ʼE Hā Koa ʼi Takotou ʼu Faikole ʼe Koutou Kaumeʼa Mo Te ʼAtua?

NEʼE kua koutou logo koa la ki he fai palalau ʼa he toko lua? ʼE mahino ia neʼe mole fualoa pea neʼe koutou ʼiloʼi ai peʼe feafeaʼi tanā felogoi​—peʼe nā feʼiloʼiʼaki lelei peʼe mole nā feʼiloʼiʼaki, peʼe ko he ʼu kaumeʼa ʼe nā fefalalaʼaki. ʼO toe feiā aipe, ko ʼatatou ʼu faikole ʼe feala ke hā ai peʼe feafeaʼi tatatou ʼu felogoi mo te ʼAtua.

ʼE fakamoʼoni mai e te Tohi-Tapu kia tatou ko te ʼAtua ʼe “mole mamaʼo ia tatou takitahi.” (Gāue 17:27) ʼI tona fakahagatonu, ʼe ina fakaafe tatou ke tou ʼiloʼi ia ia. ʼE feala ke tou liliu ko hona ʼu kaumeʼa. (Pesalemo 34:8; Sake 2:​23) ʼE feala ke tou kaumeʼa lelei mo ia! (Pesalemo 25:14) ʼE mahino ia, ko tatatou ʼu felogoi mo te ʼAtua ʼe ko te meʼa maʼuhiga ʼaupito ʼaia ʼaē ʼe feala ke tou maʼu ʼi totatou ʼuhiga hahaʼi agahala. Pea ʼe leleiʼia e Sehova tatatou ʼu felogoi lelei mo ia. ʼE moʼoni koteʼuhi ko tatatou ʼu felogoi mo ia ʼe fakatafito ki tatatou tui ki tona ʼAlo ʼulu tokotahi, ʼaē neʼe ina foaki tona maʼuli maʼa tatou.​—Kolose 1:​19, 20.

Koia la ʼaē ʼe tonu ke hā ʼi ʼatatou ʼu faikole totatou ʼofa pea mo tatatou leleiʼia ia Sehova. Neʼe kua koutou logoʼi koa la ʼi takotou ʼu faikole, logope la takotou fakaʼapaʼapa, ʼe mole faʼa loloto moʼoni te ʼu meʼa ʼaē ʼe koutou kole ai? Ko te meʼa ʼaia ʼe hoko māhani. Koteā koa te meʼa ʼaē ʼe ʼaoga moʼo hikihiki te faʼahi ʼaia? Koutou fakamālohiʼi takotou ʼu felogoi lelei mo Sehova ʼAtua.

Koutou Taupau He Temi Ki Te Faikole

ʼUluaki, ʼe ʼaoga he temi loaloaga moʼo taupau he ʼu felogoi faka kaumeʼa. ʼI te ʼaho fuli, ʼe lagi koutou fai palalau mo te tokolahi​—tokotou ʼu vāhaʼa fale, tokotou ʼu kaugā gāue, te hahaʼi taki kā, pea mo te hahaʼi fai fakatau koloā. Kae ʼe mole feala ke koutou ʼui ʼe koutou kaumeʼa moʼoni mo te ʼu hahaʼi ʼaia. Kapau ʼe koutou fakamāmāhani ʼi te fai palalau mo he tahi, pea ʼe liliu ia ko hokotou kaumeʼa, ʼo mole kei koutou palalau ki he ʼu meʼa noa, kae kua koutou fakahā te ʼu meʼa ʼaē ʼe ʼi tokotou loto pea mo te ʼu meʼa ʼaē ʼe koutou manatu kiai.

ʼO toe feiā aipe, ko te faikole ʼe tokoni kia tatou ke tou fakaōvi kia Sehova. Kae ʼe tonu ke tou fakaʼaogaʼi he temi ki te faʼahi ʼaia, ka mole tonu ke gata ʼaki pe he kole fakanounou ʼi te ʼu temi kai. Kapau ʼe lahi takotou palalau kia Sehova, pea ʼe toe faigafua anai takotou fakatokatoka te ʼu fihifihia ʼo tokotou loto, te ʼu meʼa ʼaē ʼe koutou loto kiai, pea mo takotou ʼu gāue. ʼE hoki feala ke tou maʼu he ʼu puleʼaki ki totatou ʼu fihifihia, mo kapau ʼe fakamanatuʼi mai e te laumālie ʼo te ʼAtua te ʼu pelesepeto ʼo tana Folafola. (Pesalemo 143:10; Soane 14:26) Tahi ʼaē meʼa, kapau ʼe koutou faikole, pea ʼe liliu anai ia Sehova maʼa koutou ko he tahi ʼe maʼuli moʼoni, pea ʼe toe ʼāsili ai takotou mahino ʼaē ki tana tokaga manavaʼofa pea mo tana tuʼania ʼaē ʼo ʼuhiga mo koutou.

