Tou Tufa Te Tohi Te ʼAtamai Mālama ʼAē ʼe Ina Taki Ki Te Maʼuli Heʼegata
1 Ko te tohi foʼou, Te ʼAtamai Mālama ʼAē ʼe Ina Taki Ki Te Maʼuli Heʼegata, neʼe fai moʼo tokoni ki te hahaʼi ke nātou maʼu fakavilivili te ʼatamai mālama totonu ʼo te moʼoni. ʼI Malesio ʼe tou maʼu te fealagia ʼaē ke tou tufa te tohi ʼaia ʼi totatou telituale. Koteā te ʼu meʼa ʼe feala ke tou ʼui moʼo uga ʼo te fia logo ʼa te hahaʼi?
2 Koʼeni te faʼifaʼitaki ʼe lagi feala anai ke ina fakatupu te fia logo ʼo ia ʼaē kua vaivai tana tui ki te ʼAtua:
◼ “Ko te tokolahi ʼo te hahaʼi neʼe akoʼi ia nātou ke nātou tui ki te ʼAtua, kae ʼi te temi nei kua nātou fakatokagaʼi kua vaivai tanatou tui. ʼI tau manatu he koʼe kua nātou feiā? [Tuku ke fai atu hana tali.] Ko tatatou tui ki te ʼAtua ʼe mālohi mo kapau ʼe tou tokagaʼi te ʼu mātaga ʼo te ʼatulaulau. [Lau ia Pesalemo 19:1.] Ko Ia ʼaē neʼe ina fai te ʼu lao moʼo takitaki ʼo te ʼu meʼa ʼo te lagi, ʼe ina toe foaki mai foki te takitaki maʼuhiga kia tatou. [Lau ia Pesalemo 19:7-9.] Ko te ʼu vaega ʼaenī ʼe nātou fakahā mai ʼe maʼuhiga tatatou ako te ʼu meʼa fuli ʼaē ʼe feala ke tou ako ʼo ʼuhiga mo te ʼAtua pea mo tana ʼu fakatuʼutuʼu. [Fakahā age kia ia te paki ʼo te pasina 4 pea mo te 5, pea mo tou lau te talanoa.] Kapau ʼe ke fia maʼu te ʼatamai mālama maʼuhiga ʼaenī, pea ʼe ʼau tuku atu anai te tohi ʼaenī.”
3 Kapau neʼe koutou palalau mo he tahi kua vaivai tana tui ki te ʼAtua, kae neʼe ina fakahā tana fia logo, ʼe lagi feala ke koutou kamata avahi age te tohi ʼi te paki ʼo te pasina 4 pea mo te 5 pea koutou ʼui fēnei:
◼ “ ʼI tatā ʼuluaki fai palalau, neʼe tā vakaʼi te paki fakafiafia mo matalelei ʼaenī. ʼE tuʼu te fehuʼi ʼi te talanoa, ‘Koteā te meʼa ʼe tonu ke koutou fai ke koutou fiafia ʼi te ʼu meʼa ʼaia?’ Koteā tau manatu ʼo ʼuhiga mo te fehuʼi ʼaia? [Tuku ke fai atu hana tali.] ʼE fakahā lelei mai e te Tohi-Tapu te meʼa ʼe maʼua ke tou fai. [Lau ia Soane 17:3.] ʼE ʼaoga te ʼatamai mālama ki tatatou tui ki te ʼAtua. Ko te ako ʼo te Tohi-Tapu ʼe ko he faʼahi ʼe lelei kia tatou moʼo akoʼi ʼo te meʼa ʼaē ʼe tonu ke tou ʼiloʼi, ʼe ko te ako ʼo te Tohi-Tapu.” Koutou fuli age te kapite 1 pea koutou fakahā age he ʼu manatu fakaloto mālohi ʼi te palakalafe 1 ki te 5. Koutou fakamahino age peʼe feafeaʼi te fai ʼo te ako Tohi-Tapu, pea koutou ʼui age ʼe koutou fia liliu mai ʼo hoko atu te fai palalau.
