Te Fakaʼiloga ʼo Te Maʼuli
1 ʼI muʼa ʼo tana fakahoko tana ʼu fakamāu faitotonu, ʼe fakahā tuʼumaʼu e Sehova te ʼu fakatokaga pea mo foaki ki te hahaʼi agavaivai te ala ʼaē ki te maʼuli. ʼI te ʼu ʼaho ʼo Esekiele, neʼe ʼi ai te hahaʼi neʼe nātou toʼetoʼe pea mo fetāgihi ʼo ʼuhiga mo te ʼu meʼa fakalialia fuli ʼaē neʼe hoko. Ko te taʼi hahaʼi ʼaia neʼe haga ia Sehova ʼo fakaʼiloga nātou ki te maʼuli. (Esk. 9:4-6) Ko tatatou gāue faka mafola ia ʼaho nei ʼe ina toe fakahoko pe te faʼahi ʼaia. ʼE feala pe kia tatou ke ʼi ai hotatou ʼaoga ʼaupito ki te gāue ʼaia.
2 ʼUluaki ʼe tonu ke tou maʼu te hahaʼi ʼaē ʼe fia fagono fakamalotoloto. ʼE tou fakatuʼutuʼu ke tou fai he ʼaʼahi. Ko te teuteuʼi ʼo te ʼaʼahi ʼe fakatafito ki te ʼuluaki fai palalau, koia ʼe tonu ai ke kita tohi te nusipepa pe ko te tohi ʼaē neʼe kita tuku ki ai pea mo te meʼa ʼaē neʼe kita talanoa kiai. ʼE fakalogo tāfito anai te fua lelei ʼo tatatou ʼaʼahi ʼaia, ki te meʼa ʼaē neʼe tou teuteuʼi ʼo ʼuhiga mo te ʼu palalau pea mo te ʼu meʼa ka tou fai ʼi te temi ʼaē ka tou toe liliu ai kia nātou.
3 Kapau ʼe tou gāueʼi “Te Tule Leʼo,” ʼaē neʼe tou tuku ʼe feala ke tou fakatokagaʼi age tona kupu tāfito:
◼ “ ʼE ke fakatokagaʼi ʼi te takafi ʼo Te Tule Leʼo ʼe tā ai te ʼu kupu ʼaenī ‘ ʼE ina kalagaʼi te Puleʼaga ʼo Sehova.’ Ko te meʼa ʼaē ʼe makehe ai te nusipepa ʼaenī heʼe ina fakahā mālohi ko te Puleʼaga ʼo te ʼAtua ʼe ko te puleʼaki pe ʼaia e tahi ki te ʼu faigataʼaʼia ʼo te malamanei. ʼE ina fakamahinohino te ʼu meʼa ʼaē ka fakahoko anai e te Puleʼaga ʼo te ʼAtua ki te kele. ʼE ko te logo lelei ʼaia neʼe ʼui e Sesu ʼe tala anai ʼi te kele katoa.” Koutou lau age ia Mateo 24:14, pea koutou fakamahinohino age peʼe lava feafeaʼi hana maʼu tuʼumaʼu Te Tule Leʼo pea mo ina fakaʼaogaʼi ki tana ako ʼo te Tohi-Tapu.
4 E lagi ʼe koutou leleiʼia age hakotou talanoa pe ki te Tohi-Tapu pea mo fakahā age te maʼuhiga ʼaē ʼo tona lau tuʼumaʼu. ʼE feala ke koutou ʼui age fēnei:
◼ “Neʼe ʼiloga mai ʼi te hahaʼi ʼaē neʼe felāveʼi mo mātou, neʼe nātou leleiʼia te ʼu tokoni ʼaoga ʼo ʼuhiga mo te ʼu faigataʼaʼia ʼaē ʼe felāveʼi mo nātou ʼi te ʼaho fuli. ʼI tau manatu ʼe feala koa ke tou maʼu ʼifea ni ʼu tokoni ʼe feala ke tou falala kiai? [Tuku ke fai mai hana tali.] Tokolahi ia nātou ʼaē neʼe nātou falala ki te ʼu tokoni ʼo tonatou ʼu kaumeʼa peʼe mo totogi he tahi ʼe fai tokoni, neʼe mole nātou maʼu hona fua lelei. ʼI tona tahi ʼaluʼaga, ko te lauʼi miliona hahaʼi ʼe kua mahino kia nātou ko te Tohi-Tapu ʼe ko te tafitoʼaga pe ʼaia e tahi ʼo te ʼu tokoni ʼe feala ke nātou falala lahi kiai. ʼE foaki e te Tohi-Tapu te ʼu tokoni ʼo ʼuhiga mo te faʼahiga tauʼi ʼo te ʼu faigataʼaʼia ʼaē ʼe felāveʼi mo tatou. [Koutou lau age ia 2 Timoteo 3:16, 17.] Logope la neʼe feala ke mata faigataʼa kia koe hau mahino ki te Tohi-Tapu, ʼe feala pe ke ʼau fakahā atu peʼe feafeaʼi hau fakaʼaogaʼi te koloā ʼaia ʼo te ʼu tokoni poto.” Koutou haga fuli ki te kupu ʼaē ko te “ ʼOfa” ʼi te faʼahi ʼaē ʼe tuʼu ai te “Index des mots bibliques” ʼi te ʼu pasina fakaʼosi ʼo te Traduction du monde nouveau, pea mo koutou fakahā age te ʼu vaega ʼe hā ʼaki ai peʼe feafeaʼi te haga ʼa te ʼofa ʼo tokoni ia tatou ke tou fakatokatoka totatou ʼu fihifihia mo ʼihi.
5 ʼAki te fakatuʼutuʼu ʼaē ke koutou kamata he ako faka Tohi-Tapu, ʼe feala ke koutou fakaʼaogaʼi te tohi ʼaenī “E Feala Keke Mauli O Heegata Ite Palatiso Ite Kele,” ʼaki hakotou fai age te ʼu ʼuluaki palalau ʼaenī:
◼ “ ʼE tou ʼofa ki ʼotatou ʼu famili pea mo tou fia maʼu ni ʼu ʼaluʼaga lelei maʼa nātou. ʼE feafeaʼi anai he fua lelei ki tokotou famili te maʼuli ʼi he mālama fēnei?” Koutou fakahā age te ʼu paki ʼaē ʼe tuʼu ʼi te ʼu pasina 156 ki te 157. Koutou lau age he vaega e tahi peʼe lua ʼaē ʼe tuʼu ʼi te ʼu pasina ʼaia, pea koutou fakamahinohino age ko te ʼu vaega ʼaia ʼe ko he ʼu fakapapau ʼaia neʼe fai e Sehova ʼAtua, ia ia ʼaē ʼe mole feala ke loi. Koutou fakahā age te lisi ʼo te ʼu kapite ʼaē ʼi te ʼu pasina 5 ki te 6, pea mo koutou fehuʼi age ki te tagata ʼo te loto fale pe koteā te meʼa ʼaē ʼe fia palalau kiai; koutou toʼo te kapite ʼaia neʼe ina fili, pea koutou fai palalau mo ia ki he palakalafe e tahi peʼe lua.
6 ʼE koutou fia tokoniʼi koa he tahi ke fakaʼiloga ki te maʼuli? ʼE pipiki te fua lelei ʼo te faʼahi ʼaia ki te ‘fai katoa ʼo takotou gāue faka minisitelio’ ʼaki hakotou teuteu fakalelei pea mo tokaga fakavilivili ʼo ʼaʼahi ia nātou fuli ʼaē neʼe fia fagono moʼoni.—2 Tim. 4:5.