Tou Maʼuliʼi Te Tokalelei Fakaʼatua ʼi Totatou Famili
“Koutou foaki kia Sehova, ia koutou ʼu famili ʼo te hahaʼi, koutou foaki kia Sehova te kolōlia pea mo te mālohi.”—Pesalemo 96:7.
1. Neʼe koteā te faʼahiga maʼuli faka famili ʼaē neʼe fakatuʼutuʼu e Sehova ʼi te kamata?
NEʼE fakatuʼutuʼu e Sehova he maʼuli faka famili tokalelei pea mo fiafia ʼi te temi ʼaē neʼe ina fakatapuʼi ai te ʼuluaki tagata pea mo te ʼuluaki fafine. ʼI tona fakahagatonu, neʼe fiafia ʼaupito ia Atama ʼo ina fakahā ʼaki te ʼu ʼuluaki palalau fakatuketuke ʼaenī: “Ko ia ʼaenī ʼe kua liliu leva ko te hui ʼo toku hui pea mo te kakano ʼo toku kakano. ʼE higoaʼi anai ia ia ko te Fafine, koteʼuhi neʼe toʼo ia ia mai te tagata.”—Senesi 2:23.
2. ʼO mole gata ʼaki pe tana foaki te fiafia ki tana fānau ʼi te kele, koteā te meʼa ʼaē neʼe loto kiai te ʼAtua ʼi tana fakatuʼutuʼu te ʼohoana?
2 ʼI te fakatuʼutuʼu e te ʼAtua te ʼohoana pea mo te famili, neʼe mole gata ʼaki pe tana fakatuʼutuʼu ʼaē ke ina foaki te fiafia ki tana fānau ʼaē ʼe ʼi te kele. Neʼe ina loto ke nātou fai tona finegalo. Neʼe ʼui fēnei e te ʼAtua ki te ʼuluaki taumatuʼa: “Koulua fanaunau, pea koulua liliu ʼo hahaʼi, pea koulua fakafonu te kele, pea koulua puleʼi, pea koulua pule ki te ʼu ika ʼo te tai, pea mo te ʼu manulele ʼo te lagi, pea mo te meʼa maʼuli fuli pe ʼe gaūgaūe ʼi te fuga kele.” (Senesi 1:28) Ko tana fakatuʼutuʼu neʼe ko he fakapale moʼoni ia. Kanapaula neʼe mulimuli ia Atama mo Eva ki te finegalo ʼo Sehova, neʼe feala ke nā fiafia pea mo tanā fānau!
3. Koteā te ʼu meʼa ʼaē ʼe fakamaʼuaʼi ki te ʼu famili ke feala hanatou maʼuʼuli ʼo pipiki ki te ʼAtua?
3 Kae ʼe toe feiā ia ʼaho nei, ʼe fiafia te ʼu famili mo kapau ʼe nātou gāue fakatahi ʼo fai te finegalo ʼo te ʼAtua. Pea ʼe ko he ʼu ʼamanaki lelei ʼaupito ʼaē ʼe maʼu e te ʼu famili fakalogo ʼaia! Neʼe tohi fēnei e te ʼapositolo ko Paulo: “Ko te pipiki ʼaē ki te ʼAtua ʼe ʼaoga ia kia meʼa fuli, koteʼuhi heʼe ina maʼu te fakapapau ʼo te maʼuli ʼaenī pea mo te maʼuli ʼaē ka haʼu.” (1 Timoteo 4:8) Ko te ʼu famili ʼaē ʼe pipiki moʼoni ki te ʼAtua, ʼe nātou mulimuli ki te ʼu pelesepeto ʼa te Folafola ʼa Sehova pea ʼe nātou fai tona finegalo. ʼE nātou mulimuli ki te tokalelei fakaʼatua pea ʼe nātou maʼu ai te fiafia ʼi “te maʼuli ʼaenī.”
Kua Tuʼutāmakiʼia Te Maʼuli Faka Famili
4, 5. He koʼe ʼe feala ke tou ʼui ko te maʼuli faka famili ʼe tuʼutāmakiʼia ʼi te malamanei katoa ia ʼaho nei?