4 Kapau ʼe koutou manatuʼi he ʼu logo fakaloto mamahi, ʼe feala ke koutou ʼui fēnei:
◼ “Lagi neʼe ke logo ki te [fakahā te meʼa ʼaē neʼe hoko]. Neʼe kua ke feʼekeʼaki koa la peʼe tokaga moʼoni koa te ʼAtua ki te heʼe faitotonu pea mo te ʼu mamahi ʼaē ʼe tou sio kiai peʼe ko te ʼu meʼa ʼaē ʼe hoko kia tatou? [Tuku ke fai atu hana tali.] ʼE fakamoʼoni mai e te Tohi-Tapu ʼe ʼofa te ʼAtua kia tatou, pea ʼe tokoni anai kia tatou ʼi te ʼu temi ʼaē ʼe hoko ai kia tatou te ʼu mamahi.” Tou lau te ʼu vaega ʼo Pesalemo 72:12-17. Tou avahi te tohi ʼi te pasina 70, pea tou fakahā age ko te tohi ʼaia, Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe tali ki te fehuʼi ʼaē ʼe fai e te lauʼi miliona hahaʼi, Pe koʼe koa ʼe fakagafua e te ʼAtua ia te ʼu mamahi? “ ʼE koutou maʼu anai te tali fakaloto fīmālie ʼa te Tohi-Tapu ki te fehuʼi ʼaia. ʼE ʼau fia tuku atu te tohi ʼaenī ke feala hau lau totonu ia te faʼahi ʼaia.”
5 Kapau ʼe koutou liliu ʼo hoko atu takotou fai palalau ʼo ʼuhiga mo te tupuʼaga ʼo te fakagafua e te ʼAtua ia te ʼu mamahi, ʼe feala ke koutou ʼui fēnei:
◼ “ ʼI taku haʼu talu mai ai, neʼe tā palalau ʼo ʼuhiga mo te [fakahā peʼe koteā he faʼahiga meʼa neʼe hoko]. Neʼe tā vakaʼi te fehuʼi ʼaenī he koʼe koa ʼe fakagafua e te ʼAtua ke lahi te ʼu mamahi ʼi te malamanei. Neʼe koteā tau manatu ʼo ʼuhiga mo te meʼa ʼaia? [Tuku ke fai atu hana tali.] ʼE ko he meʼa fakaloto mālohi tatatou ʼiloʼi ʼaē ʼe mole ko te ʼAtua ʼaē ʼe tupu ai te ʼu mamahi ʼaia.” Fuli age te pasina 71 mo te 72 ʼi te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, pea koutou palalau ki he ʼu manatu faka Tohi-Tapu ʼe tuʼu ʼi te palakalafe 3 ki te 5. Koutou ʼui age ʼe koutou toe liliu anai ʼo fakamahino age ki ai pe koʼe ʼe tonu ke tou falala kua vave hoko mai te temi ʼaē ka fakagata ai e te ʼAtua te ʼu mamahi.
6 Kapau ʼe koutou felāveʼi mo he tāmai peʼe ko he faʼe, ʼe feala ke koutou palalau ʼo ʼuhiga mo te famili:
◼ “ ʼE lahi te ʼu mātuʼa ʼe nātou fakamoʼoni ʼe mole ko he meʼa faigafua te taupau ʼo he famili ke maʼuli fiafia. ʼI tau manatu koteā ia te ʼu fihifihia tāfito? [Tuku ke fai atu hana tali.] Tokolahi ia tatou ʼe tou faiga fakamalotoloto, kae ʼe tou tali te ʼu tokoni ʼaē ʼe feala ke lagolago kia tatou ke tou maʼu ai he ʼu fua lelei. ʼE foaki mai e te Tohi-Tapu te ʼu tokoni ʼe lelei ʼaupito. [Lau te ʼu vaega ʼo Kolose 3:12, 18-21.] ʼE lahi te ʼu manatu ʼa te Tohi-Tapu ʼo ʼuhiga mo te faʼahi ʼaia, ohage ko tona tuʼu ʼi te kapite 15 ʼo te tohi ʼaenī, ʼaē ko tona kupu tāfito ‘Ko Te Faʼufaʼu ʼo He Famili ʼe Ina Faka Maʼuhigaʼi Te ʼAtua.’ ʼE maʼu ai te ʼu tokoni faka Tohi-Tapu ʼe nātou fakahā ai peʼe feafeaʼi te tauʼi ʼo te ʼu fihifihi ʼaē ʼe hoko ki tatatou ʼu tamaliki. ʼE ʼau ʼiloʼi papau ʼe ke leleiʼia anai te lau ʼo te tohi ʼaenī.”
