Tou Fakatotonu Ke Tou Haga Haʼele ʼi Te Ala ʼa Te ʼAtua ʼAē ʼe Ina Taki Ki Te Maʼuli
1 Ko te koga maʼuhiga ʼo te Fakatahi “Te Faʼahiga Maʼuli ʼAē ʼe Fakamaʼua Mai e Te ʼAtua,” neʼe ko te tonu ʼaē neʼe tou fai ʼi te akonaki fakaʼosi. Neʼe kamata fēnei: “ ʼE tou . . . fakamoʼoni fuli ʼaki he loto katoa, ko te ala ʼa te ʼAtua ʼe ko te ala lelei tokotahi ʼaē ʼe ina taki ki te maʼuli.” Tou fakamanatuʼi ʼihi puani ʼo te tonu ʼaia neʼe tou lagolago fuli kiai ʼi tatatou ʼui, “EI!”
2 ʼE tou fakatotonu ke tou nofo maʼa ia muʼa ʼo Sehova, pea ke tou ʼāteaina mai te ʼu mele fuli pe ʼo te mālama ʼaenī. ʼE tou haga fakamuʼamuʼa anai te finegalo ʼo te ʼAtua ʼi totatou maʼuli. ʼI tatatou fakaʼaogaʼi tana Folafola, te Tohi-Tapu, moʼo takitaki ʼo tatou, ʼe mole tou hēʼia anai mai ai, ʼo tou fakamoʼoni ʼaki ko te ala ʼa Sehova ʼe lelei age ʼi te ala ʼo te mālama.
3 Ko te tokolahi ʼo te hahaʼi ʼe nātou meʼa noaʼi te ala ʼa te ʼAtua ʼaē ʼe ina taki ki te maʼuli, pea ʼe nātou maʼu ai tona ʼu fua kovi. (Sel. 10:23) Koia la ʼaē, ʼe tonu ai ke haga akoʼi tatou e totatou Faiako Lahi, ia Sehova, ʼaē ʼe ina ʼui fēnei: “Koʼeni te ala. Koutou haʼele ai.” (Is. 30:21) Kua fakahā mai e te Tohi-Tapu te ala ʼa Sehova ʼaē ʼe ina taki ki te maʼuli, pea ʼe hā lelei te māʼoluga ʼo te ala ʼaia ʼi te ʼu faʼahi fuli ʼo te maʼuli. Ke feala hatatou haʼele ʼi te ala ʼaia, ʼe maʼuhiga ʼaupito ke tou fakaʼaogaʼi fakalelei te ʼu meʼa ʼaē ʼe akoʼi mai e Sehova kia tatou.
4 Ko Te Polokalama Ako Māʼoluga ʼa Sehova: ʼE akoʼi mai e Sehova kia tatou pe koteā te ʼuhiga moʼoni ʼo te maʼuli, pea e feafeaʼi tona fakaʼaogaʼi ke fua lelei kia tatou. ʼE ina akoʼi tatou ke tou hikihiki te lelei ʼo totatou maʼuli ʼi totatou ʼatamai, mo te ʼu aga ʼaē ʼe tonu ke tou fai, pea mo te faʼahi fakalaumālie. ʼE ina akoʼi mai kia tatou peʼe lava feafeaʼi hatatou nofo tokalelei mo totatou ʼu tēhina, mo totatou famili, pea mo totatou kāiga. ʼE ina fai te faʼahi ʼaia ʼaki tana tohi, ʼaē ko te Tohi-Tapu, pea mo tana kautahi.
5 ʼE maʼuhiga ʼaupito te ʼu fono ʼo te kokelekasio moʼo fakahoko te faʼahi ʼaia. Kapau ʼe tou kau tuʼumaʼu ki te ʼu fono e nima pea mo tou fai ai hatatou ʼu tali, pea ʼe akoʼi anai tatou ke tou popoto ʼi te tala ʼo te logo lelei pea ke tou aga fakapotopoto ʼi totatou maʼuli faka Kilisitiano. (2 Tim. 3:16, 17) Tahi ʼaē meʼa, ʼe foaki mai e totatou Faiako Lahi he ʼu tokoni faka teokalatike ʼi te ʼu fakatahi. ʼE tonu ke tou fakatuʼutuʼu ke ʼaua naʼa tou tō ʼi he fono pe ko he koga ʼo te fakatahi, kapau ʼe mole tou mahaki peʼe mole tāʼofi tatou ʼuhi ko he ʼaluʼaga neʼe hoko fakafokifā kia tatou.
6 ʼOfa pe ke tou haga haʼele ʼi te ʼaho fuli pe ʼi te ala ʼa te ʼAtua ʼaē ʼe ina taki ki te maʼuli, pea ke tou fakavikiviki fuli ai kia Sehova pea mo tou maʼu ai te maʼuli heʼegata!—Is. 48:17.