4 ʼE moʼoni, ʼe mole tou maʼu te tokalelei pea mo te fiafia ʼi te ʼu famili fuli. ʼI tana talanoa ʼo ʼuhiga mo te sivi neʼe fai e te kautahi ʼo ʼuhiga mo te hahaʼi, ʼe ʼui fēnei e The New York Times: “ ʼI te ʼu fenua koloaʼia pea mo te ʼu fenua masiva, ʼe hoko te ʼu fetogi lahi ʼi te fakatuʼutuʼu ʼo te famili.” Neʼe ʼui fēnei e te fafine neʼe kau ʼi te sivi ʼaia: “ ʼE hala te ʼui ʼaē ko te famili ʼe tuʼu mālohi pea mo logo tahi, pea ʼe maʼu ai he tāmai ʼe gāue, pea mo he faʼe ʼe tokaga ki te meʼa ʼaē ʼe ʼaoga ki te loto ʼo tana fānau. Ko te meʼa ʼaē ʼe hoko moʼoni ʼi te malamanei katoa, ʼe maʼu te ʼu fafine ʼe mole heʼeki ʼohoana kae kua maʼu fānau, kua tuputupu te mavete ʼohoana, [pea] ʼe mole kei lahi te kaugamālie ʼo te ʼu famili . . .” ʼUhi ko te hoko ʼo te ʼu meʼa ʼaia, ko te ʼu famili ʼe lauʼi miliona ʼe mole kei mālohi tanatou ʼu fakatuʼutuʼu, ʼe mole nātou maʼuli tokalelei, pea mo fiafia, pea ko te tokolahi ʼe nātou mavete. ʼI Sepania ko te lahi ʼo te mavete ʼohoana neʼe tuputupu ko te 1 ʼi te 8 ʼi te kamata ʼo te ʼu taʼu 1990—neʼe lau ko te 1 ʼi te 100 ʼi te ʼu taʼu e 25 ki muʼa atu. ʼE ʼui ʼi te Eulopa, ʼe ko Pilitania ʼaē ʼe lahi tāfito ai te ʼu mavete ʼohoana—ko te toko 4 ʼi te toko 10 ʼohoana ʼe nātou mavete. Ko te fenua ʼaia, ʼe toe lahi ai mo te ʼu faʼe pe ko te ʼu tāmai ʼaē ʼe nātou taupau tokotahi tanatou fānau.
5 ʼE hā mai ko te hahaʼi ʼe nātou fia mavete vave. Ko te tokolahi ʼe nātou ʼolo ki te “Sanetualio ʼaē ʼe ina fakamavete te hahaʼi,” ʼaē ʼe tuʼu ōvi ki Tokio, ʼi Saponia. Ko te fale lotu Shinto ʼaia ʼe ina tali te ʼu kole ʼa te hahaʼi ʼo ʼuhiga mo te mavete ʼohoana, pea mo te fakamavete ʼo te tahi ʼu fakatahi ʼe mole lelei. Ko nātou fuli ʼaē ʼe kau ki te lotu ʼaia, ʼe nātou tohi te meʼa ʼaē ʼe nātou loto kiai ʼi he moʼi papa mānifi, ʼo nātou tautau ʼi loto ʼo te ʼaletale, pea ʼe nātou faikole ke nātou maʼu he tali ki te meʼa ʼaē ʼe nātou kole. ʼE ʼui fēnei e te nusipepa ʼi Tokio, ʼi te temi ʼaē neʼe fakatuʼu ai te ʼaletale kua hili kiai te sēkulō, “ko te ʼu ʼohoana ʼo te ʼu tagata koloaʼia ʼo te fenua, neʼe nātou tohi te ʼu faikole ʼo nātou kole ai ke mavae tonatou ʼohoana ʼi te ʼu fafine ʼaē ʼe nātou manako ai, pea ke nātou toe ʼōmai kia nātou.” Kae ia ʼaho nei, kua lahi tāfito te ʼu kole ʼaē ʼe fai ʼo ʼuhiga mo te mavete ʼa he taumatuʼa, kae mole ko he ʼu kole ʼo ʼuhiga mo te fakatokatoka. ʼE hā lelei mai, ko te maʼuli faka famili kua tuʼutāmakiʼia ʼi te malamanei katoa. ʼE tonu koa ke punamaʼuli te kau Kilisitiano ʼo ʼuhiga mo te faʼahi ʼaia? Kailoa, koteʼuhi ʼe fakahā mai e te Tohi-Tapu te tupuʼaga ʼo te faigataʼaʼia ʼa te ʼu famili ʼi te temi nei.
He Koʼe ʼe Faigataʼaʼia Te ʼu Famili?
