Kua Fakaōvi Mai Te Temi ʼAē Ka Fakamālōlō Faka Milakulo Ai Te Malamanei

“NEʼE molemo heʼeki mātou mamata ki he meʼa fēnei.” Ko te ʼui ʼaia ʼa te hahaʼi ʼaē neʼe nātou sisio ki te fakamālōlō faka milakulo e Sesu te tagata palalisia. (Maleko 2:​12) Neʼe toe fakamālōlō foki e Sesu te ʼu tagata kivi, te ʼu tagata tuli, pea mo te ʼu hahaʼi ketu, pea neʼe toe fai feiā e tana kau tisipulo. Ko te mālohi fea ʼaē neʼe fai ʼaki e Sesu te ʼu meʼa ʼaia? Neʼe koteā te ʼaoga ʼo te tui ʼi te fakahoko ʼo te ʼu fakamālōlō ʼaia? ʼE tokoni feafeaʼi mai te ʼu milakulo ʼo te ʼuluaki sēkulō ke tou mahino lelei age ki te ʼu fakamālōlō faka milakulo ʼaē ʼe fai ia ʼaho nei?​—Mateo 15:​30, 31.

“Kua Fakamālōlō Koe e Tau Tui”

Ko te ʼu hahaʼi faifaitoʼo fakalauʼakau ia ʼaho nei, ʼe nātou leleiʼia te fakaʼaogaʼi ʼo te ʼu palalau ʼaenī, “Kua fakamālōlō koe e tau tui,” ʼaē neʼe fai e Sesu ki te fafine ʼaē neʼe ʼalu tona toto lolotoga taʼu e 12, pea neʼe ʼalu kia Sesu ke ina fakamālōlō ia ia. (Luka 8:​43-​48) Ko te ʼu palalau ʼaia ʼa Sesu ʼe nātou faka ʼuhiga koa ko te fakamālōlō ʼo te fafine neʼe fakalogo pe ki tana tui? Neʼe ko he faʼifaʼitaki koa la ʼo he “fakamālōlō ʼe fai ʼaki te tui” ohage ko tona fai ia ʼaho nei?

Kapau ʼe tou vakaʼi fakalelei te fakamatala faka Tohi-Tapu, ʼe tou tokagaʼi ai, neʼe mole fakamaʼua e Sesu pea mo tana kau tisipulo kia nātou ʼaē neʼe mahamahaki, ke nātou fakahā tanatou tui ʼi muʼa ʼo tonatou fakamālōlō. Ko te fafine ʼaē ʼe talanoa ki ai ʼi ʼoluga neʼe haʼu kia Sesu, pea neʼe mole ina ʼui he meʼa kia ia, kae neʼe ina fāfā te kofu ʼa Sesu ʼi ʼona tuʼa, pea “ ʼi te moʼi temi pe ʼaia neʼe gata ai te ʼalu ʼo tona toto.” ʼI te tahi ʼaluʼaga, neʼe fakamālōlō e Sesu te tagata ʼaē neʼe kau ia nātou ʼaē neʼe ʼōmai ʼo puke ia ia. Neʼe fakamālōlō e Sesu māʼiape la mo te tagata neʼe mole ina ʼiloʼi pe neʼe ko ai ia ia.​—Luka 22:50, 51; Soane 5:​5-9, 13; 9:​24-​34.