7 Kapau ʼe koutou liliu ʼo ʼaʼahi he tāmai peʼe ko he faʼe ʼe tuʼania ʼo ʼuhiga mo te ʼu fihifihia faka famili, ʼe feala ke koutou ʼui fēnei:
◼ “ ʼE ʼau ʼiloʼi ʼi tokotou ʼuhiga tāmai mo faʼe, ʼe koutou loto ke maʼu e takotou ʼu tamaliki te meʼa ʼaē ʼe lelei tāfito kia nātou. Mai tona ʼaluʼaga ʼaē ʼe faigataʼa te puipui ʼo nātou mai te ʼu meʼa kovi kehekehe, koia ʼe tonu ke koutou akoʼi age kia nātou peʼe feafeaʼi hanatou tauʼi te ʼu fihifihia ʼi tonatou maʼuli. Koteā tau manatu ʼo ʼuhiga mo te meʼa ʼaē ʼe feala ke tou fai? [Tuku ke fai atu hana tali.] Ko te meʼa ʼaē ʼe maʼuhiga ʼaupito ke fai e he tāmai peʼe ko he faʼe ʼe ko te akoʼi ʼo nātou.” Fuli age te pasina 145 ki te 146 ʼi te tohi Te ʼAtamai Mālama, pea mo fakatokagaʼi kia ia te ʼu tokoni ʼaoga ʼa te Tohi-Tapu, ʼo fakahā age te maʼuhiga ʼo te ʼu tokoni ʼaia pea ʼe ina maʼu anai he ʼu tapuakina mo kapau ʼe mulimuli kiai. Koutou ʼui age ki ai ʼe koutou toe liliu mai anai ʼo fakahā age ki ai peʼe feafeaʼi te fakaʼaogaʼi ʼo te tohi ʼaia, ke feala hana ʼiloʼi he tahi ʼu meʼa ʼo ʼuhiga mo te maʼu ʼo he maʼuli faka famili fiafia.
8 Kapau ʼe koutou fia palalau fakanounou, ʼe feala ke koutou ʼui fēnei:
◼ “Neʼe kua ke feʼekeʼaki koa la pe koʼe ʼe tou matutuʼa pea mo tou mamate? Ko te kapite 6 ʼo te tohi ʼaenī ʼe ina fakamahino mai te tupuʼaga ʼo te mate pea ʼe feafeaʼi anai te pulihi e te ʼAtua ia te faʼahi ʼaia. ʼE ʼui mai e te Tohi-Tapu kia tatou neʼe fakapapau e te ʼAtua te maʼuli heʼegata kia nātou ʼaē ʼe ʼoʼofa kia te ia. [Lau ia Soane 17:3.] Kapau ʼe koutou fia lau te tohi ʼaenī, pea ʼe koutou fakatokagaʼi anai te lelei ʼo te ʼu manatu ʼaē ʼe maʼu ai.”
9 Kapau ʼe koutou fai he ʼaʼahi ki he tahi neʼe nounou takotou fai palalau, ʼe feala ke koutou ʼui fēnei:
◼ “Neʼe mole fakatuʼutuʼu e te ʼAtua ke tou matutuʼa pea mo tou mamate. Neʼe ina fakatuʼutuʼu ke tou maʼuli ʼo heʼegata ʼi te palatiso ʼi te kele.” Fakahā age te paki ʼo te pasina 188 mo te 189. Lau te palakalafe 11 ʼi te pasina 184. Tou fai he ʼu fakatuʼutuʼu ke tou toe liliu ʼo ʼaʼahi ia ia.
10 Kapau ʼe tou teuteu fakalelei, pea ʼe feala ke tou fakaʼaogaʼi te tohi ʼaenī moʼo ‘avahi ʼo te Tohi-Tapu’ ki te hahaʼi, ke feala ai hanatou maʼu he fiafia lahi!—Luka 24:32.