Tou Tufa Te ʼu Nusipepa ʼi Te Temi Fuli
1 ʼE tou maʼu te ʼu tupuʼaga lelei ke tou leleiʼia Te Tule Leʼo pea mo te Réveillez-vous! Koteā ʼihi age ʼu nusipepa ʼe nātou uga te hahaʼi ʼi te malamanei? ʼI te māhina ʼaenī ʼe tou tufa anai te ʼu nusipepa ʼi tatatou fai faka mafola, pea ko te ʼu alatike ʼo Te Tule Leʼo ʼo ʼOketopeli ʼe mālohi! ʼI te agamāhani, ʼe lahi tatatou tufa tatatou ʼu nusipepa ʼi te fai faka mafola ʼi te ʼu ʼapi; kae, ʼe tou teuteu anai ke tou tufa ki te hahaʼi ʼi te ʼu temi faigamālie fuli.
2 Mokā tou tufa “Te Tule Leʼo” ʼo te ʼaho 1 ʼo ʼOketopeli, ʼe feala hakotou uga te fia logo ʼa te hahaʼi ki te alatike ʼaenī “Ko Te Mālama ʼe Mole Toe ʼi Ai He Tau—Ko ʼAfea Anai?” ʼo koutou ʼui age:
◼ “ ʼE lahi te hahaʼi ʼe nātou feʼuiʼaki, logope la te ʼu faiga ʼa te tagata he koʼe ʼe mole feala ke ina fakatuʼu he mālama ʼe mole ʼi ai te tau. Koteā takotou manatu ʼo ʼuhiga mo te ʼu talanoa ʼe tuʼu ʼi te pasina 5 ʼo Te Tule Leʼo ʼo te ʼaho 1 ʼo ʼOketopeli? [Lau te ʼuluaki talanoa ʼi te ʼu palakalafe e lua ʼi lalo ʼo te kupu tāfito “Ko Te Lotu—Ko Te Fihifihia Lahi,” pea faka fealagia age ke fai atu hana tali.] ʼE mahino ia, ʼe mole faka ʼuhiga ʼe hoko tuʼumaʼu anai te ʼu tau. Koutou vakaʼi te fakapapau ʼa te ʼAtua ʼaē ʼe tuʼu ia Isaia 9:6, 7.” ʼE feala ke koutou lau te vaega ʼaenī ʼi takotou Tohi-Tapu peʼe ʼi te alatike ʼo Te Tule Leʼo. Fakamahino fakanounou age ko Te Tule Leʼo ʼe ina lagolago ia te Puleʼaga ʼo Sehova ʼaē ʼe ko te ʼamanaki pe ʼaia e tahi moʼo fakatuʼu ʼo he mālama tokalelei, pea mo fakaloto mālohiʼi ia ia ke ina fai he apone.
3 Mokā koutou tufa te “Réveillez-vous!” ʼo te ʼaho 22 ʼo ʼOketopeli, ʼe feala ke koutou ʼui age:
◼ “Koteā takotou manatu ki te fehuʼi ʼaenī ʼe tuʼu ʼi te ʼuluaki pasina ʼo te nusipepa ʼaenī: ‘He Koʼe ʼe Nounou ʼAupito Ia Te Maʼuli?’ [Faka fealagia ke fai atu hana tali.] Ko te ʼu alatike ʼaenī ʼe nātou fakatokagaʼi tatou ki te meʼa ʼaē neʼe ʼui e te ʼu tagata popoto ʼo totatou temi pea mo ʼihi age ʼo ʼuhiga mo te taʼu ʼo te tagata, pea ʼe ina toe fakatokagaʼi tatou ki te fakapapau ʼo totatou Tupuʼaga ʼo ʼuhiga mo te ʼamanaki ʼaē ko te maʼuli ʼo heʼegata. ʼE ʼau fia tuku atu te nusipepa ʼaenī.” ʼOsi ʼaia pea tou fakahā age te apone.
4 Ka koutou maʼu ni hahaʼi ʼe fia palalau ki te lotu, he koʼe koa ʼe mole koutou fakahā age he alatike ʼo “Te Tule Leʼo” ʼo te ʼaho 15 ʼo ʼOketopeli? Ko te faʼahiga fai ʼaia e lagi ʼe ina maʼu ai he manatu ʼe lelei:
◼ “ ʼE ʼau fia ʼiloʼi tau manatu ʼo ʼuhiga mo te fehuʼi ʼaenī: ʼE feala koa hatatou ʼofa ki te ʼAtua pea mo tou manavasiʼi ki ai?” Faka fealagia ke fai atu hana tali, pea koutou lau te talanoa ʼo te alatike “He Koʼe ʼe Tonu Ke Manavasiʼi Ki Te ʼAtua Moʼoni ʼi Te Temi Nei?” (Tnk. 12:13) Koutou fakaʼaogaʼi he manatu ʼi te ʼu manatu ʼo te pasina 202 ʼo te tohi Comment raisonner, pea koutou fakahā age te nusipepa pea mo te apone.
5 Mokā tou fai faka mafola ʼi te ʼu ʼapi, ke ʼaua naʼa tou fakalaka ʼi te ʼu fale koloā liliki pea mo te ʼu fale koloā lalahi. Ko nātou ʼaē ʼe fai faka mafola tuʼumaʼu ʼi te ʼu fale koloā ʼe nātou fakahā ko te gāue ʼaia ʼe lelei pea ʼe nātou maʼu te ʼu fua lelei. ʼE feala hakotou ʼahiʼahi te ʼuluaki palalau ʼaenī mokā ʼe koutou tufa te “Réveillez-vous!” ʼo te ʼaho 8 ʼo ʼOketopeli:
◼ “ ʼE mātou ʼiloʼi ko te hahaʼi gāue ʼe nātou fia ʼiloʼi te ʼu meʼa ʼe tuʼaniaʼi e te hahaʼi ʼo tonatou kolo. ʼE ʼau ʼiloʼi ʼe koutou leleiʼia anai te ʼu alatike ʼaenī.” ʼOsi ʼaia pea tou fakahā age he manatu fakanounou ʼo te alatike “Familles monoparentales: comment réussir?”
6 Kapau ʼe koutou felāveʼi mo he tahi ʼe maʼumaʼua moʼoni, ʼe feala hakotou fakahā age te ʼu nusipepa pea koutou ʼui age:
◼ “ ʼE ʼau ʼiloʼi neʼe mole koutou ʼamanaki ʼe ʼaʼahi mai koutou ʼi te ʼaho ʼaenī, koia ʼe ʼau palalau fakanounou anai. ʼE ʼau fia tuku atu pe te fealagia ʼaē ke koutou lau he manatu ʼe maʼuhiga.” Tou fakahā ki ai he alatike neʼe tou fili, pea tou tuku age te ʼu nusipepa.
7 Tou tohi fakalelei te pepa ʼo te ʼu nota ʼo te ʼu ʼapi, pea ke tou toe liliu ʼo ʼaʼahi ia nātou fuli ʼaē neʼe nātou toʼo he nusipepa. Kapau neʼe tali e he tahi he ʼu nusipepa, ʼi tatatou toe liliu mai, tou fakahā age ki ai te apone ki he nusipepa ʼi te ʼu nusipepa ʼaia e lua. Tou teuteu pea ke tou tokaga ʼo tufa ʼatatou ʼu nusipepa ʼi te temi fuli.