “gāue kinakina pea mo faiga” ʼo fakatafito ki te ʼamanaki. (1 Tim. 4:10) Neʼe fakapale ia nātou ʼaia ʼaki te tapuakina ʼa Sehova, ʼaē ʼe ‘ina fakakoloaʼia nātou.’ (Tāʼaga Lea 10:22) ʼE kehekehe ia mo nātou ʼaē ʼe faka tuʼakoi tanatou foaki ʼo tonatou temi pea mo tonatou mālohi peʼe mole nātou loto lelei ki ai, ʼe mole nātou ʼiloʼi te fiafia ʼaē ʼe maʼu ʼi te foaki. (Gāue 20:35) Ko te loto noa ʼo ʼuhiga mo tatatou foaki ʼo te ʼu meʼa fuli ʼaē ʼe lelei ia kita, ʼe faka ʼuhiga ʼe tou kaihaʼa ia Sehova ʼo ʼuhiga mo te “hogofulu ʼo te vahe” ʼaē ʼe tau mo ia. — Mal. 3:8.
4 Tou foaki te ʼu meʼa fuli ʼaē ʼe lelei ia tatou: Ka tou kau ki te gāue faka mafola pea mo fai tatatou pepa tānaki, ʼe totonu koa tona fai? Ko te tohi Notre ministère, pasina 104 ʼe tuʼu ai: “ ʼE kamata lau tokotou temi gāue faka mafola ʼi te temi ʼaē ʼe kamata ai takotou fai faka mafola pea fakaʼosi ʼaki takotou fai palalau fakaʼosi. Ko te temi ʼaē neʼe koutou fakaʼaogaʼi moʼo ʼiʼinu pea mo kai lolotoga te gāue faka mafola ʼe mole lau ia.” Ko he fakatuʼutuʼu lelei pea mo he faiga ʼe ʼaoga moʼo fakahoko he ʼu meʼa ʼe lahi lolotoga te temi ʼaē ʼe tou kau ki te gāue faka mafola.
5 Ko tatatou foaki tatatou ʼu meʼa fuli ʼaē ʼe lelei ia kita ko tona faka ʼuhiga ʼe tou fai ʼaupito he ʼu meʼa ʼe tou fealagia ʼi te temi ʼaē ʼe tou kau ai ki te gāue faka mafola. Ko ʼaē ʼe ina fai tana gāue mo tona nefesi katoa ʼe mole ina faka tuʼakoi anai tana fai faka mafola ʼi te ʼu fagonogono faigamalie ʼo mole kau ia ki te fai faka mafola ʼi te ʼu ʼapi. Ko he tūpulaga fai faka mafola mole heʼeki papitema ʼe ina fai tana gāue ʼaki tona nefesi katoa, ʼo mole fai faka mafola anai pe ia ʼuhi ko te fakakinau ʼa tana ʼu mātuʼa, ʼo ina fakahā pe he kiʼi faʼahiga tokaga ʼi te faʼahi ʼaia peʼe ko te fakahā ʼaē ʼo te logo.
6 ʼE fakaloto mālohiʼi tatou e Paulo ke tou taupau maʼu tatatou faʼa fai koteʼuhi ke ʼaua naʼa tou fiu. (Hep. 6:11, 12) ʼE ko he meʼa faka fiafia hatatou toe vakaʼi tatatou gāue takitokotahi pea ʼe mole tou maʼu he faʼahi ʼe tou ufiufi ai — koteʼuhi neʼe tou fai te faʼahi ʼaia mo totatou nefesi katoa! (2 Tim. 2:15) Ko tatatou fiafia lahi ʼe hoko anai mokā tou sisio kia nātou ʼaē neʼe tou tokoni e kau ʼi te kau maʼuʼuli ʼo te mamahi lahi. ʼE tonu ke tou ʼiloʼi papau ʼe fakapale e Sehova ia nātou ʼaē ʼe kaugana kia te ia mo tonatou nefesi katoa ʼo lahi age.