Tou Poto Faiakonaki ʼi Tatatou Fai Faka Mafola ʼi Te ʼu ʼApi
1 Neʼe ʼiloʼi e te hahaʼi ko Sesu ko te tagata fai faka mafola ʼo te logo lelei. (Luka 8:1) Kae neʼe ʼōmai tāfito te hahaʼi kia ia ʼi tona ʼuhiga tagata faiako. (Mat. 8:19; 9:11) ʼE fakamatala mai e te Tohi-Tapu, “nee ofolele te hahai ki tana akonaki,” pea neʼe “feʼaluʼaki o akonaki i te u kolo nee ovi ai.”—Mat. 7:28; Mko. 6:6.
2 ʼO feiā mo te kau ʼapositolo, neʼe ko te ʼu tagata faiakonaki. Koia, neʼe ko he agamāhani ʼa Paulo tana ‘fakamahino pea mo fakamoʼoni ki te hahaʼi mai te Tohi-Tapu’ te ʼu meʼa ʼaē neʼe ina akoʼi age kia nātou. (Gaue 17:2, 3) Neʼe mālohi tana kalagaʼi te Puleʼaga ʼo te ʼAtua, pea neʼe ina faigaʼi ke tui te hahaʼi kia Sesu. (Gaue 28:23) Kae ko tatou, e feafeaʼi hatatou liliu ko he kau faiako ʼe lelei age mokā tou fakahoko totatou minisitelio ʼi te ʼu ʼapi?
3 Tou Fetogi Tatatou ʼu Palalau ʼo Mulimuli Ki Te Hahaʼi: Ka tou fai faka mafola ʼi te ʼu ʼapi, ʼe tou felāveʼi mo te hahaʼi kehekehe, pea ʼe kehekehe tanatou ʼu fihifihia. ʼE tui ʼihi ki te Tohi-Tapu, kae ko ʼihi kailoa. Koia ʼe tonu ai ke tou fetogi tatatou ʼu palalau ʼo mulimuli ki te ʼu meʼa ʼaē ʼe ʼaoga kia nātou. ʼE koutou ʼiloʼi koa pe koteā te ʼu palalau ʼaē neʼe fai e Sesu ke felogoi mo te “toketa o te lao”? Neʼe fehuʼi age e te tagata ʼaia kia Sesu: “Aliki, kotea ae e tonu ke au fai pea e au mau ai te mauli heegata?” Pea neʼe fai age e Sesu te fehuʼi ʼaenī: “Kotea e tuu i te lao, pe e feafeai tau lau?” (Luka 10:25-28) Neʼe ʼiloʼi e Sesu, ko te tagata ʼaia neʼe ko he “toketa o te lao,” pea ʼe hā ʼi tana ʼu palalau neʼe ina tokagaʼi te faʼahi ʼaia.
4 ʼI te temi ʼaē neʼe fai faka mafola ai Paulo ʼi te Aleopasi, neʼe ina ʼiloʼi ʼe fai palalau mo te kau Senitile ʼe mole nātou mālama ki te ʼu Tohi Faka Hepeleo pea mo Sesu Kilisito. Koia neʼe ina fai ai he ʼu palalau ke nātou mahino ki tana logo. (Gaue 17:22-34) Ohage ko Paulo, ʼe tonu ke tou tokagaʼi te ʼuhiga ʼo ia ʼaē ʼe tou fai palalau mo ia. Kapau ʼe tou fai palalau mo he tūpulaga, pea ʼe tou faka ʼalutahi anai tatatou ʼu palalau ki te ʼu meʼa ʼaē ʼe ina ʼiloʼi. Kapau ʼe tou felāveʼi mo he tahi ʼe ina lau te Tohi-Tapu, pea tou fakaʼaogaʼi te ʼu meʼa ʼaē kua mālama kiai, ohage pe ko te meʼa ʼaē neʼe fai e Sesu ʼi tana fai palalau mo te “toketa o te lao.” Mai tona ʼuhiga ʼaē ʼe mole tatau fuli te hahaʼi, koia ʼe tonu anai ke tou fetogi tuʼumaʼu tatatou ʼu palalau. Kae koteā te tahi puleʼaki ʼaē ʼe feala ke tou fai ke tou faiva ʼi te faiakonaki ʼi te fai faka mafola ʼi te ʼu ʼapi?
