Te Kau Fakamoʼoni ʼa Sehova: Te Kautahi ʼAē ʼe Ina Fua Te Higoa ʼAia

ʼI TE ʼaho 6 ʼo ʼoketopeli 1990, ko te hahaʼi e teitei toko 5 000 neʼe fakatahi ki te Fale ʼo te ʼu Fakatahi ʼa te kau Fakamoʼoni ʼa Sehova ʼi te kolo ʼo Jersey, ʼi te koga fenua ʼo New Jersey, ʼi Amelika, ko te fono ʼa te Sosiete Watch Tower ʼe fai ʼi te taʼu fuli neʼe hoko ai te meʼa fakaofoofo. Ko te pelesita, ʼaē ko John Barr, neʼe ina fakahā ki te hahaʼi ia te ʼata ko tona loaloaga e minuta 55 pea ko te higoa ʼo te ʼata: Te kau Fakamoʼoni ʼa Sehova: Te kautahi ʼaē ʼe ina fua te higoa ʼaia. Ko te hoki hokoe ʼo te ʼata ʼe fai e te Sosiete, kae mole ko te ʼata fakaʼosi pe anai ʼaia.

Ko te foʼi fime viteo ʼaia ʼe ina fakahā te ʼu faʼahiga fakatuʼutuʼu ʼa te hahaʼi ʼa Sehova ʼo ʼuhiga mo te fagonogono ʼo te huafa ʼo te ʼAtua pea mo te faka mafola ʼo te “logo lelei ʼo te puleʼaga”. (Mateo 24:14.) Neʼe fakahā ai te ʼu nofoʼaga tāfito ʼo Brooklyn, ʼi New York, pea ko te ʼu faiga mālie ʼa te ʼu Fale gāue ʼo te Sosiete Watchtower. Neʼe ko te fai liuliuga ʼo te ʼata ʼaia neʼe ko te foʼi fime e 500 000 ʼi te lea fakapilitānia, pea ʼi te temi nei kua feala ke maʼu (peʼe kua vave maʼu pe) ʼi te ʼatu lea e 26a.

Neʼe koteā te ʼui ki te ʼata?

Koteā te ʼui ʼa te hahaʼi ʼaē ʼe mole ko he kau Fakamoʼoni ʼa Sehova ʼo ʼuhiga mo te ʼata ʼaia? Neʼe tohi fēnei e te tagata gaohi koloā:

“Kia ʼau, ko te foʼi fime ʼaia neʼe lelei tona fai. Ko te meʼa ʼaē neʼe ʼau fakatokagaʼi tāfito, neʼe ko te maʼuli ʼo te ʼaoga pea mo te gāue lelei neʼe fai ki te foʼi fime. Neʼe tau galo ia ia ʼau ko te foʼi fime pe ia, pea mo ʼau manatu ʼe laka age ia ʼi he ʼata. ʼE feala pe ke ʼi ai te fakaʼaoga makehe ʼo te foʼi fime ʼaia ki te fakamahino ʼo te ʼuhiga ʼo takotou ʼu nofoʼaga ʼaē ʼi New York. ʼE fakamālo ia ki te gāue maʼuhiga ʼaia.” — Ko te fakamatala ʼaenī ʼa te tagata ko J. J.

Ko nātou ʼaē ʼe nātou ako te Tohi-Tapu mo te kau Fakamoʼoni ʼa Sehova neʼe nātou maʼu te ʼu lelei ʼi tanatou mamata ki te ʼata ʼaia. Ko te talanoa ʼaenī ʼe ina fakamahino tona tupuʼaga:

