“Te Tokoni ʼi Tona Temi Totonu”
1 ʼE ko he meʼa lelei tatatou maʼu te meʼa ʼaē ʼe ʼaoga kia tatou ʼi tona temi totonu! (Hep. 4:16) ʼI te Fakatahi Faka Tisitilike “Te Kau ʼAve Logo ʼo Te Tokalelei Fakaʼatua,” neʼe tou fiafia ʼi tatatou maʼu te ʼu meʼa gāue e lua ʼi tona temi totonu.
2 Ko te tohi foʼou, Le secret du bohneur familial, neʼe tou maʼu ʼi tona temi totonu. ʼE ina faka maʼuhigaʼi te ʼu manatu tāfito e fā moʼo faka fealagia ki he famili ke maʼuli fiafia: (1) ko te loto lolomi, (2) te fakaʼapaʼapa ki te pule ʼo te famili, (3) te felogoi lelei, pea (4) mo te ʼofa. Ko te ʼu tokoni ʼaē ʼe fakahā ʼi te tohi ʼaia Le secret du bohneur familial, ʼe tokoni anai ki te ʼu famili fuli ʼaē ʼe nātou mulimuli ki te tokoni ʼaia, ke nātou maʼu te tokalelei fakaʼatua. Koutou fakatuʼutuʼu he temi ke koutou lau fakalelei ai te tohi foʼou ʼaia, pea ke koutou fai he ako faka famili ʼaki te tohi ʼaia. Koutou faigaʼi ke koutou ʼiloʼi lelei te ʼu koga ʼo te tohi, ke feala ai hakotou poto ʼi tona fakahā ki te hahaʼi ʼi te temi ʼaē ka tou tufa ai.
3 Ko te kaupepa foʼou, Koteā ʼAē ʼe Fakamaʼua Mai e Te ʼAtua Kia Tatou?, ʼe tou maʼu ʼi tona temi totonu, heʼe tokoni anai te kaupepa ʼaia ki tatatou fakahaʼele ki muʼa te gāue ʼaē ko te fai ʼo ni ʼu tisipulo. Logope la ʼe lagi fakaʼaogaʼi tāfito anai ki te hahaʼi ʼaē ʼe mole faʼa poto lelei ʼi te lautohi, tokolahi te hahaʼi lalahi pea mo te tamaliki ʼaē ʼe popoto ʼi te lautohi, ʼe nātou maʼu anai te ʼu tapuakina ʼaki te ʼu fakamahino faigafua ʼo te ʼu akonaki faka Tohi-Tapu. ʼE lagi ko te kaupepa ʼaia ʼaē ʼe ʼaoga tonu moʼo kamata he ako Tohi-Tapu, pea ʼe hoko atu leva te ako ʼi te tohi Te ʼAtamai Mālama. Ko te fakatuʼutuʼu ʼaia ʼe tokoni moʼoni anai ki te tokolahi, ke nātou mahino tāfito ki te ʼu tapuakina ʼaē ʼe feala ke nātou maʼu mo kapau ʼe nātou fai te ʼu meʼa ʼaē ʼe fakamaʼua mai e te ʼAtua.
4 Neʼe fakahā lelei e Tavite te ʼu meʼa ʼaē ʼi totatou loto, ʼi tana ʼui ʼaē ‘neʼe mole masiva ʼi he meʼa, neʼe fakamokomoko tona nefesi, pea neʼe fonu lelei tona ipu!’ (Pes. 23:1, 3, 5) ʼE tou talitali ʼaki he loto fiafia ke tou tufa te tokoni fakalaumālie ʼaia, moʼo tokoni ki te tokolahi ʼaē ʼe holi fakamalotoloto ke nātou ʼiloʼi pea mo nātou tauhi ki te ʼAtua moʼoni, ko Sehova.