Tou Fakafiafia ʼi Te Tuputupu ʼAē ʼe Fakahoko e Te ʼAtua
1 Ko te kau Kilisitiano ʼi te ʼuluaki sēkulō neʼe ko te ʼu kaugā fai faka mafola faiva ʼo te Puleʼaga. Neʼe nātou fiafia ʼi te ‘tuputupu ʼo te ʼu kokelekasio ʼo kaugamālie ʼi te ʼaho fuli.’ (Gāue 16:5) Ko tanatou fai faka mafola ʼaki he lototoʼa, neʼe aʼu ki Asia, ki Eulopa, pea mo Afelika, ʼo lahi ʼaupito te tānaki ʼo te hahaʼi tui.
2 Neʼe fakakikite e Sesu ʼi te ʼu ʼaho fakamuli, ʼe aʼu anai te gāue fai faka mafola ki te ‘kele katoa pea mo te ʼu puleʼaga katoa’! (Mat. 24:14) Lolotoga te taʼu gāue 1996, neʼe tou maʼu te ʼu tānaki ʼo te tuputupu taulekaleka ʼo te gāue pea mo te lahi ʼo te ʼu kaugā fai faka mafola foʼou ʼo te ʼu fenua ʼi te malamanei katoa. ʼE lahi te ʼu kokelekasio foʼou neʼe fakatuʼu! Ko te tuputupu vave ʼaia kua ʼaoga ai ke laga he ʼu fale ʼo te Puleʼaga ʼe lauʼi teau tupu, pea mo te ʼu Fale ki te ʼu fakatahi lalahi, pea ʼe lahi te ʼu filiale ʼe tonu ke fakalalahi.
3 Neʼe fakahā ʼi Te Minisitelio ʼo Te Puleʼaga ʼo ʼAukusito 1996, te ʼu gāue ʼaē ʼe hoko ʼi Afelika ʼo ʼuhiga mo te ʼu laga fale. Ko te gāue ʼaia ʼe toe fai ʼi Amelika Latina. Ko te taʼu gāue 1996, neʼe aʼu te kaugamālie ʼa te ʼu kaugā fai faka mafola ʼi Mekesike ki te toko 470 098 pea mo te ʼu ako Tohi-Tapu e 600 751, ʼo fakamaʼua ai ke faʼufaʼu he ʼu kokelekasio foʼou e 466! Ko te fakalahi ʼo tonatou ʼu filiale ʼe fakatuʼutuʼu ke fakaʼosi ʼi te taʼu 1998. ʼE toe hoko te tuputupu feiā ʼi te tahi ʼu fenua, pea ʼe lahi ai te ʼu faʼahiga laga fale ʼe fai ʼo ʼuhiga mo te ʼu fakatuʼutuʼu faka teokalatike.
4 Ko te ʼu laga fale ʼe totogi kovi ʼaupito ʼi te potu fuli, pea ʼe lahi te ʼu fenua ʼe mole feala ke lahi te ʼu meʼa ʼofa ʼaē ʼe foaki e te ʼu tēhina. Kae ʼe mahino papau ia, ko tanatou faiva lahi ʼi te gāue ʼa Sehova, ʼe nātou tuputupu ai ʼi te faʼahi fakalaumālie, pea nātou liliu ʼo kaugamālie. ʼE fakamoʼoni mai kia tatou ia Tāʼaga Lea 28:27, ko “ ʼaē ʼe ina foaki kia ia ʼaē ʼe mole maʼu meʼa, ʼe mole masiva anai ia.” Ko tatatou lotolelei ke tou tokoni ki te ʼu tēhina ʼaia ʼi te laga fale, ko tona fua ʼe tou foaki “fakatatau” ai te ʼu koloā kehekehe, ʼo faka fealagia ai kia nātou fuli ke nātou ʼiloʼi te fīmālie ʼi te ʼu meʼa ʼaē ʼe tou foaki pea mo te fiafia ʼaē ʼe nātou maʼu ʼi tanatou sisio ki te tuputupu ʼe fakahoko e Sehova!—2 Ko. 8:14, 15; Gāue 20:35.
[Paki ʼo te pasina 4, 5]
Te Filiale ʼo Paraguay
Te Filiale ʼo Équateur
Te Fakalahi ʼo te Fale ʼi Mekesike
Te Filiale ʼo te République Dominicaine
Te Filiale ʼe Fakalahi ʼi Pelesile
[Paki ʼo te pasina 4, 5]
Te Filiale ʼe Laga ʼi Uruguay
[Paki ʼo te pasina 5]
Mole lahi te falā moʼo laga ʼaki te ʼu Fale ʼo te Puleʼaga ʼi Amelika Latina
1. Pelesile
2. Nicaragua
3. Chili
4. Kolopī
5. Mekesike
6. Pelesile
7. Pérou
8. Venesuela
9. Mekesike