6. Koteā te pikipikiga ʼo 1 Soane 5:19 pea mo te tuʼutāmakiʼia ʼo te famili ia ʼaho nei?
6 ʼI te ʼu meʼa ʼaē ʼe tupu ai te faigataʼaʼia ʼo te ʼu famili ia ʼaho nei, ʼe kau kiai te faʼahi ʼaenī: “Ko te malamanei katoa ʼe takoto ia ʼi te mālohi ʼo te agakovi.” (1 Soane 5:19) Koteā te meʼa ʼaē ʼe fai e te agakovi ko Satana te Tevolo? ʼE kovi tana ʼu fakatuʼutuʼu pea ʼe gutuloi. (Soane 8:44) Ko te tupuʼaga la ʼaia ʼo te fonu ʼi te malamanei ia te aga fakakākā pea mo te ʼu aga heʼeʼaoga, ʼaē ʼe fakatupu kovi ai ki te maʼuli faka famili! ʼI tuʼa ʼo te kautahi ʼa te ʼAtua, ko te mālohi ʼa Satana ʼe ina maumauʼi te fakatuʼutuʼu ʼa Sehova ʼo ʼuhiga mo te nofo ʼohoana, pea ʼe ina maumauʼi te tokalelei ʼo te maʼuli faka famili.
7. ʼE lava feafeaʼi ke pikisia te ʼu famili ʼi te ʼu agaaga ʼa te tokolahi ʼo te hahaʼi ʼi te ʼu ʼaho fakamuli ʼaenī?
7 Ko te tahi tupuʼaga ʼo te ʼu fihifihia faka famili ʼe ko te ʼu mamahi ʼe tau mo te malamanei ʼi te temi nei, neʼe talanoa kiai ia 2 Timoteo 3:1-5. Ko te ʼu palalau fakakikite ʼaē neʼe fai ai e Paulo, ʼe hā mai ai ʼe tou maʼuʼuli nei ʼi “te ʼu ʼaho fakamuli.” ʼE mole feala ke tokalelei pea mo fiafia te ʼu famili mo kapau ʼe nātou “kaumeʼa pe mo nātou totonu, kaumeʼa mo te paʼaga, fiatuʼu, fialahi, lea hala ki te ʼAtua, talagataʼa ki te ʼu mātuʼa, maʼuli galo, heʼe agatonu, heʼeʼofa, logogataʼa, fasituʼu, heʼe fakatātāʼofi, fekai, mole manako ki te meʼa ʼaē ʼe lelei, kākā, fiatuʼu, fonu ʼi te fialahi, kaumeʼa mo te ʼu fakafiafia kae mole kaumeʼa mo te ʼAtua, ʼe hage ʼe nātou pipiki ki te ʼAtua, kae nātou lītuʼa ki tona mālohi.” ʼE mole feala ke fiafia he famili mo kapau ʼe ʼi ai he tahi ʼe heʼeʼofa peʼe heʼe agatonu. ʼE lava feafeaʼi ke tokalelei he famili mo kapau ʼe ʼi ai he tahi ʼi te loto fale ʼe fiatuʼu pea ʼe mole ina tali te ʼu fakatuʼutuʼu ʼaē ʼe fai? Ko te meʼa ʼaē ʼe kovi tāfito, ʼe lava feafeaʼi ke maʼu he tokalelei pea mo he fiafia mo kapau ʼe fia kaumeʼa te famili mo te ʼu fakafiafia kae mole fia kaumeʼa ia mo te ʼAtua? Ko te ʼu agaaga ʼaia ʼo te hahaʼi ʼo te mālama ʼaenī ʼaē ʼe puleʼi e Satana. Ko te tupuʼaga la ʼaia ʼo te mole maʼu ʼo te fiafia ʼi te ʼu famili ʼi te ʼu ʼaho fakamuli ʼaenī!
8, 9. Koteā te meʼa ʼaē ʼe lava hoko ʼaki te aga ʼa te fānau ʼo ʼuhiga mo te fiafia ʼo te famili?
8 Ko te tahi tupuʼaga ʼo te mole maʼu e te ʼu famili te tokalelei pea mo te fiafia ʼe ko te agakovi ʼa te ʼu tamaliki. ʼI te fakakikite ʼa Paulo ʼo ʼuhiga mo te ʼu meʼa ʼaē ka hoko ʼi te ʼu ʼaho fakamuli, neʼe ina fakakikite ko te tokolahi ʼo te ʼu tamaliki ʼe nātou talagataʼa anai ki tanatou ʼu mātuʼa. Kapau ko koutou ko he tūpulaga, ko takotou aga ʼe tokoni koa ki tokotou famili ke ina maʼu te maʼuli fiafia pea mo te tokalelei?
