“Ko Sehova ʼe Ko Toku Tokoni”
1 ʼI te temi ʼaē neʼe fekauʼi e Sesu tana ʼu ʼuluaki tisipulo, neʼe ina tala fēnei age kia nātou: “Koʼeni! ʼE ʼau fekauʼi koutou ohage ko he ʼu ōvi ʼi he lotolotoiga ʼo he faga lupo.” (Mat. 10:16) Neʼe nātou matataku ai koa, ʼo fakagata ai tanatou fai faka mafola? Kailoa. Neʼe nātou maʼu te faʼahiga manatu ʼaē neʼe talanoa kiai te ʼapositolo ko Paulo ʼi tana ʼui fēnei ki tona ʼu kaugā fagona Kilisitiano: “[Koutou] lotomālohi pea mo ʼui: ‘Ko Sehova ʼe ko toku tokoni; ʼe mole ʼau mataku anai. Koteā te meʼa ʼaē ʼe feala ke fai mai e te tagata kia ʼau?’ ” (Hep. 13:6) Neʼe nātou fiafia ʼi te fakalainoaʼi ʼo nātou ʼuhi ko te huafa ʼo Sesu, pea neʼe nātou hoko atu pe tanatou faiakonaki pea mo tanatou kalagaʼi ia te logo lelei.—Gāue 5:41, 42.
2 Ia ʼaho nei, kua vave ʼosi pe te gāue faka mafola ʼaē ʼe fai ʼi te malamanei katoa. Ohage ko tona fakakikite e Sesu, kua tou liliu ko te ʼu meʼa ʼe fehiʼaʼinaʼi e te ʼu puleʼaga fuli. (Mat. 24:9) Ko tatatou gāue faka mafola, neʼe fakafihiʼi pea mo manukinukiʼi, pea neʼe tapuʼi ʼi ʼihi fenua. Kapau ʼe mole feʼauga tatatou tui, pea ʼe lagi tou matataku anai. Kae ʼi tatatou ʼiloʼi ʼaē ko Sehova ʼe ko totatou Tokoni, ʼe tou maʼu ai te fīmālie pea mo te lotomālohi ke tou faʼa kātaki.
3 Ko te lototoʼa ʼe ko te kalitate ʼo ia ʼaē ʼe mālohi, mo fakamalotoloto, pea mo lotomālohi. ʼE kehe ia mo ia ʼaē ʼe mataku, mo fakameʼameʼa, pea mo fula. ʼE ʼaoga tuʼumaʼu te lototoʼa ke faʼa kātaki te kau tisipulo ʼa Sesu. ʼE maʼuhiga ʼaupito te kalitate ʼaia, ke ʼaua naʼa nātou lotovaivai ʼuhi ko te ʼu faʼahiga aga ʼo te mālama ʼaenī ʼaē ʼe fakafeagai ki te ʼAtua. ʼI meʼa fakaloto mālohi leva hatatou vakaʼi te faʼifaʼitaki lelei ʼaupito ʼa Sesu, ʼaē neʼe mālo ʼi te malamanei! (Soane 16:33) Koutou toe manatuʼi foki mo te meʼa ʼaē neʼe ʼui e te kau ʼapositolo ʼaki he lototoʼa ʼi te temi ʼaē neʼe ʼahiʼahiʼi mālohi ai nātou: “ ʼE tonu ke mātou fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata.”—Gāue 5:29.
4 ʼE Mole Tou Homuli ʼi Te Gāue: ʼE tonu ke tou faiga ke tou taupau he manatu ʼe lelei ʼo ʼuhiga mo tatatou gāue fai faka mafola. (Hep. 10:39) ʼAua naʼa galo kia tatou, ʼe fekauʼi tatou e Sehova, ko te fakahā ʼaia ʼo tona ʼofa pea mo tona loto manavaʼofa ki te malamanei katoa. ʼE mole ina kole anai ʼi he temi ki tana kau kaugana ke nātou fai he meʼa ʼe mole hona ʼaoga. Ko meʼa fuli ʼaē ʼe ina fakatotonu mai ke tou fai, ʼe iku anai ki te lelei ʼo nātou fuli ʼaē ʼe ʼoʼofa ki te ʼAtua.—Loma 8:28.
5 Ko te taupau ʼo he faʼahiga manatu ʼe lelei ʼe tokoni anai kia tatou ke tou kumi te hahaʼi ʼaē ʼe hage ko he ʼu ōvi ʼi totatou telituale. ʼE lelei ke mahino kia tatou, ko te mole tokagaʼi e te hahaʼi ia te logo lelei, ʼe ko he fakahā ʼaia ʼo tonatou lotomamahi pea mo tonatou heʼe ʼamanaki. Tou fakahā tatatou ʼofa kia nātou ʼo tou aga fakakaumeʼa pea mo faʼa kātaki fualoa. ʼI te temi fuli pe ʼaē ʼe tou tuku ai he tohi peʼe tou fakatokagaʼi ʼe fia logo te hahaʼi, ʼe tonu ke tou fakatuʼutuʼu ke tou toe liliu fakavilivili ʼo ʼaʼahi ia nātou moʼo fakatuputupu tanatou fia ʼiloʼi ia te moʼoni. ʼE mole tonu ke tou lotolotolua ʼo tou ʼui, ʼe mole feala hatatou kamata he ako Tohi-Tapu peʼe mole tou lava takitaki anai te ako ʼaia. Kae ʼe tonu ke tou kumi tokoni tuʼumaʼu kia Sehova ʼi te faikole ke ina takitaki tatou, ʼo tou falala ki tana tokoni.
6 ʼE tou tui papau, ʼe takitaki anai e Sehova tatatou gāue ʼo aʼu ki tona fakaʼosi. (Vakaʼi ia Filipe 1:6.) Ko tatatou falala ʼāteaina kia te ia ʼi tona ʼuhiga Tokoni ʼe ina fakaloto mālohiʼi tatou, ke “ ʼaua naʼa tou fiu ʼi te fai ʼo te meʼa ʼaē ʼe lelei.”—Kal. 6:9.