“ ʼE ʼau fai te ako faka tohi-tapu ʼa te tama ʼe taʼu 20 ʼe ako ʼi te univelesitē. Neʼe tuʼania ʼuhi ko te ʼu tokakovi ʼaē ʼo te malamanei. Kae, ʼi tana ʼosi sio ʼaē ki te ʼata ʼaia pea mo tana sio ki te ʼu tēhina tūpulaga ʼe gāue ʼi te Petele ʼe ʼi ai tanatou ʼamanaki moʼoni ʼo ʼuhiga mo tanatou maʼuli, neʼe fetogi tana aga. Neʼe kau ki te fakatahi makehe ʼaē e ʼaho tahi pea neʼe ina faka ʼui mai ke ʼau fai tana ako faka tohi-tapu ʼo tuʼa lua ʼi te vāhaʼa. Ko te tahi ia ʼaluʼaga, neʼe ko te fafine ʼe ina ako te Tohi-Tapu. Neʼe ko te fafine faiako ʼi te fale ako lalahi pea neʼe ina ʼave te foʼi fime moʼo fakahā ki tona ʼu kaumeʼa. ʼI tanatou ia manatu, ko te kau Fakamoʼoni ʼa Sehova ʼe ko he tahi pe kautahi ʼe mole loko ʼiloa, ʼe mole maʼuhiga, pea mo mole hahaʼi. Neʼe nātou puna’maʼuli ki te gāue faka malamanei ʼo tatatou gāue pea mo tana fua lelei, ʼe ʼau fakamālo kia Sehova.” — Ko te fakamatala ʼaenī ʼa te fafine ko J. B.

“ ʼE mole he ʼu kupu moʼo fakahā ʼaki te fiafia neʼe ʼau logoʼi, he ko te fafine ʼaē ʼe ʼau fai tana ako faka tohi-tapu neʼe tagi ʼaki te loto fiafia ʼi tana leleiʼia tana sio ʼaē ki te foʼi fime. Neʼe ina fai te palalau ʼaenī kae maligi ʼona ʼu loʼimata: ‘ ʼE feafeaʼi ha kita mole ʼiloʼi ko te kautahi ʼaenī ʼa te ʼAtua moʼoni, ʼaē ko Sehova? Neʼe mole ʼau manatu ʼe maʼu he faʼahiga hahaʼi feiā.’ Koia neʼe fēnei leva tana ʼui: ‘ ʼE ʼau fia papitema.’ ” — Ko te fakamatala ʼaenī ʼa te fafine ko C. D.

“Neʼe fua manuʼia ʼaupito kia mātou tamatou fakahā te foʼi fime ʼaia ki te kau ako tohi-tapu. ʼI te tahi afiafi ko te ʼohoana ʼa te fafine ʼaē ʼe ako mo toku ʼohoana neʼe haʼu kia māua. Neʼe ko he tagata neʼe fakafeagai ʼaupito. Neʼe sio ki te ʼata. Hili ʼaia te ʼata, neʼe ina fai tana ʼu fehuʼi pea neʼe mavae ʼi heni mo tana Tohi-Tapu pea mo te tohi faka tohi-tapu ʼaē E Feala Keke Mauli O Heegata Ite Palatiso Ite Kele. Kae ʼi muʼa atu neʼe ina haga ʼo tutu fuli te ʼu tohi faka tohi-tapu ʼo tana ʼohoana!” — Ko te fakamatala ʼaenī ʼa te tagata ko D. H.

Ko te kau tūpulaga neʼe nātou ʼui ko te foʼi fime ʼe kita fia sio ai ʼaupito, ohage ko tana fakahā ʼi te ʼu fakamatala ʼaenī:

“ ʼE ʼau taʼu ono vaelua. Neʼe ʼau leleiʼia te koga ʼo ʼuhiga pea mo te ʼu Tohi-Tapu pea mo te vave ʼa te fafaʼo ʼa te ʼu kalatō.” — Ko te fakamatala ʼaenī ʼa te taʼahine ko K. W.

“Ko ʼama ʼu tamaliki ʼaē kei veliveli neʼe nātou ʼui ʼe mole he polokalama ʼe lelei age ia ʼi te foʼi fime ʼi te ʼu polokalama ʼaē neʼe nātou sio ʼi te televisio.” — Ko te fakamatala ʼaenī ʼa te tagata ko R. C.

“ ʼI te liuga lua ʼaē tana mamata ki te foʼi fime, ko tamā tama ʼaē ʼe taʼu nima, ʼaē neʼe lahi tana tokaga ki te mamata ʼo te ʼata ʼaia, neʼe ina fai te fehuʼi ʼaenī, ‘ ʼe feala koa hatatou sioʼi te foʼi fime ʼaenī ʼi te ʼaho fuli?’ Ko tamā taʼahine ʼaē ʼe taʼu tolu neʼe fēnei tana ʼui ‘ ʼe ʼau fia hu ki te Petele pea ʼe ʼau fia fai te ʼu tohi!’ ” — Ko te fakamatala ʼaenī ʼa te tagata ko M. E.