9 Ko ʼihi ʼu tamaliki ʼe mole nātou tuku he faʼifaʼitaki lelei ʼi tanatou aga. Ohage la, ko te tūpulaga neʼe ina fai te tohi pauʼu ʼaenī ki tana tāmai: “Kapau ʼe mole ke ʼave ʼau ki Alexandrie, ʼe mole ʼau faitohi atu anai, pea ʼe mole ʼau palalau atu anai kia koe, mo tauʼinē atu, pea kapau ʼe ke haʼu ki Alexandrie, ʼe mole ʼau toe fakaʼalofa atu anai kia koe. ʼE hoko anai te meʼa ʼaia mo kapau ʼe mole ke ʼave ʼau . . . Kae ʼe ʼau kole atu ke ke fakamomoli mai he [alepa]. Kapau ʼe mole ke fakamomoli mai, pea ʼe mole ʼau toe kai anai pea ʼe mole ʼau toe ʼinu anai.” ʼE tatau koa la te meʼa ʼaia mo te ʼu meʼa ʼaē ʼe hoko ʼi te temi nei? Kae ko te tohi ʼaia ʼaē neʼe fai e te foha ki tana tāmai, kua hili kiai taʼu e 2 000 ʼi te Esipito ʼāfea.
10. ʼE lava tokoni feafeaʼi te ʼu tūpulaga ki tonatou ʼu famili ke nātou maʼuliʼi te tokalelei fakaʼatua?
10 Ko te aga ʼaia ʼa te tūpulaga Esipito neʼe mole lagolago ki te tokalelei faka famili. Kae, kua kovi age te ʼu meʼa ʼaē ʼe hoko ʼi te ʼu famili ʼi te ʼu ʼaho fakamuli ʼaenī. Kae ʼe feala kia koutou ʼu tūpulaga ke koutou tokoni ki tokotou famili ke nātou maʼuliʼi te tokalelei fakaʼatua. ʼO feafeaʼi? ʼI takotou fakalogo ki te tokoni faka Tohi-Tapu ʼaenī: “Fānau, koutou talagafua ki ʼakoutou ʼu mātuʼa ia meʼa fuli pe, heʼe ko te meʼa ʼaia ʼe lelei ʼi te ʼAliki.”—Kolose 3:20.
11. ʼE lava tokoni feafeaʼi te ʼu mātuʼa ki tanatou fānau ke nātou liliu ko he ʼu kaugana agatonu ʼa Sehova?
11 E feafeaʼi ia koutou ʼu mātuʼa? ʼAki he agaʼofa, koutou tokoni ki takotou fānau ke nātou liliu ko he ʼu kaugana agatonu ʼa Sehova. ʼE ʼui fēnei ia Tāʼaga Lea 22:6: “Akoʼi te tama ki te ala ʼaē ʼe ʼaoga ki ai; koteʼuhi ka matuʼa anai, pea ʼe mole fakamamaʼo anai ia mai ai.” ʼAki te ʼu akonaki lelei ʼa te Tohi-Tapu pea mo te ʼu faʼifaʼitaki lelei ʼa te ʼu mātuʼa, ʼe lahi te ʼu talavou pea mo te ʼu finemui ʼe mole nātou maliu kehe anai ʼi te ala ʼaē ʼe lelei mokā ʼe nātou lalahi ake. Kae ʼe fakalogo tāfito te faʼahi ʼaia ki te lelei pea mo te lahi ʼo te ako ʼo te Tohi-Tapu pea mo te loto ʼo te tūpulaga.
12. He koʼe ʼe tonu ke maʼu te tokalelei ʼi te ʼapi ʼo he Kilisitiano?
12 Kapau ʼe faiga tatatou famili katoa ke nātou fai te finegalo ʼo Sehova, pea ʼe mahino ʼe tou maʼu anai te tokalelei fakaʼatua. Ko he loto fale faka Kilisitiano ʼe tonu ke maʼu ai te ‘ ʼu kaumeʼa ʼo te tokalelei.’ ʼE fakahā mai ia Luka 10:1-6 neʼe manatu ia Sesu ki te ʼu hahaʼi ʼaia ʼi tana fekauʼi te ʼu tisipulo e toko 70 ʼi tonatou ʼuhiga minisi pea mo ina ʼui age fēnei kia nātou: “Pea ʼi he loto fale pe ʼe koutou hū kiai, koutou ʼui age muʼa, ‘Ke haʼu te tokalelei ki te ʼapi ʼaenī.’ Pea kapau ʼe ʼi ai he kaumeʼa ʼo te tokalelei, ko takotou tokalelei ʼe hili anai kia te ia. Kaʼe kapau ʼe mole ʼi ai, pea ʼe toe liliu atu anai kia koutou.” ʼI tonatou ʼuhiga kaugana ʼa Sehova ʼe nātou ʼolo ʼi te tokalelei ʼo ʼave ki te ʼu ʼapi “te logo lelei ʼo te tokalelei,” ʼo nātou kumi te ʼu kaumeʼa ʼo te tokalelei. (Gāue 10:34-36; Efesi 2:13-18) ʼE mahino ia, ko he loto fale faka Kilisitiano ʼe maʼu ai he ʼu kaumeʼa ʼo te tokalelei, ʼe tonu ke nātou maʼuʼuli ʼi te tokalelei.