ʼE moʼoni tāfito te faʼahi ʼaia mokā koutou maʼu he tali ki takotou ʼu faikole. Kae ko Sehova ʼe feala ke “ina fai te ʼu meʼa ʼo lahi age ʼi te ʼu meʼa fuli ʼaē ʼe tou kole pea mo tou loto kiai”! (Efesi 3:​20) Ko te faʼahi ʼaenī ʼe mole faka ʼuhiga leva ʼe fakahoko e te ʼAtua he ʼu milakulo maʼa koutou. Kae ʼi tana Folafola, mo te ʼu tohi ʼa te kalasi ʼo te tagata kaugana agatonu, peʼe ʼaki te ʼu palalau ʼa te ʼu tēhina pea mo tuagaʼane ʼofa, ʼe feala ke ina foaki atu kia koutou te ʼu tokoni pea mo te takitaki ʼaē ʼe ʼaoga. Peʼe lagi feala ke ina foaki atu kia koutou te mālohi ʼaē ʼe ʼaoga ke koutou kātakiʼi peʼe koutou tauʼi te ʼu ʼahiʼahi. (Mateo 24:45; 2 Timoteo 4:​17) Ko te ʼu meʼa ʼaia ʼe nātou fakatupu ʼaki ai hatatou loto fakafetaʼi ki totatou Kaumeʼa ʼi selo!

Koia ʼe tonu ai ke tou taupau he temi ke tou faikole ai. ʼE moʼoni, ʼe tou maʼumaʼua lolotoga te ʼu ʼaho faigataʼa ʼaenī. Kae kapau ʼe koutou ʼoʼofa moʼoni ki he tahi, ʼi te agamāhani ʼe koutou maʼu he temi ke koutou fakaʼaogaʼi ki ai. Koutou fakatokagaʼi te meʼa ʼaē neʼe ʼui tonu e te tagata fai pesalemo: “Ohage ko te holi ʼa te tia fafine ki te ʼu vaitafe, ʼe toe feiā aipe mo te holi ʼo toku nefesi kia te koe, Ê ʼAtua. Ko toku nefesi ʼe fia ʼinu moʼoni ki te ʼAtua, ki te ʼAtua maʼuli. Ko ʼāfea koa ʼaē ʼe ʼau haʼu anai pea mo hā anai ʼi muʼa ʼo te ʼAtua?” (Pesalemo 42:​1, 2) ʼE toe feiā koa mo takotou fakaʼamu ʼaē ke koutou palalau mo te ʼAtua? Kapau koia ʼaia, pea koutou taupau he temi moʼo fai ʼo te faʼahi ʼaia!​—Vakaʼi ia Efesi 5:​16.

Ohage la, ʼe lagi koutou faiga anai ke koutou foimo ʼala ʼi te uhu ke koutou maʼu he temi ke koutou faikole ʼāteaina ai. (Pesalemo 119:147) ʼE ʼi ai koa he ʼu po ʼe mole koutou mamoe ai? Koia, ohage ko te tagata fai pesalemo, ʼe feala ke koutou fakaʼaogaʼi te ʼu temi ʼaia ʼaē ʼe mole koutou mamoe ai, ko he fealagia moʼo fakahā ki te ʼAtua te ʼu meʼa ʼaē ʼe koutou tuʼania kiai. (Pesalemo 63:6) Peʼe lagi feala pe ke tuʼa lahi tatatou fai ʼo he ʼu kole fakanounou ʼi he ʼaho katoa. Neʼe ʼui fēnei e te tagata fai pesalemo ki te ʼAtua: “[ʼE] ʼau pāui kia te koe ʼi te lolotoga ʼo te ʼaho katoa.”​—Pesalemo 86:⁠3.

