ʼAki Te ʼOfa, Tou Tokoni Kia Nātou ʼAē ʼe Fia Logo
1 ʼI te taki e te ʼaselo ʼa Sehova ia te Etiopea ʼaē neʼe ina fakahā tana fia logo ki te moʼoni ʼe haʼu mai te Folafola ʼa te ʼAtua, ko te tisipulo ko Filipe neʼe ina foaki age kiai he tokoni ʼofa ke feala ai hana mahino ki te meʼa ʼaē ʼe ina lau. (Gāue 8:26-39) ʼE tou faiga koa ke tou tokoni kia nātou ʼaē ʼe nātou fakahā mai tanatou fia logo? ʼE tonu ke tou fai te faʼahi ʼaia, koteʼuhi ʼe ko he koga ʼo totatou maʼua ʼaē neʼe tuku mai e te ʼAtua, ko te fai ʼo he ʼu tisipulo. (Mat. 28:19, 20) Koteā koa te meʼa ʼe feala ke tou fai moʼo tokoni kia nātou?
2 Ke tou toʼo he temi ʼi te vāhaʼa fuli moʼo fai ʼo te ʼu ʼaʼahi. Ke tou fakatuʼutuʼu ke tou ʼaʼahi ia nātou ʼaē neʼe nātou fakahā mai tanatou fia logo, pea ke tou faiga ke tou toe hoko atu te fai palalau ki te Tohi-Tapu ʼaē neʼe tou fai ʼi te kamataʼaga. Ke tou manatuʼi ko te ikuʼaga ʼo te faʼahi ʼaia, ko te kamata ʼo he ako faka Tohi-Tapu. Koutou fakahā age kia nātou te apone peʼe koutou ʼaʼahi tuʼumaʼu ia nātou moʼo fakahā kia nātou te ʼu alatike fakamuli ʼo Te Tule Leʼo pea mo te nusipepa Réveillez-vous!
3 Kapau neʼe koutou tuku te nusipepa ʼe talanoa ki te hele ʼa Satana ki he tahi neʼe fia logo, ʼe feala hakotou ʼui age:
◼ “ ʼI taku ʼaʼahi fakamuli, neʼe tā vakaʼi te faʼahi ʼaia, ohage ko tona fakahā mai ʼi te Tohi-Tapu, ko Satana tāfito ʼaē ʼe ina fakatupu te agakovi. Lolotoga te temi ʼaē ʼe maʼuli ai ia, ʼe tou tau anai mo te ʼu faigataʼaʼia tāfito. ʼI tau manatu kua vave koa la tona pulihi?” [Koutou faka fealagia ke fai atu hana tali.] ʼE feala ke koutou fakamatala age te pasina 10 ʼo te nusipepa, tāfito te kupu ʼaē “ko he kiʼi temi siʼisiʼi.” ʼOsi ʼaia, pea koutou fakaʼaogaʼi te ʼu vaega faka Tohi-Tapu ʼaē ʼe tuʼu ʼi te palakalafe ʼe hoa mai moʼo kamata ʼo he fai palalau ʼo ʼuhiga mo te mālama foʼou.
4 Kapau neʼe koutou palalau ki te maʼuhiga ʼo te Tohi-Tapu ʼi takotou ʼuluaki fai palalau, ʼe feala ke koutou toe toʼo te fai palalau, ʼo koutou fakaʼaogaʼi te manatu ʼi te pasina 59 ʼo te tohi “Comment raisonner” pea koutou ʼui age:
◼ “ ʼI te manatu ʼa ʼihi, ʼe mole ʼaoga te tokoni ʼa te Tohi-Tapu ʼi te mālama ʼaenī. Koteā koa la takotou manatu ʼo ʼuhiga mo te faʼahi ʼaia? [Koutou faka fealagia ke fai atu hana tali.] ʼE mole koutou fiafia koa la ʼi te foaki mai e te Tohi-Tapu te tokoni ʼe ina faka fealagia ai te fiafia ʼi te maʼuli faka famili? [Koutou faka fealagia ke fai atu hana tali.] Ko te ʼu meʼa ʼaē ʼe tohi pea mo te ʼu meʼa ʼaē ʼe maʼuliʼi ʼo ʼuhiga mo te maʼuli faka famili kua fetogi, pea ko te ʼu fua ʼaē ʼe tou sisio kiai ʼi te temi nei ʼe mole lelei. Kae ko te ʼu famili ʼaē ʼe nātou maʼuliʼi te meʼa ʼaē ʼe talanoa kiai te Tohi-Tapu ʼe maui mālie tonatou maʼuli pea ʼe nātou fiafia.” Lau ia Kolose 3:18-21. Koutou fakahā age te apone. Kapau ʼe mole ina tali, koutou fakahā age te kiʼi pepa lotu fakafalani ʼaē Pourquoi avoir confiance en la Bible, pea koutou fakahā age ʼe tou fai te ʼu ako faka Tohi-Tapu ʼe mole totogi.
5 ʼE feala ke kamata takotou fai palalau ʼo ʼuhiga mo te ʼaluʼaga ʼo te kau mate ʼaki te manatu ʼaenī:
◼ “Neʼe lahi te ʼu meʼa neʼe tā palalau kiai ʼo ʼuhiga mo te kau mate. ʼI tau manatu, koteā koa la te meʼa ʼe hoko mokā tou mamate? [Koutou faka fealagia ke ina fai atu hana tali.] ʼE lahi te ʼu lotu ʼe nātou akonaki ʼe hoholo atu totatou maʼuli ʼi he tahi ʼaluʼaga. Neʼe punamaʼuli te tokolahi ʼi tanatou ako te manatu ʼa te Tohi-Tapu ʼo ʼuhiga mo te faʼahi ʼaia. [Lau ia Tagata Tānaki 9:5.] Logope la te mole gaūgaūe ʼo te kau mate, kae ʼe mole galoʼi ia nātou. Neʼe fakapapau e te ʼAtua ʼe ina fakatuʼuake ia nātou ke nātou maʼuʼuli ʼo mulimuli ki te takitaki ʼo tona Puleʼaga.” Fakahā age Te Tule Leʼo ʼo te ʼaho 15 ʼo ʼOketopeli peʼe ko te tohi Mauli O Heegata ʼi te pasina 162, pea mo koutou talanoa ki te ʼu vaega faka Tohi-Tapu mo te ʼu paki. Koutou fai he puleʼaki ke koutou fai he tahi ʼaʼahi, ʼaki takotou fakatuʼutuʼu ke kamata he ako faka Tohi-Tapu.
6 Neʼe ʼiloʼi e te tagata Etiopea ʼe mole feala ke mahino mokā ʼe mole ʼi ai he tahi ʼe tokoni age ki ai. (Gāue 8:31) ʼAki te ʼofa neʼe foaki age e Filipo te tokoni ʼaē ʼe ʼaoga ki ai. ʼE feala ke tou fakahā totatou ʼofa moʼoni ki niʼihi ʼaki tatatou tokoni feiā kia nātou.