13, 14. (a) Neʼe koteā te meʼa ʼaē neʼe loto ki ai ia Naomi ʼo ʼuhiga mo Lute pea mo Olefa? (b) ʼE tonu ke feafeaʼi he loto fale faka Kilisitiano ʼi tona ʼuhiga nofoʼaga mālōlō?
13 ʼE tonu ke maʼu ʼi he loto fale te tokalelei pea mo te maʼuli fīmālie. Neʼe fakaʼamu te finematuʼa vitua ko Naomi, ʼe foaki age anai e te ʼAtua ki tana ʼu taʼahine, ko Lute pea mo Olefa, te maʼuli fīmālie pea mo te loto fakafimālie ʼo ina foaki age kia nāua honā ʼu ʼohoana pea mo honā ʼapi. Neʼe ʼui fēnei e Naomi: “Ke foaki atu e Sehova he meʼa ʼofa kia koulua, pea ke koulua maʼu hokolua nofoʼaga mālōlō ʼo koulua tahi nofo ʼi te ʼapi ʼo tona ʼohoana.” (Lute 1:9) ʼO ʼuhiga mo te fakaʼamu ʼa Naomi, neʼe tohi fēnei e te tagata sivi Tohi-Tapu ʼi te ʼu ʼapi ʼaia ʼo Lute pea mo Olefa “ ʼe nā maʼu ai anai te ʼāteaina mai te ʼu fihifihia pea mo te tuʼania. ʼE nā maʼu ai anai te fīmālie. ʼE ko he nofoʼaga ʼe feala anai ke nā nonofo ai, pea mo feala ke fakafimālieʼi ai tonā loto, pea mo tanā ʼu holi ʼaē ʼe lelei, pea mo nā maʼu ai te tokalelei. Ko te mālohi makehe ʼo te lea faka Hepeleo . . . ʼe hā lelei ʼi te agaaga ʼo te ʼu kupuʼi palalau ʼaē ʼe tuʼu ʼi te tohi ʼo [Isaia 32:17, 18].”
14 Koutou fakatokagaʼi te vaega ʼaenī ʼo Isaia 32:17, 18. ʼE tou lau fēnei: “Ko te gāue ʼo te faitotonu moʼoni ʼe tonu anai ke liliu ko te tokalelei; pea ko te gāue ʼo te faitotonu moʼoni, ko te tokalelei pea mo te fīmālie ʼo aʼu ki he temi ʼe mole ʼiloʼi hona gataʼaga. Pea ʼe tonu anai ke nofo taku hahaʼi ʼi he nofoʼaga tokalelei, pea mo he ʼu nofoʼaga ʼo te falala katoa pea mo he ʼu nofoʼaga mālōlō.” Ko te loto fale ʼo he Kilisitiano ʼe tonu ko he nofoʼaga mālōlō ʼe maʼu ai te faitotonu, te fīmālie, pea mo te tokalelei fakaʼatua. Kae ʼe feafeaʼi anai mo kapau ʼe hoko ai he ʼu ʼahiʼahi, pe ko he ʼu felogoi kehekehe peʼe ko he tahi ʼu fihifihia? ʼI te faʼahi ʼaia, ʼe tonu ke tou ʼiloʼi tāfito ai pe koteā te kalavi ʼo te fiafia faka famili.
Te ʼu Pelesepeto Maʼuhiga e Fā
15. ʼE maʼu ʼifea te kalavi ʼo te fiafia faka famili?
