He ʼu Manatu ʼo ʼUhiga Mo Te ʼu Nusipepa
Te Tule Leʼo ʼaho 1 ʼo Sepetepeli
“ ʼE lagi kua ke ʼiloʼi pē, ko ʼihi lotu ʼe natou fakamaʼua ki tanatou hahaʼi ke natou foaki fakaʼofa he falā. Koteā tau manatu ki te faʼahi ʼaia? [Tuku ke fai mai hana tali.] Fakatokagaʼi muʼa ia te manatu ʼa te Tohi-Tapu. [Lau age ia 2 Kolonito 9:7.] ʼE fakamaʼua koa ki te hahaʼi ʼaē ʼe tauhi ki te ʼAtua ke natou foaki he falā? ʼE tou maʼu ʼi te ʼalatike ʼaenī ia te tali kiai.” Fakahā age ia te ʼalatike ʼaē ʼe kamata ʼi te pāsina 32.
Réveillez-vous! ʼo Sepetepeli
Lau age ia 1 Soane 4:8. Pea kotou ʼui age: “Ko ʼihi ʼe natou tui ko te ʼAtua ʼe ina fakamamahiʼi ʼo talu ai ia te kau agakovi ʼi he ʼifeli kakaha. Ko ʼihi ʼi tanatou manatu ʼe mole ʼalutahi ia te faʼahi ʼaia pea mo te manatu ʼaenī neʼe tou lau ʼi te vaega. Koteā tau manatu ki te faʼahi ʼaia? [Tuku ke fai mai hana tali.] ʼE fakahā ʼi te ʼalatike ʼaenī ia te manatu ʼa te Tohi-Tapu ki te faʼahi ʼaia.” Fakahā age ia te ʼalatike ʼaē ʼe kamata ʼi te pāsina 10.
Te Tule Leʼo ʼaho 1 ʼo ʼOketopeli
“ ʼE manatu ʼihi ʼe ʼui ʼi te Tohi-Tapu, ko Sesu pea mo tana Tamai ʼe ko he ʼu ʼipotasi ʼo he ʼAtua ʼe koga tolu. Koteā tau manatu ki te faʼahi ʼaia? [Tuku ke fai mai hana tali] Fakatokagaʼi muʼa ia te manatu ʼaenī neʼe ʼui e Sesu [lau age ia Luka 22:42.] ʼI tau manatu, ʼe ʼi ai anai koa he ʼuhiga ʼo te ʼu palalau ʼaenī mo kanapau lā neʼe tatau ia te finegalo ʼo Sesu pea mo te finegalo ʼo tana Tamai, pea mo kanapau lā ko Sesu pea mo tana Tamai neʼe ko he foʼi tokotahi pē?” Fakahā age ia te ʼalatike ʼaē ʼe kamata ʼi te pāsina 32.
Réveillez-vous! ʼo ʼOketopeli
“ ʼE feala pē ʼi te ʼu fāmili fuli ke hoko ai ni ʼu fihifihia. ʼI tau manatu, kofea ʼaē ʼe feala ke maʼu ai e te ʼu fāmili he ʼu tokoni ʼe feala hanatou falala kiai pea mo ʼaoga ki tonatou maʼuli? [Tuku ke fai mai hana tali. Pea kotou lau age ia Pesalemo 32:8.] Ko te ʼalatike makehe ʼaenī ʼo te nusipepa Réveillez-vous ! ʼe ina fakahā mai ia te ʼu pelesepeto maʼuhiga Fakatohi-tapu, kapau ʼe muliʼi, pea ʼe fua lelei anai ki te maʼuli ʼo te ʼu fāmili.”