“Ko taku ʼu tamaliki, ʼaē ko Robin pea mo Shannan, ʼaē ʼe taʼu 12 pea mo taʼu 9 te tahi, neʼe tuʼa lahi tana mamata ki te ʼata ʼaia. Hili ʼaia, neʼe faka ʼui mai e taku taʼahine muli, ‘ ʼe ʼau leleiʼia te ʼalu ʼo fai faka mafola. Ko he meʼa lelei foki’. ʼE mātou logoʼi ko te ʼata ʼaia ʼe ʼi ai tana ʼu fakaʼiloga ʼi tamatou maʼuli faka famili. Ko he meʼa lelei ʼaē ko te ʼavahi ʼo te televisio pea mo mamata ki he polokalama haohaoa!” — Ko te fakamatala ʼaenī ʼa te fafine ko N. B.

“ ʼE ʼau taʼu 13 vaelua. Ko te foʼi ʼata foʼou ʼaia neʼe ina fakahā mai ia te maʼuhiga ʼaē ʼo te falala ki te ʼu fakapapau taulekalela ʼa Sehova. ʼE ko he pilivilesio ia te kau ki te hahaʼi ʼa te ʼAtua” — Ko te fakamatala ʼaenī ʼa te taʼahine ko K. W.

“ ʼE ʼau taʼu 16, pea ko te ʼata ʼaia neʼe ina fakamālohiʼi taku fakakaukau ʼaē ko he toe gāue lahi ʼaenī ʼe lolotoga fai.” — Ko te fakamatala ʼaenī ʼa te taʼahine ko A. M.

“Ko ʼama ʼu tamaliki neʼe nātou fakatokagaʼi ko te polokalama televisio ʼe mole lahi hanatou tokaga ki ai ʼe mole hage ia ko te ʼu faigaoi faka teokalatike ʼaē neʼe nātou mamata ki ai. Pea neʼe ko he meʼa ia neʼe ina fakamālohiʼi tanatou fia hu ki te gāue katoa kia Sehova.” — Ko te fakamatala ʼaenī ʼa te fafine ko L. M.

Māʼia pe la mo te kau Fakamoʼoni ʼa Sehova kua lauʼi taʼu tanatou nonofo ʼi te kautahi neʼe nātou logoʼi te meʼa ʼaia ia nātou ʼi tanatou mamata ki te ʼata.

“Kapau ko te ʼata ʼaia ʼe ina tuku he fakaʼiloga ia tatou ʼaenī ʼaē ko te hahaʼi ʼa Sehova, kae feafeaʼi la tana fakaʼiloga ʼi te hahaʼi kehe ʼaē ʼe nātou mamata ki ai? Ka ʼau fetaulaki mo he faigataʼaʼia ʼuhi ko te faʼahiga meʼa ʼo te tuʼu ʼaenī, pea ʼe ʼau toʼo ʼaia te hola e tahi ʼo toku temi ʼo ʼau ʼalu muʼa ʼo mamata te foʼi fime ʼi taku salō ohage ko haku mamata ki te Petele!” — Ko te fakamatala ʼaenī ʼa K. B.

“Hili ʼaia taku sioʼi te tokaga pea mo te fai fakalelei ʼo te ʼu faʼahiga gāue kehekehe, neʼe ʼau logoʼi ʼe hage ʼe ʼau hu ki te koga fale ʼo mamata ki te ʼu tohi faka tohi-tapu.” — Ko te fakamatala ʼaenī ʼa te fafine ko L. P.

ʼE mātou fakaloto mālohiʼi atu foki ke koutou maʼu hakotou temi ʼo koutou mamata ki te ʼata ʼaia ʼaē ko te Kau Fakamoʼoni ʼa Sehova: Te kautahi ʼe nātou fua te higoa ʼaia. ʼE ina tuku atu anai he ʼaluʼaga kehe ʼo te maʼuli pe ko he tokoni anai kia koutou ke koutou maʼu he falala mālohi ki te ʼu temi ka haʼu.

[Nota ʼi te lalo pasina]