15 Ko te ʼu famili fuli ʼo te kele ʼe nātou maʼu tonatou higoa mai ia Sehova ʼAtua, te Tupuʼaga ʼo te ʼu famili. (Efesi 3:14, 15) Koia ko nātou fuli ʼaē ʼe nātou holi ke nātou maʼu te fiafia faka famili, ʼe tonu ke nātou kumi tokoni ki ai, pea mo nātou vikiviki ia ia, ohage ko te meʼa ʼaē neʼe fai e te tagata fai pesalemo: “Koutou foaki kia Sehova, ia koutou ʼu famili ʼo te hahaʼi, koutou foaki kia Sehova te kolōlia pea mo te mālohi.” (Pesalemo 96:7) Ko te kalavi ʼo te fiafia faka famili ʼe tou maʼu ʼi te Folafola ʼa te ʼAtua, te Tohi-Tapu, pea mo tatatou maʼuliʼi tana ʼu pelesepeto. Ko he famili ʼe ina maʼuliʼi te ʼu pelesepeto ʼaia, ʼe fiafia anai pea ʼe ina maʼu anai te tokalelei fakaʼatua. Koia ʼe tou vakaʼi anai te ʼu pelesepeto maʼuhiga e fā.
16. Koteā te maʼuhiga ʼo te loto lolomi ʼi te maʼuli faka famili?
16 ʼI te ʼu pelesepeto ʼaia, ʼe ʼi ai te pelesepeto ʼaenī: Ko te loto lolomi ʼe maʼuhiga ki te tokalelei fakaʼatua ʼi te maʼuli faka famili. Neʼe ʼui fēnei e te Hau ko Salomone: “Ohage ko he kolo kua maumau, ʼe mole hona kaupā, ʼe toe feiā aipe mo te tagata ʼaē ʼe mole ina tāʼofi tona ʼatamai.” (Tāʼaga Lea 25:28) Ko te tātāʼofi ʼo totatou ʼatamai—ʼaē ko te loto lolomi—ʼe maʼuhiga mo kapau ʼe tou fia maʼu he famili ʼe maʼuli tokalelei pea mo fiafia. Logope la ʼe tou heʼe haohaoa, kae ʼe tonu ke tou maʼu te loto lolomi, ʼaē ʼe ko he fua ʼo te laumālie maʼoniʼoni ʼo te ʼAtua. (Loma 7:21, 22; Kalate 5:22, 23) Ko te ʼatamai ʼe ina fakatupu anai te loto lolomi ia tatou, mo kapau ʼe tou faikole ke tou maʼu te kalitate ʼaia, mo tou maʼuliʼi te tokoni faka Tohi-Tapu ʼo ʼuhiga mo te faʼahi ʼaia, pea mo tou fakatahitahi mo nātou ʼaē ʼe nātou maʼuliʼi te kalitate ʼaia. Ko te faʼahi ʼaia ʼe tokoni anai kia tatou ke tou “fakamamaʼo mai te folonikasio.” (1 Kolonito 6:18) Ko te loto lolomi ʼe tokoni anai kia tatou ke tou līaki te agamālohi, mo tou tekeʼi peʼe tou tauʼi te ʼinu kava, pea mo tou tauʼi te ʼu faigataʼaʼia ʼaki he loto fakatokatoka.
17, 18. (a) E feafeaʼi te mulimuli ʼa he famili Kilisitiano ki te manatu ʼaē ʼe tuʼu ia 1 Kolonito 11:3? (b) E feafeaʼi te maʼu ʼo te tokalelei fakaʼatua ʼi te famili mo kapau ʼe nātou fakaʼapaʼapa ki te pule famili?
17 Koʼeni te tahi pelesepeto maʼuhiga: Ko te ʼiloʼi ʼo te pule faka famili ʼe tokoni anai kia tatou ke tou maʼuliʼi te tokalelei fakaʼatua ʼi totatou ʼu famili. Neʼe tohi fēnei e Paulo: “ ʼE ʼau loto ke koutou ʼiloʼi ko te pule ʼo te tagata fuli pe, ko Kilisito; ko te pule ʼo te fafine, ko te tagata; ko te pule ʼo Kilisito, ko te ʼAtua.” (1 Kolonito 11:3) Ko tona faka ʼuhiga ʼe ko te tagata ʼaē ʼe pule ʼi te famili, pea ʼe lagolago lelei tona ʼohoana ki ai, pea ʼe fakalogo te ʼu tamaliki ki tanā takitaki. (Efesi 5:22-25, 28-33; 6:1-4) Kapau ʼe nātou fai te faʼahi ʼaia, ʼe nātou maʼu ai anai te tokalelei fakaʼatua ʼi tonatou maʼuli faka famili.