Kae neʼe koteā te ʼaoga ʼo te tui ʼi te ʼu milakulo ʼaia? ʼI te temi ʼaē neʼe nonofo ai ia Sesu pea mo tana kau tisipulo ʼi te tisitilike ʼo Tile mo Sitoni, neʼe haʼu te fafine Fenisia pea neʼe kalaga mālohi fēnei: “ ʼOfa mai kia te ʼau, ʼAliki, Foha ʼo Tavite! Ko taku taʼahine kua kovi ʼaupito tona gaohi e temonio.” Koutou fakakaukauʼi tona lotomamahi ʼi tana kole mamahi fēnei: “ ʼAliki, tokoni mai kia te ʼau!” ʼI te ʼofa ʼa Sesu kia ia, neʼe tali fēnei e Sesu: “Ê fafine, ʼe lahi tau tui; ke hoko kia te koe ohage pe ko te meʼa ʼe ke loto ki ai!” Pea neʼe mālōlō ai tana taʼahine “ ʼi te hola pe ʼaia.” (Mateo 15:21-​28) ʼE hā lelei mai, ko te tui neʼe maʼuhiga ʼi te fakamālōlō ʼaia, kae neʼe ko ai ʼaē neʼe tui? Koutou fakatokagaʼi neʼe ko te tui ʼa te faʼe ʼaē neʼe vikiʼi e Sesu, ka mole ko te tui ʼa te taʼahine ʼaē neʼe mahaki. Pea neʼe tui kiteā? ʼI tana fakahigoaʼi ia Sesu ko te “ ʼAliki, Foha ʼo Tavite,” neʼe fakamoʼoni e te fafine ia muʼa ʼo te hahaʼi, ko Sesu neʼe ko te Mesia ʼaē neʼe fakapapauʼi mai. Neʼe mole ko he fakahā pe ʼaia ʼo te tui ki te ʼAtua, peʼe ko te tui ki te mālohi ʼo ia ʼaē ʼe faifaitoʼo. ʼI te ʼui ʼa Sesu “Kua fakamālōlō koe e tau tui,” neʼe ina faka ʼuhiga ai ko nātou ʼaē neʼe mamahi neʼe mole nātou ʼolo anai kia te ia ke ina fakamālōlō ia nātou, mo kanapaula neʼe mole nātou tui kia te ia ʼi tona ʼuhiga Mesia.

ʼI tatatou vakaʼi te ʼu faʼifaʼitaki faka Tohi-Tapu ʼaia, ʼe mahino mai kia tatou ko te ʼu fakamālōlō ʼaē neʼe fai e Sesu ʼe kehekehe ʼaupito mo te ʼu fakamālōlō ʼaē ʼe fai māhani ia ʼaho nei. Ko te hahaʼi​—neʼe mole nātou kalaga, mo hihiva, pea mo fetāgihi, neʼe mole nātou matapopō pea mo fai he tahi ʼu meʼa feiā—​pea neʼe mole avea ia Sesu. Tahi ʼaē meʼa, neʼe mole ʼui e Sesu neʼe mole feala tana fakamālōlō ia ia ʼaē neʼe mahaki koteʼuhi neʼe mole feʼauga tana tui pe neʼe mole feʼauga tana falā.

Ko Te ʼu Fakamālōlō ʼAē Neʼe Fai ʼAki Te Mālohi ʼo Te ʼAtua

Neʼe fakahoko feafeaʼi te ʼu fakamālōlō ʼa Sesu pea mo tana kau tisipulo? ʼE tali fēnei e te Tohi-Tapu, “neʼe ia te ia te mālohi ʼo Sehova ke ina fai ai he ʼu fakamālōlō.” (Luka 5:​17) ʼI tana ʼosi fai te tahi fakamālōlō, ʼe ʼui fēnei ia Luka 9:​43, “neʼe nātou ōfo fuli ʼi te mālohi fakaofoofo ʼo te ʼAtua.” Ko te meʼa lelei ʼaē neʼe fai e Sesu, he neʼe mole ina faka maʼuhigaʼi ia ia ʼi tona ʼuhiga tagata fakamālōlō. ʼI te tahi lakaga, neʼe ina faka ʼāteaina te tagata neʼe ulusino ai te kau temonio, pea neʼe ʼui maʼana kia ia: “ ʼAlu ki tou ʼapi, ki ʼou kāiga, pea ke fakamatala age kia nātou te ʼu meʼa fuli ʼaē neʼe fai e Sehova maʼa koe pea mo tona manavaʼofa ʼaē kia koe.”​—Maleko 5:​19.

Mai tona ʼuhiga ʼaē ko Sesu pea mo te kau ʼapositolo neʼe nātou fai te ʼu fakamālōlō ʼaki te mālohi ʼo te ʼAtua, ʼe mahino lelei mai kia tatou pe koʼe neʼe mole ʼaoga tuʼumaʼu ke tui ia ia ʼaē neʼe fakamālōlō, ke feala ai ke lelei tona mahaki. Kae neʼe tonu ke tui mālohi ia ia ʼaē neʼe ina fai te fakamālōlō. Koia, ʼi te temi ʼaē neʼe mole feala ai ki te kau tisipulo ʼa Sesu ke nātou kapu te temonio ʼaē neʼe lahi tona mālohi, neʼe fakahā age e Sesu kia nātou te tupuʼaga ʼo te faʼahi ʼaia: “ ʼE tupu ko takotou tui vaivai.”​—Mateo 17:20.

