Tou Kamata He ʼu Ako Faka Tohi-Tapu
1 ʼI te ʼu meʼa ʼe hoko ʼaē ʼe fua manuʼia tāfito pea mo fakafimālie ki te kau kilisitiano moʼoni, ko tanatou akoʼi te moʼoni ki niʼihi ʼaki he ʼu ako faka tohi-tapu. Kae, ko ʼihi ʼe feala ke mole nātou kau ki te faʼahi fua manuʼia pea mo fakafimālie ʼaia ʼo te minisitelio, koteʼuhi ʼi tanatou manatu ʼe mole feala ke nātou kamata fai he ako faka tohi-tapu. Tokolahi te kau faka mafola pea mo te ʼu pionie faiva neʼe kua ia nātou te manatu ʼaia. Kae, ʼaki te falala ʼaē kia Sehova pea mo te maʼuliʼi ʼo te ʼu tokoni ʼaē ʼo te Minisitelio ʼo te Puleʼaga, neʼe nātou akoʼi peʼe feafeaʼi te kamata pea mo te fai ʼo he ʼu ako faka tohi-tapu, pea neʼe nātou fakatuputupu ai tanatou fiafia ʼaē ʼi te minisitelio. ʼE feala ke koutou fai te fakatuʼutuʼu pe ʼaia.
2 Tou fakaʼaogaʼi te fakahā fakahagatonu pea mo te ʼu kiʼi pepa lotu: Ko he faʼahi ʼe faigafua moʼo kamata ʼo he ako ʼe ko te fakahā fakahagatonu. Ko te meʼa ʼaē ʼe ʼaoga ki ʼihi hahaʼi ko honatou fakaafe ke nātou fai hanatou ako faka tohi-tapu. ʼE feala pe ke fai te faʼahi ʼaia ʼaki he fehuʼi age kia ia ʼaē ʼe palalau mo koutou: “ ʼE koutou loto koa ke fai hakotou ako faka tohi-tapu ʼi tokotou ʼapi moʼo fakatuputupu ʼo takotou mālama ki te Tohi-Tapu pea mo te ʼu fakatuʼutuʼu ʼa te ʼAtua ʼo ʼuhiga mo te kele?” Peʼe feala ke koutou ʼui age ki ai ʼe koutou fiafia anai ʼi hatatou fakahā age peʼe feafeaʼi te fai ʼo te ako faka tohi-tapu. Māʼiape la peʼe tokolahi ʼe fakafisi ki te faʼahi ʼaia, tou manatuʼi ʼe tou fiafia mokā ʼe tali e he tahi!
3 Ko te tahi faʼahi moʼo kamata ʼo he ako faka tohi-tapu ko te fakaʼaogaʼi ʼo he kiʼi pepa lotu ʼi tatatou ʼu kiʼi pepa lotu. Logope la tonatou veliveli, ʼe nātou fakahā he logo ʼe mālohi pea mo fakalave loto. E feafeaʼi koa he kamata ʼo he ako faka tohi-tapu ʼaki he kiʼi pepa lotu? ʼAki pe hakotou foaki age kia ia ʼaē ʼe fai palalau mo koutou he kiʼi pepa lotu ʼe koutou fakasiosio ʼe ʼaoga anai ki ai. ʼOsi ʼaia, koutou fai he fakatuʼutuʼu, pea mo fakaafe ia ia ke ina lau te ʼuluaki palakalafe mo koutou. Koutou vakaʼi mo te ʼu vaega faka tohi-tapu ʼaē ʼe tuʼu ʼi ai, pea mo fakahā kia ia peʼe feafeaʼi tonatou ʼalutahi mo te ʼu manatu ʼo te palakalafe. ʼI te ʼuluaki fai palalau, ʼe feala anai ke tou vakaʼi pe, he palakalafe e tahi peʼe lua. Kapau ko ia ʼaē ʼe fai palalau mo koutou ʼe ina leleiʼia te ʼu meʼa ʼaē ʼe ina lolotoga ako mai te Tohi-Tapu, ʼe feala leva ke koutou fakatuputupu te temi ʼaē ʼe koutou fai palalau ai mo ia.
4 Tou fakaʼaogaʼi pe te Tohi-Tapu: ʼI ʼihi temi ʼe fia palalau he tahi ki te Tohi-Tapu kae ʼe hage ʼe mole loto lelei ke fai hana ako peʼe ke fakaʼaogaʼi he tohi ʼi ʼatatou ʼu tohi. ʼE feala pe hakotou kamata he ako faka tohi-tapu ʼaki hakotou teuteuʼi he fai palalau faka tohi-tapu ʼo fakatafito ki te ʼu puani ʼo te tohi Mauli O Heegata peʼe ko te tohi Comment raisonner kae ʼe koutou fakaʼaogaʼi anai pe te Tohi-Tapu mokā ʼe fai te ʼaʼahi. Ko te ʼu taʼi fai palalau ʼaia ʼe feala ke minuta 15 peʼe 20, peʼe loaloaga, ʼo fakalogo pe ki tona faigamālie. Kapau ʼe fai tuʼumaʼu pea mo fakaʼaogaʼi mamalie pe te tokoni ʼaia moʼo akoʼi ʼo te ʼu moʼoni ʼo te Tohi-Tapu, kua koutou kamata te ako faka tohi-tapu, pea kua feala ke koutou tohi ki he pepa tānaki gāue. Kapau ʼe faigamālie te temi, koutou fakahā age ki ai te tohi Mauli O Heegata, pea koutou fai te ako faka tohi-tapu ʼaki te tohi ʼaia.
5 ʼO mole gata ʼaki takotou maʼu he ʼu faigamālie ʼi te minisitelio, kua koutou faigaʼi koa ʼo kamata he ʼu ako faka tohi-tapu mo ʼokotou vāhaʼa fale, mo ʼokotou ʼu kaugā gāue, peʼe ko te ʼu hahaʼi ʼo tokotou famili? Neʼe koutou fai koa te faʼahi ʼaia ʼi he temi ki muʼa atu? Neʼe koutou toe ʼahiʼahi fai koa te faʼahi ʼaia? Kapau ʼe mole iku lelei te faʼahi ʼaia, neʼe kua tou ʼahiʼahiʼi koa he tahi puleʼaki?
6 ʼE feala ke fua lelei hakotou kamata he ʼu ako faka tohi-tapu mokā ʼe koutou fakaʼaogaʼi te ʼu manatu ʼaē ʼe foaki mai, mokā ʼe koutou haga fai takotou gāue, pea mo falala ki te ʼu tapuakina ʼa Sehova. ʼAua naʼa tou meʼa noaʼi te mālohi ʼo te moʼoni pea mo te tokoni ʼaē ʼe foaki mai e Sehova. ʼOfa pe ke koutou fakatuputupu takotou fiafia ʼi te minisitelio ʼaki hakotou kamata fai he ʼu ako faka tohi-tapu.