18 Ko te tagata ʼohoana Kilisitiano ʼe tonu ke ina manatuʼi ko tana takitaki ʼaē ʼe fakatafito ki te Tohi-Tapu, ʼe mole tonu ke ina fai ʼaki he aga fefeka. ʼE tonu ke faʼifaʼitaki kia Sesu, tona Pule. Logope la neʼe tonu ke “pule kia meʼa fuli,” ko Sesu “neʼe mole haʼu ke tauhi ia ia, kaʼe ke tauhi.” (Efesi 1:22; Mateo 20:28) ʼO toe feiā aipe, ko he tagata Kilisitiano ʼe ina fai tana takitaki ʼaki te ʼofa, pea ʼe feala ai anai ke tokaga lelei ki te ʼu meʼa ʼaē ʼe ʼaoga ki tona famili. Pea ʼe mahino ia ko he fafine Kilisitiano ʼe fia gāue tahi anai mo tona ʼohoana. ʼI tona ʼuhiga “tokoni” pea “mo fakakatoa,” ʼe ina foaki te ʼu kalitate ʼaē ʼe mole maʼu e tona ʼohoana pea ʼe ina foaki kia ia te meʼa ʼaē ʼe ʼaoga moʼo lagolago ki ai. (Senesi 2:20; Tāʼaga Lea 31:10-31) Ko te fai fakalelei ʼo te takitaki ʼe tokoni anai ki te ʼu tāmai pea mo te ʼu faʼe ke nātou fefakaʼapaʼapaʼaki, pea ʼe uga ai tanatou ʼu tamaliki ke nātou fakalogo. ʼIo, ko te fakaʼapaʼapa ki te pule famili, ʼe maʼu ai te tokalelei fakaʼatua ʼi te maʼuli faka famili.
19. He koʼe ʼe maʼuhiga te felogoi lelei ke maʼu ai e te famili te tokalelei pea mo te fiafia?
19 Koʼeni te tolu pelesepeto maʼuhiga ʼe feala ke fakahā: ʼE maʼuhiga te felogoi lelei ki te tokalelei pea mo te fiafia ʼo te famili. ʼE ʼui fēnei ia Sake 1:19 kia tatou: “ ʼE tonu ki te tagata fuli pe, ke vave ʼi te fagono, ke tuai ʼi te palalau, mo tuai ʼi te ʼita.” ʼE tonu ke fakalogo te famili, pea ke nātou fepalalauʼaki koteʼuhi ko te felogoi faka famili ʼe fai ʼaki te ʼu faʼahi ʼaia e lua. Kae tatau aipe peʼe ko te meʼa ʼaē ʼe tou talanoa kiai ʼe moʼoni, ʼe mahino ia ʼe fakatupu mamahi anai, mo kapau ʼe fai ʼaki he ʼu palalau fefeka, pea mo fiatuʼu. Ko tatatou palalau ʼe tonu ke lelei, ke “konakonaʼi ʼaki te māsima.” (Kolose 4:6) Ko te ʼu famili ʼaē ʼe mulimuli ki te ʼu pelesepeto faka Tohi-Tapu pea mo felogoi lelei, ʼe nātou maʼuliʼi te tokalelei fakaʼatua.