5 Tou Fai He ʼu Palalau Moʼo Fakalotoʼi Te Hahaʼi: Ka kita fakalotoʼi he tahi, ko tona faka ʼuhiga ʼe kita fakahā age ki ai te logo lelei ke mahino kiai pea ke tatau tana manatu pea mo te manatu ʼa kita. Moʼo fai te faʼahi ʼaia, ʼe tonu ke kita fakamahino lelei te meʼa ʼaē ʼe kita palalau kiai. Kapau ʼe kita fai feiā, pea ʼe fakalogo anai, kae ʼe toe mahino anai kia ia, ʼe ʼi ai he fakatafito moʼoni ʼo takita ʼu palalau. ʼE lava feafeaʼi hatatou fai ke mahino lelei tatatou faiakonaki?
6 Kapau ʼe tou fai he fehuʼi ʼo ʼuhiga mo te tupuʼaga ʼo he meʼa, pea ʼe tonu ke tou fakahā tona tali. Ko te hahaʼi fuli ʼaē ʼe tou felāveʼi mo nātou, ʼe nātou feʼekeʼaki pe koʼe ʼe tou ʼolo age kiō nātou, pea he koʼe ʼe maʼuhiga feiā te logo ʼaē ʼe tou fakahā, pea he koʼe ʼe tonu ke nātou tali te logo ʼaia. Koutou fai te ʼu fehuʼi ʼaia kia koutou mokā koutou teuteu ʼolo ki te fai faka mafola ʼi te ʼu ʼapi. ʼI te māhina ʼaenī, ʼe tou tufa te tohi Te ʼAtamai Mālama. Kapau ʼe tou fakatuʼutuʼu ke tou fakahā te kapite 8 ʼo ʼuhiga mo te fakagafua e te ʼAtua ia te ʼu mamahi, pea ʼe feala ke tou fai te ʼu fehuʼi ʼaenī kia tatou: He koʼe ʼe tou fai palalau ki te faʼahi ʼaia mo te hahaʼi? He koʼe ʼe ʼaoga ke nātou ʼiloʼi te manatu ʼa te Tohi-Tapu? Koteā anai tona ʼu fua ki tonatou maʼuli? Pea kapau ʼe tou fakatuʼutuʼu ke tou fakaʼaogaʼi he ʼu vaega Tohi-Tapu, he koʼe ʼe tou filifili te ʼu vaega ʼaia?
7 ʼI tatatou ʼosi fakakaukauʼi te ʼu fehuʼi ʼaia, pea ʼe tou faiga anai ke tou maʼu tonatou tali ke mahino te hahaʼi ki te logo ʼaē ʼe tou fakahā. Koutou manatuʼi, ko Paulo neʼe ina “fakamooni mai te Tohi-Tapu” tana ʼu fakamahino ʼo ʼuhiga mo te ʼu vaega.—Gaue 17:3.
8 ʼE toe ʼaoga anai ke tou fai he ʼu palalau fakatātā pea mo he ʼu fehuʼi neʼe teuteuʼi lelei. ʼE nātou uga te hahaʼi ke nātou fakakaukauʼi te ʼu moʼoni ʼaē ʼe tou fakahā age kia nātou, pea ke nātou mahino lelei kiai. Tou fakahā fakapotopoto age te ʼu kupu pea mo te ʼu vaega ʼaē ʼe tou fakaʼaogaʼi. Ko te faʼahi ʼaia ʼe tokoni anai kia nātou ʼaē ʼe fakalogo ke nātou fia ʼiloʼi te ʼu meʼa ʼaē ʼe tou lau age ki ai. ʼE koutou maʼu anai te tahi ʼu tokoni lelei ʼi te kaupepa Te ʼu Tokoni Ki Te ʼu Fai Palalau Faka Tohi-Tapu. Koutou toʼo he temi ke koutou vakaʼi te ʼu manatu ʼaē ʼe fakahā ai pea mo koutou fakaʼaogaʼi mokā koutou fai faka mafola ʼi te ʼu ʼapi.
9 Ko totatou maʼua ke tou akoʼi ki te hahaʼi te ʼu meʼa ʼaē neʼe fakatotonu mai e Sesu. ʼE tonu ai ke tou vakaʼi fakalelei peʼe tou ‘tokaga ki tatatou faiʼakonaki.’ (1 Tim. 4:16) Tou fakaʼaogaʼi he temi lahi pea mo tou faiga mālohi ke tou popoto ʼi te faiakonaki. Kae neʼe mole ʼui koa la e Timoteo ʼo ʼuhiga mo “natou e kinakina i te akonaki mo te faiʼako,” “e tuà lua tanatou tuha mo te fakaapaapa”? (1 Tim. 5:17) Koia ʼaua naʼa koutou tuʼania takotou kole tokoni ki te kau tagata ʼāfea pea mo te kau fai faka mafola ʼaē kua māhani. Tou faikole ke tapuakinaʼi tatou e Sehova ʼi tatatou haga ‘agatonu i te faiʼakonaki.’—1 Tim. 4:13.