Tou Tokaga ʼo Tufa Te Nusipepa Lolotoga Te Māhina Ko ʼOketopeli
1 Ko Te Tule Leʼo pea mo te nusipepa Réveillez-vous! ʼe tuʼu ʼi ai te manatu fakaloto fīmālie pea mo fakaloto mālohi ʼo ʼuhiga mo te logo lelei heʼegata. Ke tou tokaga ʼo tufa te ʼu nusipepa ʼaia, ʼe ʼaoga ke tou toʼo he temi ke tou lau fakalelei pea ke tou fakakaukauʼi peʼe lave feafeaʼi te ʼu alatike ki te hahaʼi ʼo totatou telituale.
2 ʼUluaki, ʼe ʼaoga ke tou fakamāmāhani mo te ʼu alatike ʼaē ʼe tuʼu ʼi te takafi ʼo te nusipepa. ʼI te agamāhani, ko te ʼu paki ʼo te takafi ʼo te nusipepa ʼe nātou uga te hahaʼi ke nātou toʼo te ʼu nusipepa. Koutou vakaʼi te ʼu alatike ʼaē ʼe feala ke nātou uga te hahaʼi ʼi tokotou telituale. ʼE tatau koa te tauhi ʼa te hahaʼi? Koteā koa te ʼu meʼa tāfito ʼaē ʼe nātou tokakaga kiai? ʼAki te ʼu manatu ʼaia, ʼe feala anai hakotou teuteu ke koutou fakahā fakalelei te nusipepa. Koutou fakatokagaʼi te ʼu manatu ʼaenī ʼe tuʼu ʼi lalo.
3 Ko te Réveillez-vous! ʼo te ʼaho 22 ʼo Sepetepeli ʼe talanoa ki te hele ʼa Satana. ʼE feala ke koutou ʼui age:
◼ “ ʼI te ʼaho fuli, ʼe tou logo ki te ʼu fakapō, te ʼu hoge pea mo te agamālohi. Tokolahi te hahaʼi ʼe nātou fakaʼamu ke fetogi te ʼu meʼa ʼaia, kae ʼe hage ʼe ʼāsili ʼosi tona kovi, kaeā koa la? ʼI takotou manatu ʼe tupu koa te ʼu faʼahiga meʼa ʼaia ʼuhi ko te hala ʼa te ʼu tagata peʼe ʼi ai koa he tahi age ʼe ina uga te faʼahi ʼaia?” [Koutou faka fealagia ke fai atu hana tali.] Koutou lau ia Fakahā 12:7-9, 12 pea mo koutou fakamatala age. ʼOsi ʼaia, ʼe feala ke koutou fakaʼaogaʼi te pasina 9 ʼo te nusipepa, ʼo koutou fakahā age kiai, kua vave pe totatou faka ʼāteaina mai te mālohi ʼa Satana. ʼOsi ʼaia, ʼe feala ke koutou fakahā ki ai te apone.
4 Kapau ʼe koutou fakahā age “Te Tule Leʼo” ʼo te ʼaho 1 ʼo ʼOketopeli, ʼe feala ke koutou fakahā age te alatike “Ko Te Tohi-Tapu—Koteā Tona ʼUhiga Moʼoni?” ʼE feala ke koutou ʼui age fēnei:
◼ “ ʼE feala pe ke koutou maʼu te Tohi-Tapu ʼi te ʼapi fuli ʼi totatou telituale. ʼI te manatu ʼa te tokolahi ʼe maʼuhiga age ia.” ʼOsi ʼaia pea koutou fai fakahagatonu age te fehuʼi, ohage la: “ ʼI takotou manatu ʼe moʼoni koa la te manatu ʼaia?” ʼO mulimuli ki te tali ʼaē ka ina fai atu, e lagi ʼe feala ke hoko atu takotou palalau ʼaki he ʼu fakatokaga ʼaoga, ohage la: “ ʼE ʼi ai te ʼu fakamoʼoni ʼe nātou fakahā lelei mai ko te Tohi-Tapu ʼe haʼu moʼoni ia mai te ʼAtua, pea ʼe ko he taki lelei ia kia tatou. ʼE tuʼu ʼi ai te mālama ʼaē ʼe ina taki tatou ki te maʼuli heʼegata. [Koutou lau ia Soane 17:3.] Tokolahi te hahaʼi ʼe nātou fakaʼapaʼapa ki te Tohi-Tapu kae ʼe mole nātou ʼiloʼi peʼe feafeaʼi tona fakaʼaogaʼi. Ko te alatike ʼaenī ʼo Te Tule Leʼo ʼe ina fakamahino mai peʼe feafeaʼi hakotou fakaʼaogaʼi te Tohi-Tapu ke koutou maʼu ai he ʼu tali ki ʼakotou ʼu fehuʼi ʼo ʼuhiga mo te temi ka haʼu. ʼE feala hakotou maʼu ʼi tokotou ʼapi Te Tule Leʼo ko tona totogi fakaʼofa ko te falā afe pe ʼi te taʼu.”
5 ʼI takotou fakaʼaogaʼi “Te Tule Leʼo” ʼo te ʼaho 15 ʼo ʼOketopeli, e lagi ʼe koutou fia fakaʼaogaʼi he faʼahiga palalau fēnei:
◼ “ ʼE teitei pe ki te hahaʼi fuli kua mate honatou kāiga. Ko te alatike ʼaenī ʼe ina lagaʼi te fehuʼi, ‘Koteā Te ʼAluʼaga ʼo Te Kau Mate?’ ʼI takotou manatu, koteā te meʼa ʼe hoko mokā mate he tahi? [Koutou faka fealagia ke ina fai atu hana tali.] Kapau ʼe koutou fia ʼiloʼi pe koteā te tali ʼa te Tohi-Tapu ki te fehuʼi ʼaia, ʼe ʼau fiafia ʼi te tuku atu ʼo te nusipepa ʼaenī.” ʼOsi ʼaia pea koutou fakahā age te apone. Koutou teuteuʼi te kiʼi pepa lotu fakafalani ʼaē Quel espoir y a-t-il pour nos chers disparus? ke koutou tuku age kia ia ʼaē ʼe palalau mo koutou, mo kapau ʼe loto ia ke ina lau he meʼa ʼe nounou.
6 Tou faiga ke tou fakahā te apone ki te hahaʼi fuli ʼaē ʼe tou fisi ʼonatou matapā. Tatau aipe mokā ʼe mole feala te palalau ki te Tohi-Tapu, ʼe feala hakotou fakahā fakanounou te ʼu nusipepa. Koia, ke tou fakahā tatatou tokaga ki te nusipepa ʼi te māhina ko ʼOketopeli.