20. He koʼe ʼe koutou ʼui ko te ʼofa ʼe maʼuhiga ki te tokalelei faka famili?
20 Koʼeni te fā pelesepeto: Ko te ʼofa ʼe maʼuhiga ki te tokalelei pea mo te fiafia faka famili. Ko te femanakoʼaki ʼa te taumatuʼa ʼe maʼuhiga, pea ʼe feala ke tuputupu ai te ʼofa mālohi ʼi te loto famili. Kae ko te ʼofa ʼaē ʼe maʼuhiga tāfito, ʼe ko te ʼofa ʼaē ʼe haʼu mai te kupu faka Keleka a·gaʹpe. Ko te ʼofa ʼaia ʼaē ʼe tou fakahā kia Sehova, mo Sesu, pea mo ʼotatou tatau. (Mateo 22:37-39) Neʼe fakahā e te ʼAtua te ʼofa ʼaia ki te malamanei ʼi tana foaki tona “ ʼAlo ʼulu tokotahi, koteʼuhi ko ʼaē ʼe tui kia te ia, ke ʼaua naʼa fakaʼauha kaʼe ke ina maʼu te maʼuli heʼegata.” (Soane 3:16) ʼE ko he meʼa taulekaleka mo kapau ʼe feala ke tou fakahā te taʼi ʼofa ʼaia ki totatou famili! Ko te ʼofa lahi ʼaia ʼe ko “he noʼo haohaoa ia ki te logo tahi.” (Kolose 3:14) ʼE ina fakatahiʼi he taumatuʼa pea mo ina uga ia nāua ke nā fefaiʼaki te meʼa ʼaē ʼe lelei pea mo nā toe fai foki ki tanā fānau. Ka hoko he ʼu fihifihia, ʼe tokoni te ʼofa kia nāua ke nā fakatokatoka te ʼu fihifihia ʼaia ʼi te logo tahi. ʼE tou ʼiloʼi ʼe nā fai anai te faʼahi ʼaia, koteʼuhi ko te “ ʼofa . . . ʼe mole ina kumi pe te meʼa ʼaē ʼe ʼaoga kia te ia . . . ʼE ina ʼamo ia meʼa fuli, ʼe tui kia meʼa fuli, ʼe falala kia meʼa fuli, ʼe ina kātakiʼi ia meʼa fuli. Ko te ʼofa ʼe molemo puli ia ʼi he lakaga.” (1 Kolonito 13:4-8) Ei, ʼe maʼuli fiafia te ʼu famili ʼaē ʼe fakatafito tanatou feʼofaniʼaki ki te ʼofa ʼaē kia Sehova!
Tou Maʼuliʼi Tuʼumaʼu Te Tokalelei Fakaʼatua
21. Koteā te meʼa ʼaē ʼe ina fakatuputupu te tokalelei pea mo te fiafia ʼi tokotou maʼuli faka famili?
21 Ko te ʼu pelesepeto ʼaē neʼe tou talanoa kiai pea mo te tahi ʼu pelesepeto ʼaē ʼe haʼu mai te Tohi-Tapu, ʼe tou toe maʼu ʼi te ʼu tohi ʼaē ʼe foaki mai e Sehova ʼaki “te tagata kaugana agatonu mo poto.” (Mateo 24:45) Ohage la, ko te ʼu tokoni ʼaia ʼe tou maʼu ʼi te tohi ʼaē ʼe pasina 192, Le secret du bonheur familial, ʼaē neʼe fakahā ʼi te ʼu Fakatahi Faka Tisitilike ʼa te kau Fakamoʼoni ʼa Sehova ʼi te kele katoa ʼi te taʼu 1996 pea mo te taʼu 1997, ʼaē ko tona kupu tāfito “Te Kau ʼAve Logo ʼo Te Tokalelei Fakaʼatua.” Ko te ako takitokotahi pea mo te ako faka famili ʼo te Tohi-Tapu ʼaki te tohi ʼaia, ʼe feala ke tou maʼu ai he ʼu fua lelei. (Isaia 48:17, 18) ʼIo, ko te maʼuliʼi ʼo te ʼu tokoni faka Tohi-Tapu ʼe mahino ia ʼe ina fakatuputupu ai anai te tokalelei pea mo te fiafia ʼi tokotou famili.
22. Koteā te meʼa ʼaē ʼe tonu ke fakamuʼamuʼa ʼi totatou maʼuli faka famili?
22 ʼE foaki anai e Sehova te ʼu meʼa taulekaleka ki te ʼu famili ʼaē ʼe nātou fai tona finegalo, pea ʼe tau mo feʼauga ke tou fakavikiviki pea mo tou tauhi kia te ia. (Fakahā 21:1-4) Koia, ʼofa pe ke fakamuʼamuʼa e takotou famili te tauhi ʼa te ʼAtua moʼoni. Pea ʼofa pe ke tapuakina koutou e tatatou Tāmai ʼofa ʼaē ʼe ʼi selo, ko Sehova, ʼi takotou maʼuliʼi te tokalelei fakaʼatua ʼi tokotou maʼuli faka famili!
ʼE Koutou Tali Feafeaʼi Anai?
◻ Koteā te ʼu meʼa ʼaē ʼe fakamaʼua ki te ʼu famili ʼaē ʼe pipiki ki te ʼAtua?
◻ He koʼe ʼe faigataʼaʼia te ʼu famili ia ʼaho nei?
◻ Koteā te kalavi ʼo te fiafia faka famili?
◻ Koteā te ʼu pelesepeto ʼaē ka tokoni anai kia tatou ke tou maʼu te tokalelei pea mo te fiafia ʼi te maʼuli faka famili?
[Paki ʼo te pasina 24]
Ko he felogoi lelei ʼe tokoni kia tatou ke tou maʼuliʼi te tokalelei fakaʼatua ʼi te maʼuli faka famili