Tou Hikihiki Tatatou ʼu Faikole Ke Lelei

ʼI ʼihi temi ʼe koutou fakatokagaʼi anai ʼe ʼaoga ke loaloaga takotou ʼu faikole. Lolotoga hakotou faikole nounou, ʼe lagi koutou palalau ki he ʼu meʼa ʼe mole faʼa maʼuhiga. Kae kapau ʼe loaloaga pea mo loloto takotou ʼu faikole, pea ʼe feala anai ke koutou fakahā takotou ʼu manatu pea mo te ʼu meʼa ʼaē ʼe ʼi tokotou loto. ʼI te tahi lakaga, neʼe fakaʼaogaʼi e Sesu te po katoa moʼo faikole. (Luka 6:​12) ʼE mahino papau ia ʼe koutou fakatokagaʼi anai kapau ʼe mole koutou fai fakavilivili takotou ʼu kole, pea ʼe loloto anai pea mo ʼi ai mo tona ʼuhiga.

ʼE mole faka ʼuhiga leva ʼe mole he ʼuhiga ʼo te ʼu meʼa ʼaē ʼe koutou lau, peʼe koutou lau liuliuga he ʼu meʼa ʼe mole hona ʼuhiga. Neʼe fakatokagaʼi fēnei e Sesu: “Pea ka koutou faikole, ʼaua naʼa koutou lau ʼo liuliuga ʼakotou ʼu palalau ohage ko te hahaʼi ʼo te ʼu puleʼaga, heʼe nātou mahalo ʼe fakalogo anai nātou ʼi he lahi ʼo hanatou ʼu palalau. Koia, ʼaua naʼa koutou tatau mo nātou, heʼe ʼiloʼi e te ʼAtua, takotou Tāmai, te meʼa ʼaē ʼe ʼaoga kia koutou ʼi muʼa ia ʼo hakotou kole kia te ia.”​—Mateo 6:​7, 8.

ʼE ʼi ai anai he ʼuhiga ʼo takotou faikole mo kapau ʼe koutou fakakaukauʼi fakatomuʼa te ʼu meʼa ʼaē ʼe koutou fia talanoa kiai. ʼE lahi te ʼu meʼa ʼaē ʼe feala ke tou palalau kiai ʼi tatatou ʼu kole​—ko tatatou fiafia ʼi te minisitelio, totatou ʼu vaivaiʼaga pea mo totatou ʼuhiga heʼe haohaoa, te ʼu meʼa ʼaē ʼe tou tuʼania kiai, tatatou ʼu tuʼania ʼi te faʼahi faka ekonomike, te ʼu fihifihia ʼi te gāue peʼe ʼi te faleako, te maʼuli ʼo totatou famili, te maʼuli fakalaumālie ʼo totatou kokelekasio, pea mo te tahi ʼu meʼa.

ʼI ʼihi temi, ʼe hēʼia koa takotou fakakaukau mokā koutou faikole? Koia koutou faiga mālohi ke koutou fakakaukauʼi te ʼu meʼa ʼaē ʼe koutou kole. Koteʼuhi ʼe lotolelei ia Sehova ke ina ‘tokagaʼi te ʼu meʼa ʼaē ʼe tou kolekole age ki ai.’ (Pesalemo 17:1) ʼE mole tonu koa la ke tou faiga fakamalotoloto ke tou tokagaʼi te ʼu meʼa ʼaē ʼe tou fakaʼui ʼi tatatou ʼu faikole? ʼIo, ‘koutou fakatuʼu takotou fakakaukau ki te ʼu meʼa ʼo te laumālie,’ pea ke ʼaua naʼa koutou tuku ke hēʼia takotou fakakaukau ke manatu ki he tahi age meʼa.​—Loma 8:⁠5.