Ko Te Fakatuʼutuʼu ʼo Te ʼu Fakamālōlō Faka Milakulo

Logope la neʼe lahi te ʼu fakamālōlō ʼaē neʼe fai e Sesu lolotoga tona minisitelio ʼi te kele, kae neʼe mole ko tona fakatuʼutuʼu tāfito te fai ʼo he ‘minisitelio fai fakamālōlō.’ Ko te ʼu fakamālōlō faka milakulo ʼaē neʼe ina fai​—ʼaē neʼe mole ina kole ki te hahaʼi he ʼu meʼa ʼofa moʼo totogi ʼo te faʼahi ʼaia—​neʼe mole faʼa maʼuhiga fau mokā fakatatau ki tona maʼua tāfito, ʼaē neʼe ko te “faka mafola [ʼo] te logo lelei ʼo te puleʼaga.” (Mateo 9:​35) ʼE ʼui fēnei e te Tohi-Tapu, ʼi te tahi temi, “neʼe ina tali fakaleleiʼi ia nātou pea mo talanoa age kia nātou ʼo ʼuhiga mo te puleʼaga ʼo te ʼAtua, pea neʼe ina fakamālōlō ia nātou ʼaē neʼe ʼaoga ke fakamālōlō.” (Luka 9:​11) ʼI te ʼu fakamatala ʼo te Evaselio, neʼe tautau fakahigoaʼi ia Sesu ko te “Tagata Faiako” ka mole ko he “Tagata Faifaitoʼo.”

Kae he koʼe neʼe fai e Sesu he ʼu fakamālōlō faka milakulo? Neʼe ina fai tāfito te faʼahi ʼaia moʼo fakamoʼoni ki tona ʼuhiga Mesia ʼaē neʼe fakapapauʼi mai. ʼI te temi ʼaē neʼe pilisoniʼi ai ia Soane Patita, neʼe ina fia ʼiloʼi papau pe neʼe ina fakahoko te ʼu meʼa ʼaē neʼe fekauʼi e te ʼAtua ke ina fai. Neʼe ina fekauʼi tana kau tisipulo kia Sesu pea neʼe ina kole fēnei age: “ ʼE ko koe koa ʼAē ʼe Haʼu, peʼe tonu koa ia ke mātou talitali ki he tahi age?” Koutou fakatokagaʼi te meʼa ʼaē neʼe ʼui e Sesu ki te kau tisipulo ʼa Soane: “Koutou ʼolo ʼo fakamatala kia Soane te ʼu meʼa ʼaē ʼe koutou fagono pea mo mamata kiai: Kua toe sio te kivi, pea kua haʼele te ketu, kua fakamaʼa te kilia, pea kua logo te tuli, pea kua fakatuʼuake te kau mate, pea ko te logo lelei kua fakahā ki te kau māsisiva.”​—Mateo 11:​2-5.

ʼIo, ko te fakahoko e Sesu te ʼu fakamālōlō pea mo te tahi ʼu milakulo ʼaē ʼe talanoa kiai ʼi te ʼu Evaselio, ʼe ina fakamoʼoni mai ki tona ʼuhiga Mesia ʼo te fakapapau, ko Ia “ ʼAē ʼe Haʼu.” Neʼe mole ʼaoga ki te hahaʼi ke nātou “talitali ki he tahi age.”

ʼE Hoko Koa Te ʼu Fakamālōlō Faka Milakulo Ia ʼAho Nei?

Koia, ʼe tonu koa ke tou talitali ki he tahi ʼu fakamoʼoni ʼo te mālohi ʼo te ʼAtua ʼaki te ʼu fakamālōlō? Kailoa. ʼAki te ʼu milakulo ʼaē neʼe ina fakahoko ʼaki te mālohi ʼo te ʼAtua, neʼe fakamoʼoni ai e Sesu ʼe mole feala ke fakafihiʼi, neʼe ko ia te Mesia ʼaē neʼe fakapapau mai e te ʼAtua. Ko te ʼu gāue mālohi ʼa Sesu ʼe tohi ʼi te Tohi-Tapu ke lau e te hahaʼi fuli. ʼE mole ʼaoga ki te ʼAtua ke ina toe fakamoʼoni tona mālohi ʼo ina fai liuliuga te ʼu milakulo ʼaia ki te ʼu taʼiake fuli.

