Koutou Fakatuʼutuʼu He Temi Moʼo Tufa ʼo Te ʼu Nusipepa
1 Neʼe fakatuʼutuʼu e Sehova ʼe ʼi ai anai ‘te tokalelei, ʼi te temi ka haʼu, pea mo te falala’ maʼa nātou ʼaē ʼe mulimuli ki tana ʼu ala (Sel. 29:11). Ko te talanoa ʼo ʼuhiga mo te ʼamanaki ʼaia ʼe fakahā ʼi te temi totonu e Te Tule Leʼo pea mo te nusipepa Koutou ʼaʼala! Ko te ʼu nusipepa ʼaia ʼe feala ke fua lelei ki te ʼu hahaʼi kehekehe ʼi te faʼahi fuli (1 Tim. 2:4). ʼE koutou tautau fakatuʼutuʼu koa mo tokotou famili he temi moʼo tufa ʼo te ʼu nusipepa?
2 Kapau kua siʼisiʼi takotou tufa te ʼu nusipepa, e feafeaʼi koa te fakatotonu ʼo te faʼahi ʼaia? Ko te meʼa tāfito, ke tou taupau maʼu tatatou fakafetaʼi ki te ʼu manatu ʼi tatatou ʼu alatike. Neʼe tohi e te tagata: “Ko te lau ʼo takotou ʼu nusipepa ʼe ko he meʼa lelei mo fakafiafia. ʼE mole ko he ʼu nusipepa kua ʼāfea peʼe kua siʼisiʼi tonatou maʼuhiga kae ʼe tuʼu ʼi ai te tokoni moʼo ‘fakaloto mālohi’ pea mo te taki ʼaē ʼe ʼaoga ki te maʼuli.” Ko Te Tule Leʼo pea mo te nusipepa Koutou ʼaʼala! ko te ʼu fua ʼaia ʼo te ʼu kumi fakapotopoto pea ko te ʼu meʼa kai ʼe foaki mai e “te tagata kaugana agatonu mo poto”. (Mat. 24:45.) Ko te ʼu meʼa gāue lelei ʼaia ke lave ʼi te ʼu loto ʼo te hahaʼi.
3 ʼE tonu ke koutou fakamāmāhani mo te ʼu alatike ʼo te ʼu nusipepa ʼaē ʼe koutou tufa. Koutou kumi te ʼu puani ʼe ʼalutahi mo te ʼu faigataʼaʼia neʼe hoko ʼi tokotou faʼahi. ʼE lelei ke koutou teuteu ʼo palalau mo te ʼu tagata, te ʼu fafine, pea mo te kau tūpulaga ʼaē ʼe feala ke koutou maʼu atu ki tonatou loto fale peʼe ʼi te ala. Koutou teuteu ʼo fakahā peʼe feafeaʼi te talanoa ʼa te ʼu nusipepa ki te hahaʼi takitokotahi pea mo te ʼu famili fuli.
4 Tou tokagaʼi te ʼu nusipepa: Ko te tufa ʼo te ʼu nusipepa ʼe tonu ke ina maʼu he faʼahi maʼuhiga ʼi takotou polokalama fai faka mafola. Ko te ʼu temi fea ʼaē ʼe lelei kia koutou ke koutou tufa ai te ʼu nusipepa? Kua koutou ʼahiʼahi gāue koa ʼi te ʼu ʼapi ʼi he hola e tahi peʼe ʼi te hili hoʼatā peʼe ʼi te afiafi ia muʼa ʼo takotou Ako tohi? ʼE lahi te fua lelei ʼo te fai faka mafola ʼi te afiafi ʼi ʼihi ʼu telituale. Ko te moeaki ko te ʼaho lelei ʼaia moʼo tufa ʼo te ʼu nusipepa ʼi te ʼu faʼahi kehekehe, kae ʼe feala foki ke fakaʼaogaʼi te ʼu ʼaho ʼaē ki te gāue ʼaia. Ko te fai faka mafola ʼi te ʼu ʼapi pea mo te ʼu koloā ʼe tonu anai ko he faʼahi ke tautau fai moʼo tufa ʼo te ʼu nusipepa.
5 Ko tatou takitokotahi ʼe tonu ke tou tufa tuʼumaʼu te ʼu numelo ʼo te ʼu nusipepa fuli. Kapau ʼe ʼi ai he fealagia ke koutou tufa te ʼu nusipepa ʼāfea, ʼe feala ke koutou fakaʼaogaʼi te ʼu manatu kehekehe ʼi te tuaʼi pasina ʼi te ʼu nusipepa. ʼE feala ke tautau tuku te ʼu nusipepa ʼāfea ʼi te ʼu fale ʼaē ʼe nonofo ai te hahaʼi matutuʼa, ʼi te ʼu fale mahaki, pea mo te ʼu lopitali ʼaē ʼe gafua ai. Ko te ʼu nusipepa fuli ʼaia ʼe tonu ke lau ko he ʼu nusipepa neʼe tufa ʼo tohi ʼi te māhina fuli ʼi takotou pepa gāue.
6 ʼI te maʼuliʼi ʼo te ʼu manatu ʼaē ʼe tuʼu ʼi ʼoluga, ʼe mole fakapuna’maʼuli anai takotou sisio ki te tuputupu ʼo te ʼu nusipepa ʼaē ʼe feala ke koutou tufa. Ko te hahaʼi faitotonu ʼaē neʼe mamahi ʼuhi ko tanatou maʼuli ʼi te faʼahiga meʼa ʼo te tuʼu agakovi ʼaenī ʼe nātou leleiʼia te manatu fakatupu fiafia ʼi Te Tule Leʼo pea mo te nusipepa Koutou ʼaʼala! Ko te ʼu nusipepa ʼaia ʼe nā foaki he meʼa kai fakalaumālie kia nātou fuli ʼaē ʼe nātou kumi te ʼofa ʼo Sehova. Kae, ke koutou tokagaʼi te ʼu nusipepa, pea mo koutou kumi te ʼu faʼahiga ʼaluʼaga moʼo fakatuputupu ʼo te tufa ʼo te ʼu nusipepa maʼuhiga ʼaia ʼi tokotou telituale.