Ko tatatou faʼahiga palalau kia Sehova ʼe toe maʼuhiga ʼaupito. Logope la tana loto ʼaē ke tou fakakaumeʼa mo ia, kae ʼe mole tonu ke galo kia tatou ʼe tou palalau ki te Tuʼi ʼo te ʼatulaulau. Tou lau pea mo tou metitasioʼi te meʼa fakatupu manavasiʼi ʼaē ʼe tuʼu ia Fakahā kapite 4 pea mo 5. Neʼe sio ia Soane ki te taulekaleka ʼo Ia ʼaē ʼe tou faikole ki ai. ʼE ko he toe pilivilesio ʼaē ʼe tou maʼu, te fealagia ʼaē ke tou fakaōvi pea ke tou palalau kia “Ia ʼaē ʼe heka ʼi te hekaʼaga faka hau”! Ke ʼaua naʼa tou fai he ʼu palalau ʼe mole fakaʼapaʼapa peʼe ko he ʼu palalau ʼe mole tau mo feʼauga. Kae ʼe tonu ke tou faiga ke ‘leleiʼia e Sehova te ʼu palalau ʼo totatou gutu pea mo te metitasio ʼo totatou loto.’​—Pesalemo 19:14.

Kae ʼe tonu ke mahino kia tatou ʼe mole tonu ke tou palalau kia Sehova ʼaki he ʼu faʼahiga palalau ʼe makehe ʼaupito. ʼE ina leleiʼia tatatou aga fakaʼapaʼapa, tatatou ʼu palalau mo totatou loto katoa, tatau aipe peʼe mole faʼa maʼuhiga te faʼahiga fai ʼo tatatou ʼu kole.​—Pesalemo 62:8.

Te Fakaloto Fīmālie Pea Mo Te Loto Mahino ʼi Te ʼu Temi ʼAē ʼe ʼAoga Kiai

Ka ʼaoga kia tatou he tokoni pea mo he fakaloto fīmālie, ʼi te agamāhani ʼe tou kumi tokoni ki hotatou kaumeʼa ʼe felogoi lelei mo tatou. ʼE moʼoni, ʼe mole he tahi age kaumeʼa ʼe faigafua age tatatou fakaōvi ki ai ia Sehova. Ko ia ʼe ko “he tokoni ʼe faigafua tona maʼu ʼi te ʼu temi mamahi.” (Pesalemo 46:1) ʼI tona ʼuhiga “ ʼAtua ʼo te fakaloto fakafimālie fuli,” ʼe ina ʼiloʼi pe koteā te meʼa ʼaē ʼe lelei age kia tatou. (2 Kolonito 1:​3, 4; Pesalemo 5:1; 31:7) Pea ʼe agalelei pea mo agaʼofa moʼoni kia nātou ʼaē ʼe nonofo ʼi he ʼaluʼaga fakaʼofaʼofa. (Isaia 63:9; Luka 1:​77, 78) Kapau ʼe tou faka ʼuhiga ko Sehova ko hotatou kaumeʼa, ʼe tou palalau faʼifaʼitaliha anai ki ai ʼo tou fai fakamalotoloto, pea mo tou fai mālohi. ʼE uga ia tatou ke tou fakahā te ʼu meʼa ʼaē ʼe tou manavasiʼi kiai pea mo te ʼu meʼa ʼaē ʼe tou tuʼania kiai. Koia ʼe tou sio tonu ai peʼe ‘fakaloto fīmālie feafeaʼi e Sehova totatou nefesi.’​—Pesalemo 94:​18, 19.

ʼI ʼihi temi ʼe tou logoʼi ʼe mole tau mo feʼauga ke tou fakaōvi ki te ʼAtua ʼuhi ko ʼatatou ʼu hala. Kae ʼe feafeaʼi anai mo kapau ko hokotou kaumeʼa lelei ʼe agahala atu kia koutou pea ʼe ina kole atu ke koutou fakamolemole age kia ia? ʼE mole koutou fakaloto fīmālieʼi anai koa ia ia? Koia, ʼe tonu koa ke koutou tuʼania naʼa mole fakamolemole atu e Sehova kia koutou? ʼAki he agaʼofa, ʼe ina fakamolemole tona ʼu kaumeʼa ʼaē ʼe agahala ʼuhi ko tonatou ʼuhiga heʼe haohaoa. (Pesalemo 86:5; 103:​3, 8-​11) ʼI tatatou ʼiloʼi te faʼahi ʼaia, ʼe mole tou fakatātāʼofi anai ke tou vete ʼatatatou ʼu agahala kia te ia; ʼe feala ke tou falala ki tona ʼofa pea mo tona manavaʼofa. (Pesalemo 51:17) Kapau ʼe tou lotovaivai ʼuhi ko totatou ʼu vaivaiʼaga, ʼe feala ke tou maʼu he fakaloto fīmālie ʼi te ʼu palalau ʼaē ia 1 Soane 3:​19, 20: “ ʼAki te meʼa ʼaia ʼe tou ʼiloʼi ai anai ko tatou ʼe tou ʼi te moʼoni, pea ʼe tou fakafimālie anai totatou loto ʼi ʼona muʼa, ʼo ʼuhiga mo meʼa fuli ʼaē ʼe tautea ai tatou e totatou loto, heʼe ko te ʼAtua ʼe lahi age ia ʼi totatou loto pea ʼe ina ʼiloʼi ia meʼa fuli.”