ʼE lelei ke tou fakatokagaʼi, ko te ʼu fakamālōlō pea mo te tahi ʼu milakulo neʼe mole feʼauga ʼi ʼihi temi moʼo fakatupu te tui ʼa te hahaʼi. Māʼiape la mo ʼihi hahaʼi ʼaē neʼe mamata ki te ʼu milakulo ʼa Sesu, neʼe mole nātou tui neʼe lagolago te Tāmai ʼaē ʼe ʼi selo kia te ia. “Logope la neʼe lahi te ʼu fakaʼiloga neʼe ina fai ʼi ʼonatou muʼa, neʼe mole nātou tui kia te ia.” (Soane 12:37) Koia, ʼi tana ʼosi palalau ʼo ʼuhiga mo te ʼu meʼa ʼofa faka milakulo kehekehe​—ʼaē ko te poto ʼi te lea faka polofeta, ko te poto ʼi te ʼu lea kehekehe, ko te ʼu fakamālōlō, pea mo te tahi ʼu meʼa feiā—​ʼaē neʼe foaki age e te ʼAtua ki niʼihi ʼi te kokelekasio Kilisitiano ʼo te ʼuluaki sēkulō, neʼe takitaki e te laumālie ia Paulo ke ina ʼui fēnei: “Peʼe ko he ʼu poto ʼi te lea faka polofeta ʼe pulihi anai ia; peʼe ko te palalau ʼi te ʼu lea ʼe fakagata anai ia, peʼe ko he ʼatamai mālama ʼe pulihi anai ia. Heʼe mole katoa tatatou mahino, pea ʼe mole katoa tatatou lea faka polofeta; kae ka tau mai anai te meʼa ʼaē ʼe katoa, ko te meʼa ʼaē ʼe mole katoa ʼe fakagata anai ia.”​—1 Kolonito 12:28-​31; 13:​8-​10.

ʼE mahino papau ia, ko te tui ki te ʼAtua ʼe maʼuhiga ʼaupito ke lelei totatou maʼuli. Kae kapau ʼe fakatafito te tui ʼa he tahi ki he ʼu fakapapau loi ʼo ʼuhiga mo he ʼu fakamālōlō, pea ʼe puli anai tana ʼamanaki. Tahi ʼaē meʼa, ʼi tana talanoa ki te temi ʼo te fakaʼosi, neʼe fai e Sesu te fakatokaga ʼaenī: “ ʼE mafuta ake anai te ʼu Kilisito loi pea mo te ʼu polofeta loi, ʼo nātou fai anai te ʼu fakaʼiloga lalahi pea mo te ʼu meʼa fakatalakitupua, ke hēhē ai, māʼia mo nātou ʼaē kua fili, mo kapau ʼe feala.” (Mateo 24:24) ʼO hilifaki ki te ʼu milakulo loi pea mo te ʼu aga kākā, ʼe toe hoko anai foki mo te ʼu meʼa fakatalakitupua ʼaē ʼe fai ʼaki te mālohi ʼa te kau temonio. Koia, ʼe mole tonu ke tou punamaʼuli ʼi te logo ki te ʼu meʼa fakaofoofo mo faikehe ʼaē ʼe hoko, pea ʼe mole feala ke fakatafito kiai te tui fakamalotoloto ʼaē ki te ʼAtua.

Mai tona ʼuhiga ʼaē ʼe mole kei ʼi ai ia ʼaho nei he tahi ʼe ina fai te ʼu fakamālōlō ohage ko te ʼu fakamālōlō ʼaē neʼe fai e Sesu, ʼe tonu koa ke tou lotomamahi ʼuhi ko te faʼahi ʼaia? Kailoa ia. ʼI tona fakahagatonu, ko nātou ʼaē neʼe fakamālōlō e Sesu, neʼe nātou toe mahamahaki. Ko nātou fuli ʼaia, neʼe nātou matutuʼa pea mo nātou mamate. Neʼe mole tologa fualoa te ʼu fua lelei ʼo te fakamālōlō ʼaē neʼe fai kia nātou. Kae neʼe lahi te faka ʼuhiga ʼo te ʼu fakamālōlō faka milakulo ʼa Sesu, he neʼe nātou fakatātā te ʼu tapuakina ʼaē ka hoko anai ʼi te temi ka haʼu.

Koia, ʼi tanā ʼosi vakaʼi ia te Folafola ʼa te ʼAtua, te Tohi-Tapu, Ko Alexandre pea mo Benedita ʼaē ʼe talanoa ki ai ʼi te kamata ʼo te alatike ʼaenī, neʼe mole kei nā tui ki te ʼu faitoʼo faka milakulo ʼaē ʼe fai ia ʼaho nei pea mo te ʼu fakamālōlō fakatemonio. Kae ʼe nā tui papau ko te ʼu fakamālōlō faka milakulo ʼe mole ko he meʼa neʼe hoko pe ʼi te temi muʼa. Koteā tona tupuʼaga? Ohage ko te toko lauʼi miliona hahaʼi ʼi te kele katoa, ʼe nā ʼamanaki ki te ʼu tapuakina ʼo te ʼu fakamālōlō ʼaē ka fakahoko anai e te Puleʼaga ʼo te ʼAtua.​—Mateo 6:​10.

ʼE Pulihi Anai Te Mahaki Pea Mo Te Mate

Ohage ko te meʼa ʼaē neʼe kua tou vakaʼi, ko te fakamālōlō ʼo nātou ʼaē neʼe mahamahaki pea mo te fai ʼo te tahi ʼu milakulo, neʼe mole ko te fakatuʼutuʼu tāfito ʼaia ʼo te minisitelio ʼa Sesu. Kae ko tana gāue tāfito neʼe ko te faka mafola ʼo te logo lelei ʼo te Puleʼaga ʼo te ʼAtua. (Mateo 9:​35; Luka 4:​43; 8:1) Ko te Puleʼaga ʼaia ko te puleʼaki ʼaē ka fakaʼaogaʼi anai e Sehova moʼo fakahoko ʼo te fakamālōlō faka milakulo ʼo te malamanei pea mo fakatokatoka ʼo te ʼu meʼa kovi fuli ʼaē neʼe fakatupu e te agahala ki te famili fakatagata. ʼE ina fakahoko feafeaʼi anai te meʼa ʼaia, pea ʼe ina fakahoko anai ʼi te temi fea?

ʼI tana fakakikite ʼo ʼuhiga mo te ʼu sēkulō ʼaē ka hoa mai, neʼe fakahā e Sesu ki te ʼapositolo ko Soane he ʼu meʼa faka polofeta: “ ʼI te temi ʼaenī kua hoko mai te fakamaʼuli pea mo te mālohi pea mo te puleʼaga ʼo totatou ʼAtua pea mo te pule ʼo tana Kilisito!” (Fakahā 12:10) ʼE hā lelei mai, ko te fili lahi ʼo te ʼAtua, ko Satana, kua lī ifo ia ia ki te ʼu tafaʼaki ʼo te kele talu mai te taʼu 1914, pea kua gāue moʼoni ia te Puleʼaga ia ʼaho nei! Neʼe fakanofo ia Sesu ke Hau ʼi te Puleʼaga Faka Mesianike, pea ʼi te temi nei ʼe kua tokalelei ke ina fai he ʼu fetogi lahi ʼi te kele.

Kua vave pe, pea ʼe puleʼi anai e te puleʼaga ʼo Sesu ʼaē ʼe ʼi selo he malamanei faitotonu, ʼio, ko he “kele foʼou.” (2 Petelo 3:​13) ʼE feafeaʼi anai te malamanei ʼi te temi ʼaia? Koʼeni tona fakamatala: “Pea neʼe ʼau sio ki te lagi foʼou pea mo te kele foʼou; he neʼe kua puli te lagi ʼāfea pea mo te kele ʼāfea . . . Pea ʼe . . . holoholoʼi anai [e te ʼAtua] te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.”​—Fakahā 21:​1, 4.

ʼE feala koa hakotou fakakaukauʼi peʼe feafeaʼi anai te maʼuli mokā hoko moʼoni anai te fakamālōlō faka milakulo ʼo te malamanei? “ ʼE mole he tahi ʼe ina toe ʼui anai: ‘ ʼE ʼau mahaki.’ Ko te hahaʼi ʼaē ʼe nonofo ʼi te fenua ʼe nātou mamata anai ki te fakamolemole ʼo tanatou agahala.” Ei, ʼe fakahoko anai e Sehova he ʼu meʼa ʼe mole feala ki te kau tagata faifaitoʼo faifakalauʼakau ke nātou fai. “ ʼE ina fakaʼauha moʼoni anai te mate ʼo talu ai.” ʼIo, “ko te Tuʼi ʼAliki ko Sehova ʼe ina holoholoʼi anai te ʼu loʼimata ʼi te ʼu fofoga fuli pe.”​—Isaia 25:8; 33:⁠24.

[Paki ʼo te pasina 7]

Ko te Puleʼaga ʼo te ʼAtua, ʼe ina fakamālōlō faka milakulo anai te malamanei