Kae ʼe mole tonu ke hoki hoko he faigataʼaʼia, pea tokaga ai te ʼAtua kia tatou. ʼE tokaga ia Sehova ki te ʼu meʼa fuli ʼaē ʼe feala ke malave ki totatou ʼaluʼaga fakalaumālie pea mo te meʼa ʼaē ʼi totatou loto. ʼIo, ʼe mole tonu ke tou manatu ko te ʼu meʼa ʼaē ʼi totatou loto, mo tatatou ʼu manatu, pea mo te ʼu meʼa ʼe ʼaoga kia tatou ʼe mole faʼa maʼuhiga fau ke tou fakahā ʼi tatatou faikole. (Filipe 4:6) Ka koutou fai palalau mo hokotou kaumeʼa, ʼe koutou fai palalau pe koa la ki te ʼu meʼa maʼuhiga ʼe hoko ʼi tokotou maʼuli? ʼE mole koutou toe palalau koa la ki te ʼu meʼa ʼaē ʼe mole faʼa maʼuhiga? ʼO toe feiā aipe, koutou palalau faʼifaʼitaliha kia Sehova ʼo ʼuhiga mo he faʼahi ʼo tokotou maʼuli, ʼo mahino kia koutou ʼe “tokaga ia kia koutou.”​—1 Petelo 5:⁠7.

ʼE mahino ia, ko he fakakaumeʼa mo he tahi ʼe mole loaloaga anai mo kapau ʼe koutou palalau pe ʼo ʼuhiga mo koutou totonu. ʼO toe feiā aipe, ʼi tatatou ʼu faikole ʼe mole tonu ke tou palalau pe ʼo ʼuhiga mo tatou. ʼE tonu anai ke tou fakahā totatou ʼofa pea mo tatatou tuʼania ʼo ʼuhiga mo Sehova pea mo tana ʼu meʼa. (Mateo 6:​9, 10) Ko te faikole ʼe mole ko he fealagia pe ʼaia ke tou kole ai te tokoni ʼa te ʼAtua, kae ʼe ko he fealagia ke tou fakamālo ai ki ai pea mo tou fakavikiviki kia te ia. (Pesalemo 34:1; 95:2) Ko “te ʼatamai mālama” ʼaki tatatou ako takitokotahi ʼe tokoni anai kia tatou ʼi te faʼahi ʼaia, ke tou feʼiloʼi ʼaki lelei mo Sehova pea mo tou ʼiloʼi lelei tana ʼu ala. (Soane 17:⁠3) ʼE lagi koutou tokagaʼi anai ʼe ʼaoga tāfito ke koutou lau te tohi ʼo te ʼu Pesalemo, pea mo koutou vakaʼi ai pe neʼe feafeaʼi te palalau ʼa ʼihi ʼu kaugana agatonu kia Sehova.

Ko te fakakaumeʼa mo Sehova ʼe ko he meʼa ʼofa maʼuhiga moʼoni. Tou fakahā ʼe tou mahino ki te faʼahi ʼaia, ʼo tou fai he ʼu kole ʼe hā ai tatatou felogoi lelei mo ia, ʼo tou fai fakamalotoloto, pea mo tou fakahā ki ai te ʼu meʼa ʼaē ʼo ʼuhiga mo tatou. Pea ʼe tou maʼu ai anai te fiafia ʼaē neʼe fakahā e te tagata fai pesalemo, ʼi tana ʼui fēnei: “Manuʼia ia ia ʼaē ʼe ke fili pea mo fakaōvi atu [kia te koe].”​—Pesalemo 65:⁠4.

[Paki ʼo te pasina 28]

ʼE feala ke tou faikole ki te ʼAtua lolotoga he ʼaho katoa, mokā tou maʼu he ʼu faigamālie moʼo fai ʼo te faʼahi ʼaia